Read Kernewek Ysay 29 Bible Online

Ysay 29 - Kernewek bible

Ysay 29

¹Ogh Ariel, Ariel, an sita may kampyas Davydh ynni! Keworrewgh blydhen dhe vlydhen; gesiwgh an goelyow dhe vos a-dro yn kylgh.

²Mes stroetha Ariel my a wra, hag y fydh oelva ha kynvann, ha hi a vydh dhymmo vy avel oeles alter.[31]

³My a wra kampya a-derdro[32] er dha bynn, ha gul esedhva er dha bynn gans touryow ha drehevel tommennow er dha bynn.

⁴Ty a vydh dres isel, ha kewsel dhiworth an dor, ha dha lavar a vydh ankler y'n mes a'n doust. Dha lev a vydh avel nygromons yn-mes a'n dor, ha dha lavar a hwyster yn-mes a'n doust.

⁵Mes routh dha estrenyon a vydh avel ponn, ha'n routh fell a vydh avel us ow tremena dhe-ves. Ena yn pols, distowgh,

⁶ARLOEDH an luyow a dheu dhis gans taran ha dorgrys ha gans tros meur, gans tewedh hag annawel, ha flamm a dan ow kowlleski.

⁷Ena routh oll an kenedhlow a omladh erbynn Ariel, ha pubonan a omladh er hy fynn ha'y hastell, ha'n re a wra hy reudhi, a vydh avel hunros, gwelesigeth a'n nos.

⁸Kepar dell wra den nownek hunrosa a dhybri, ha difuna hwath gwag; po den ha syghes dhodho a hunros a eva, ha difuna klamderek, ha'y enev hwath ow polsa, yndella y fydh dhe routh oll an kenedhlow a omladh erbynn menydh Sion.

⁹Bedhewgh dyegrys ha penndegys, omdhallhewgh ha bedhewgh dall; bedhewgh medhow, mes a-der gans gwin, trebuchyewgh, mes a-der gans korev.

¹⁰An ARLOEDH re dhinewis warnowgh spyrys a hun down: Ev re dhegeas agas dhewlagas, hwi brofoesi; ha kudha agas pennow, hwi welesydhyon.

¹¹An gwelesigeth a hemma oll yw dhywgh kepar ha geryow a lyver selys. Pan y'n rons dhe dhen lettrys, ow leverel ‘Lenn hemma’, yn-medh ev, ‘Ny allav, drefenn y vos selys.’

¹²Ha pan yw an lyver res dhe dhen anlettrys, ow leverel, ‘Lenn hemma’, yn-medh ev, ‘Ny wonn lenna.’

¹³An Arloedh a leveris: Drefenn an bobel ma dhe dhos nes dhymm gans aga ganow hag ow enora gans aga diwweus, mes aga holonn yw pell dhiworthiv, ha'ga own ahanav yw dyskys gans gorhemmynn tus,

¹⁴rakhenna, awotta, my a wra marthusyon arta gans an bobel ma, marthys hag aneth. Furneth aga thus fur a vydh ow mos dhe goll, ha skians aga thus dhoeth a vydh kudhys.

¹⁵Go-i an re a gudh aga husul yn town dhiworth an ARLOEDH ha gul aga oberow y'n tewlder; yn-medhons, ‘Piw a'gan gwel? Piw a'gan aswonn?’

¹⁶Hwi a dreyl an pyth a-wartha dhe woeles. A vydh priweythor tybys avel pri? A lever an pyth yw gwrys a-dro dh'y wrier, ‘Ny'm gwrug’? A lever pott a-dro dh'y briweythor, ‘Ny gonvedh’?

¹⁷A ny vydh a bur verr spys pan vydh Lebanon dreylys dhe dir feyth, ha'n tir feyth bos tybys avel koeswik?

¹⁸Y'n jydh na an vodharogyon a glew geryow lyver, ha dhiworth duder ha tewlder dewlagas an dhellyon a wel.

¹⁹Arta an re uvel a's tevydh lowena y'n ARLOEDH, ha'n voghosogyon a lowenha yn Sans Ysrael.

²⁰Rag ny vydh an turant na fella, ha'n den a wra ges a dheu dhe dhiwedh, hag oll an re yw hewoel dhe wul meschyv a vydh treghys dhe-ves;

²¹an re a dhampen den der er, ha gorra maglenn rag an darsiwyas y'n yet, ha treylya breus an den gwiryon gans fals dhustuni.

²²Rakhenna yndellma y lever an ARLOEDH, neb a dhasprenas Abraham, a-dro dhe ji Yakob: Na fella ny vydh Yakob ow kemmeres meth, ha na fella ny vydh y fas gwannliwek;

²³rag pan wel y fleghes, ober ow diwla, a-ji dhodho, i a sansha ow hanow, ha sanshe Sans Yakob, ha perthi own a Dhuw Ysrael.

²⁴An re a wander yn spyrys a dheu dhe gonvedhes, ha'n re a grodhvol a dhegemmer dyskans.