Read Kernewek Ysay 3 Bible Online

Ysay 3 - Kernewek bible

Ysay 3

¹Rag ott, an Arloedh, ARLOEDH an luyow, a gemmer yn-mes dhiworth Yerusalem ha Yuda skoedhyans ha lorgh, oll skoedhyans a vara, hag oll skoedhyans a dhowr,

²an kasor ha'n gour a vresel, an breusyas ha'n profoes, ha'n koelyek ha'n henavek,

³an kapten a hanter-kans ha'n den a vri, an kusulyer ha'n den skentel yn pystri, ha'n gorhenyas skentel.

⁴My a re mebyon dhe vos aga fennsevigyon, ha fleghes a's govern.

⁵An bobel a vydh arweskys, peub gans den arall, ha peub gans y gentrevek; An yowynk a vydh tont erbynn an henavek, ha'n koeg a wask an den wordhi.

⁶Pan gyv gour dalghenn yn y vroder dhiworth chi y das, yn-medh ev, ‘Yma dhis mantell, ty a vydh agan ledyer, ha'n bern ma a vagoryow a vydh yn-dann dha leuv.’

⁷Y'n jydh na ev a gri, ow leverel, ‘Ny allav lystenna, nyns eus naneyl bara na mantell y'm chi; na'm gwrewgh vy ledyer an bobel.’

⁸Rag Yerusalem re drebuchyas ha Yuda re goedhas, drefenn bos aga thaves ha'ga gwriansow erbynn an ARLOEDH, ow rebellya erbynn golok y wolewder.

⁹Semlans aga fas a worthyp er aga fynn ha disklerya aga fegh avel Sodom; ny's kudhons. Go-i aga enevow! rag i re dhros drog warnedha aga honan.

¹⁰Leverewgh dhe'n den gwiryon, y fydh da ragdho, rag i a dheber frut aga gwriansow.

¹¹Go-ev an tebelwas, drog a'n jevydh; drefenn war-lergh ober y dhiwleuv y fydh gwrys dhodho ev.

¹²Ow fobel, hy rewloryon a's arwask, ha benynes a's rewl. Ow fobel, dha ledyoryon a wra dhedha gwandra, ha distrui fordh dha hynsyow.

¹³An ARLOEDH re gemmeras y le dhe bledya y gen, ha sevel dhe vreusi poblow.

¹⁴An ARLOEDH a dheu yn breus gans henavogyon ha pennsevigyon y bobel: Hwi yw neb re dhiswrug an winlann; yma preydh an boghosek yn agas chiow.

¹⁵Pyth yw dhywgh, hwi dhe vrewi ow fobel, ha melyas fasow an voghosogyon? yn-medh an Arloedh, DUW an luyow.

¹⁶An ARLOEDH a leveris: Rag bos myrghes Sion goethus, ow kerdhes gans konnaow omystynnys, ha dewlagas ardhynus, ow kerdhes gans kammow bleudh, ha'n modrewi war aga dewufern ow tynkyal;

¹⁷an ARLOEDH a dhre krevennow war glopenn myrghes Sion, ha'n ARLOEDH a lommha aga thal.

¹⁸Y'n jydh na an Arloedh a wra remova tekter modrewi aga dewufern, an penngwiskow ha'n tergh-kromman;

¹⁹an skinennow, an breghelligow, ha'n vaylys;

²⁰an tulyfantys, an chaynys ufern, an grogysyow pann, an botellow ethenn, ha'n soenelligow;

²¹an bysowyer sel ha'n bysowyer troen;

²²an dillas dy'goel, an mantelli, an gwarrlennow ha'n tigennow;

²³an niwlwias, an iswiskasow, an tulyfantys, ha'n kudhlennow penn.

²⁴Yn le spisys y fydh fler, hag yn le grogys pann y fydh kordenn, yn le gols plethys y fydh bloghter, yn le dillas teg y fydh yskar, ha kreyth leskys yn le tekter.

²⁵Dha wer a goedh der an kledha, ha'th kasoryon y'n gas.

²⁶Hy yetys a gyn ha galari, hag omdhivesys hi a vydh esedhys war an dor.