Read Kernewek Ysay 36 Bible Online

Ysay 36 - Kernewek bible

Ysay 36

¹Y'n peswardhegves blydhen a reyn Hezekia, Sennagherib, myghtern Assyria a dheuth yn-bann erbynn oll an trevow kerys a Yuda, ha settya dalghenn ynna.

²Ena myghtern Assyria a dhannvonas an Rabshake[40] dhiworth Lakish dhe Yerusalem dhe vyghtern Hezekia gans lu bras. Ev a sevis orth dowrbons an poll gwartha ryb an fordh dhe Bark an Troghyer.

³Elyakim mab Hilkia, governour an palys, eth dhe-ves dhodho, ha Shebna an pennskrifennyas ha Yoagh mab Asaf an kovadhor.

⁴An Rabshake a leveris dhedha, ‘Leverewgh dhe Hezekia, Yndellma y lever an myghtern meur, myghtern Assyria: Pandr'yw an fydhyans ma a drestydh ynno?

⁵Ty[41] a lever bos genes kusul ha galloes rag an gas, mes nyns yw marnas geryow gwag. Lemmyn yn piw y fydhydh, ha ty ow rebellya er ow fynn?

⁶Otta, ty a fydh yn lorgh an gorsenn drogh ma, Ejyp, a enter ha gwana leuv an gour a boes warnedhi. Yndella yw Faro myghtern Ejyp, dhe vyns a drest ynno.

⁷Ha mar leverydh dhymm, “Ni a fydh y'n ARLOEDH agan Duw”, a nyns yw ev neb a wrug Hezekia kemmeres yn-mes y dylleryow ughel ha'y alteryow, ow leverel dhe Yuda ha Yerusalem, “Hwi a wordh a-rag an alter ma”?

⁸Lemmyn gwra bargen gans ow arloedh, myghtern Assyria, ha my a re dhywgh dew vil margh, mar kyllydh y'th parth jy settya marghogyon warnedha.

⁹Fatell yllydh treylya dhe-ves fas unn soedhek yn mysk an lyha a servysi ow arloedh, ha ty ow fydhya yn Ejyp rag charettow ha marghogyon?

¹⁰Ha lemmyn, a yskynnis vy erbynn an tir ma dh'y dhistrui heb an ARLOEDH? An ARLOEDH a leveris dhymm, Yskynn erbynn an tir ma, ha'y dhistrui.’

¹¹Ena Elyakim, Shebna ha Yoagh a leveris dhe'n Rabshake, ‘Kows, my a'th pys, dhe'th servysi yn Aramaek rag ni a'n konvedh; na gows orthyn yn Yedhowek a-ji dhe glewans an bobel usi war an fos.’

¹²Mes yn-medh an Rabshake, ‘A wrug ow arloedh ow dannvon dhe gewsel an geryow ma dhe'th arloedh ha dhiso jy, a-der dhe'n wer usi owth esedha war an fos, yw destnys genowgh hwi dhe dhybri aga hawgh hag eva aga urin?’

¹³Ena an Rabshake a sevis ha garma gans lev ughel yn Yedhowek, ‘Klewewgh geryow an myghtern meur, myghtern Assyria.

¹⁴Yndellma y lever an myghtern: “Na esiwgh Hezekia dh'agas toella, rag ny yll agas delivra.

¹⁵Na esiwgh ev dhe wul dhywgh fydhya y'n ARLOEDH, ow leverel, An ARLOEDH a wra agan delivra yn surredi; ny vydh an sita ma res yn leuv myghtern Assyria.”

¹⁶Na woslowewgh orth Hezekia; rag yndellma y lever myghtern Assyria: “Omrewgh ha dewgh yn-mes dhymm. Ena pubonan a dheber a'y winbrenn y honan ha'y figbrenn y honan ha pubonan a yv a'y buth y honan,

¹⁷bys pan dhov ha'gas kemmeres yn-mes dhe dir haval dh'agas tir agas honan, tir a ys ha gwin nowydh, tir a vara ha gwinlannow.

¹⁸Na esiwgh Hezekia dh'agas toella, ow leverel, An ARLOEDH a wra agan delivra. A wrug duw vytholl a'n kenedhlow delivra y dir rag leuv myghtern Assyria?

¹⁹Ple'ma duwow Hamath hag Arpad? Ple'ma duwow Sefarvaym? A dhelirvsons Samaria yn-mes a'm leuv?

²⁰Piw eus a oll duwow a'n tiryow ma neb a dhelivras aga thiryow yn-mes a'm leuv? Ytho fatell yll an ARLOEDH delivra Yerusalem yn-mes a'm leuv?” ’

²¹Mes i a dewis ha ny worthybsons dhodho ger, drefenn bos gorhemmynn an myghtern, ‘Na worthybewgh dhodho.’

²²Ena Elyakim mab Hilkia, governour an palys, ha Shebna an pennskrifennyas ha Yoagh mab Asaf an kovadhor a dheuth dhe Hezekia skwardys aga dillas, ha derivas dhodho geryow an Rabshake.