Read Kernewek Ysay 32 Bible Online

Ysay 32 - Kernewek bible

Ysay 32

¹Otta, myghtern a reyn yn ewnder ha pennsevigyon a wovern gans gwirvreus.

²Pubonan a vydh avel kudhva rag an gwyns, ha skovva rag an annawel, avel goverow dowr yn tir sygh, avel an skeus a garrek bras yn tir skwith.

³Ena ny vydh degeys dewlagas an re a wel, ha diwskovarn an re a glew a woslow.

⁴Kolonn an re dhibreder a gonvedh godhvos, ha taves an re a gews yn unn hokya a vydh freth ha kler.

⁵Ny vydh an foll gelwys nobyl namoy, na ny vydh drogwas synsys dhe vos hel.

⁶Rag an foll a gews follneth, ha' y golonn a wra droktra: ev a wra taklow didhuw, ow kewsel falsuri a-dro dhe'n ARLOEDH, ow kul gwag enev an den nownek hag ow skonya ri dowr dhe'n den mayth eus syghes dhodho.

⁷Sherewynsi an sherewa yw drog; ev a dewl towlow dhe dhiswul an voghosogyon gans lavarow gowek, hwath pan vo klem an edhommek gwir.

⁸An den nobyl a dewl towlow nobyl, hag y'n taklow nobyl ev a sev.

⁹Sevewgh, hwi venynes yw attes, klewewgh ow lev; myrghes fydhyansek, goslowewgh orth ow lavar.

¹⁰A-ji dhe blydhen ha nebes dydhyow hwi a gren, hwi venynes fydhyansek, rag trevas an grappys a fyll, ha ni dheu trevas an frut.

¹¹Krenewgh, hwi venynes yw attes; skruthewgh, hwi yw fydhyansek; omstryppyewgh ha bedhewgh lomm, grogysiwgh agas diwglun gans yskar.

¹²Gweskewgh war agas diwvronn rag an gwelyow desiradow, rag an gwinbrennyer feyth,

¹³rag dor ow fobel le may teu spedhas ha spern yn-bann, rag oll an chiow heudh y'n sita lowen.

¹⁴Rag an kastell a vydh forsakys, tervans an sita a dhifyk; Ofel ha'n tour-goelyas a vydh grugek[35] bys vykken, lowena dhe asenes gwyls, peurva dhe flokkys,

¹⁵erna vo an Spyrys dinewys warnedha a-wartha. Ena an gwylvos a vydh tir feyth, ha'n tir feyth a vydh synsys dhe vos koeswik.

¹⁶Ena gwirvreus a drig y'n gwylvos, hag ewnder a annedh an tir feyth.

¹⁷Ober gwiryonedh a vydh kres, ha siwyans ewnder a vydh kosoleth ha sawder bys vykken.

¹⁸Ow fobel a drig yn peurva hebask, yn annedhow saw, hag yn powesvaow kosel.

¹⁹Kyn fo an koeswik terrys yn-nans gans keser, ha'n sita levenhes orth an dor,

²⁰gwynnvys vydh an re a wonis has ryb pub avon, ha gasa dhe dreys an ojyon ha'n asen wandra yn rydh.