Read Kernewek Ysay 39 Bible Online

Ysay 39 - Kernewek bible

Ysay 39

¹Y'n termyn na Merodak-baladan mab Baladan myghtern Babylon a dhannvonas lytherow ha ro dhe Hezekia, rag ev a glewas ev dhe vos klav, hag ena yaghhes.

²Hezekia a wolkommas an kannasow, hag ev a dhiskwedhas dhedha y dresorva, an arghans, an owr, an spisys, an oyl drudh, oll y withva-arvow, ha pup-tra kevys yn y dresoryow. Ny veu travyth na wrug Hezekia y dhiskwedhes dhedha yn y ji hag yn oll y ruvaneth.

³Ena Ysay an profoes a dheuth dhe vyghtern Hezekia, hag yn-medh ev dhodho, ‘Pandr'a leveris an wer ma hag a-ble teuthons dhis?’ Yn-medh Hezekia, ‘Dhiworth gwlas pell y teuthons dhymm, dhiworth Babylon.’

⁴Yn-medh ev, ‘Pandr'a welsons yn dha ji?’ Ha Hezekia a leveris, ‘I re welas pup-tra eus yn ow chi; nyns eus travyth yn mysk ow thresoryow na wrugavy y dhiskwedhes dhedha.’

⁵Ena Ysay a leveris dhe Hezekia, ‘Klew ger ARLOEDH an luyow:

⁶Otta dydhyow a dheu pan vydh degys yn-mes dhe Babylon pup-tra eus yn dha dresorva, hag a wrug dha dasow y guntell bys y'n jydh hedhyw; ny vydh travyth gesys, yn-medh an ARLOEDH.

⁷Hag i a gemmer re a'th vebyon, dha askorr hag a vydh genys dhis, hag i a vydh spadhesigyon yn palys myghtern Babylon.’

⁸Yn-medh Hezekia dhe Ysay, ‘Da yw ger an ARLOEDH a gewssys.’ Rag ev a brederis, ‘Ytho y fydh kres ha sawder y'm dydhyow.’