Read Kernewek Ysay 41 Bible Online

Ysay 41 - Kernewek bible

Ysay 41

¹Bedhewgh tawel a-ragov, hwi ynysow; nowydhhes an poblow aga nerth, nesens i, ena kewsens i; nesyn ni war-barth rag breus.

²Piw a wrug dhe nebonan difuna dhiworth an howldrevel, orth y elwel dh'y servis[46] yn ewnder? Ev a re kenedhlow a-ragdho, ha fetha myghternedh; ev a's gwra avel doust gans y gledha, avel sowl herdhys gans y warak.

³Ev a's helgh ha tremena yn sawder, war hynsyow ma na drettyas y dreys.

⁴Piw re wrug hag a gowlwrug hemma, ow kelwel an henedhow a-dhia'n dhallethva? My, an ARLOEDH, an kynsa, ha gans an re dhiwettha; my yw ev.

⁵An arvoryow re welas hag own a's teves, pennow an bys a gren; i re nesas ha dos.

⁶Peub a weres y gentrevek, hag a lever dh'y vroder, ‘Bydh krev!’

⁷An ser a golonnekha an owrer, hag ev neb a levenha gans an morthol a golonnekha gwesker an anwan, ow leverel a'n sodra ‘Da yw’, hag ev a'n fast gans kentrow ma na vo deantell.

⁸Mes ty, Ysrael, ow gwas, Yakob, neb re dhewisis, askorr Abraham, ow howeth;

⁹ty neb a gemmeris vy a bennow an norvys, ha'th helwel a'y bella sornow, ow leverel dhis, ‘Ty yw ow gwas, my re'th tewisas ha ny'th tewlis dhe-ves’;

¹⁰na borth own, rag yth esov genes, na vydh digolonnek, rag my yw dha Dhuw; my a wra dha nertha, my a wra dha weres, my a'th syns gans dorn dhyghow ow selwyans.

¹¹Otta, oll an re a serr orthis a's tevydh meth hag a vydh konfondys; an re a striv orthis a vydh avel mann, ha mos dhe goll.

¹²Ty a's hwila mes ny's kevydh, an re a striv orthis; an re a werr orthis a vydh avel mann kammenn.

¹³Rag my, an ARLOEDH, yw dha Dhuw a syns dha dhorn dhyghow; neb a lever dhis, ‘Na borth own, my a'th weres.’

¹⁴Na borth own, ty bryv, Yakob, ty gontronenn[47] Ysrael! My a wra dha weres, yn-medh an ARLOEDH, dha Dhasprenyas, an Sans a Ysrael.

¹⁵Otta, my a'th wra draylell-dhrushya, lymm, nowydh, ha dhedhi dyns, ty a dhrusha an menydhyow, ha'ga brewi, ha ty a wra an breow avel us.

¹⁶Ty a wra aga noetha, ha'n gwyns a's deg dhe-ves, ha'n korwyns a wra aga skattra. Mes ty a lowenha y'n ARLOEDH, ha bostya y'n Sans a Ysrael.

¹⁷Pan hwila an voghosogyon ha'n edhommogyon dowr, ha nyns eus banna, ha krin yw aga thaves gans syghes, my an ARLOEDH a worthyp dhedha, my, Duw Ysrael, ny's gasav.

¹⁸My a vynn igeri avonyow war an ugheldiryow moel, ha fentynyow yn mysk an nansow; my a wra an difeythtir poll dowr, ha'n dor sygh fentynyow dowr.

¹⁹My a worr y'n difeythtir an kederwydh, an akasia, an myrtwydh ha'n olewbrenn. My a worr y'n difeythtir meryw, an platan ha'n kypres war-barth,

²⁰rag may hwello tus ha godhvos, ynwedh prederi ha konvedhes, y hwrug dorn an ARLOEDH hemma ha'n Sans a Ysrael dh'y formya.

²¹Dyllewgh agas ken, yn-medh an ARLOEDH, degewgh agas provow, yn-medh Myghtern Yakob.

²²Degens i ha derivens dhyn an pyth a hwyrvydh, derivens an taklow tremenys, pyth yns, rag may prederryn a-dro dhedha, rag may hwodhvyn aga siwyans; po derivewgh dhyn an taklow yw dhe dhos.

²³Derivewgh an taklow yw dhe dhos a-wosa, rag may hwodhvyn hwi dhe vos duwow; gwrewgh da, po gwrewgh drog, rag may fyn digolonnek hag ownek war-barth.

²⁴Otta, hwi yw mann, ha'gas ober yw mann, tra gasadow yw neb a'gas dewis.

²⁵My a wrug dhe onan difuna dhiworth an gledhbarth hag ev a dheu, dhiworth an howldrehevel, hag ev a elow war ow hanow. Ev a stank war rewloryon kepar dell ve war leys, dell drett an priweythor an pri.

²⁶Piw a'n derivas a-dhia'n dhallethva, rag may hwodhvons, ha'y dharleverel rag may lavarren, ‘Ev yw gwirleveryas’? Nyns esa denvyth a'n derivas, na denvyth neb a'n dellos, na nebonan a glewas dha eryow.

²⁷My re beu an kynsa neb a dherivas dhe Sion, ‘Awottensi!’ My a re dhe Yerusalem kannas a nowodhow da.

²⁸My a viras, mes nyns esa denvyth; yn mysk an re ma nyns eus kusulyer vyth, neb pan wovynnav, a re gorthyp.

²⁹Otta, toell yns i oll, nyns yw aga oberow travyth; aga imajys teudh yw gwyns ha gwakter.