Read Kernewek Ysay 33 Bible Online

Ysay 33 - Kernewek bible

Ysay 33

¹Go-jy, ty dhistruer, mes ny veus distruys; ty a draytas, mes nagonan ny wrug dha drayta. Pan astelydh distrui, ty a vydh distruys; pan astelydh trayta, i a wra dha drayta.

²A ARLOEDH, bydh grassyes orthyn; ni re'th wortas. Bydh agan bregh pub myttin, ha'gan selwyans yn termyn ankres.

³Orth tros an tervans, poblow a fi dhe'n fo; pan os eksaltys, kenedhlow yw skattrys.

⁴Preydh a vydh kuntellys kepar dell ve gans an lokust; avel hes a lokustes i a lamm warnodho.

⁵An ARLOEDH yw ughelhes, trigys y'n ughelder; ev a lenow Sion a wirvreus hag ewnder.

⁶Ev a vydh faster dha dermynyow, rychys a selwyans, furneth ha skentoleth; own a'n ARLOEDH yw y dresor.

⁷Otta, gwer golonnek a gri y'n stretys; kannasow kres a oel yn hwerow.

⁸An fordhow meur yw gwastys, nyns eus tremenyas y'n hyns. An kevambos yw terrys, ha dispresys yw an tiow;[36] ny wrons vri a dus.

⁹An tir a gyn ha gwedhra; Lebanon a gemmer meth ha pedri; Sharon yw avel gwylvos, ha Bashan ha Karmel a shak aga del dhe-ves.

¹⁰‘Lemmyn my a sev’, yn-medh an ARLOEDH, ‘lemmyn my a vydh ughelhes, lemmyn my a vydh eksaltys.

¹¹Hwi a gonsev us, hwi a dhineyth kulyn; agas anall yw tan a wra agas devorya.

¹²An poblow a vydh leskys avel lim; avel spern treghys, leskys vydhons y'n tan.’

¹³Klewewgh, an re yw a-bell, pandr'a wrug vy; aswonnewgh ow galloes, an re yw ogas.

¹⁴An beghadoryon yn Sion a berth own; kren a dhalghenn an re dhidhuw: ‘Piw ahanan a yll triga gans an tan a dhevor? Piw ahanan a yll triga gans flammow a dhur bys vykken?’

¹⁵An den a gerdh yn ewnder ha kewsel ewnhynseth, neb a dhenagh gwayn a arwask, neb a shak y dhiwleuv ma na synsons falswober, ha stoppya y skovarn ma na glewons a skoellya goes, ha degea y dhewlagas ma na welons drog —

¹⁶ev a vydh trigys y'n ughelderyow, dinasow an karregi a vydh y skovva; y vara a vydh res dhodho, ha ny fyll dowr dhodho.

¹⁷Dha dhewlagas a wel an myghtern yn y dekter i a wel tir owth ystynn pell.

¹⁸Dha golonn a berth kov a'n browagh: ‘Ple'ma an den esa ow nivera? Ple'ma an den esa ow poesa an doll? Ple'ma an den esa ow rekna an touryow?’

¹⁹ny welydh an bobel valgh byth moy, pobel a yeth re ankoth dhe gonvedhes, taves koynt ankonvedhadow.

²⁰Mir war Sion, sita agan solempnitys apoyntys; dha dhewlagas a wel Yerusalem, trigva gosel, tylda anwayadow; ny vydh y ebilyer nevra tennys yn-mes, na ny vydh y gerdyn terrys.

²¹Mes ena an ARLOEDH meuredhek a vydh dhyn tyller a avonyow ha goverow ledan; ny vydh gorholyon gans roevow ow mos ynno, na ny vydh lester bras ow tremena dresto.

²²Rag an ARLOEDH yw agan breusyas, an ARLOEDH yw agan rewler, an ARLOEDH yw agan myghtern; Ev yth yw neb a wra agan sawya.

²³Dha lovanweyth a greg lows, ny yllons synsi fast sel aga gwern, na gwitha an goel lesys yn-mes. Ena preydh pals a vydh kevrennys; hwath evredhyon a yll pylla.

²⁴Ny lever annedhyas, ‘My yw klav’; kammweyth an bobel trigys ynni a vydh gevys.