Read Kernewek Ysay 46 Bible Online

Ysay 46 - Kernewek bible

Ysay 46

¹Bel a bleg dhe'n dor, Nebo a warrgromm, yma aga imajys war vestes ha gwarthek; an taklow degys genowgh yw beghus, avel beghyow poes war enyval skwith.

²I a warrgromm, i a bleg war-barth. Ny yllons sawya an begh, mes i aga honan a yn kethneth.

³Goslowewgh orthiv, chi Yakob, oll an remenant a ji Ysrael, neb re beu begh warnav a-dhia'n brys, degys a-ban esens y'n dorr;

⁴bys y'th henys my yw ev, bys pan dreylli loes my a'th teg. My re'th wrug ha my a'th skoedh, ha my a venten hag a wra sawya.

⁵Piw dhodho y'm hevelebowgh ha'm gul par dhodho, ha'm keheveli, may fen haval an eyl dh'y gila?

⁶An re a skoell owr yn hel dhiworth an pors, hag a boes arghans y'n mantolyow, i a arveth owrer neb a'n gwra duw; ena i a goedh dhe'n dor ha gordhya.

⁷I a'n drehav war aga diwskoedh, i a'n gorr yn y le, hag ev a sev ena; ny yll ev gwaya dhiworth y dyller. Mar kri nebonan dhodho, ny worthyp, na ny wra y sawya a alar.

⁸Perthewgh kov a hemma ha prederewgh; avisiwgh arta yn agas kolonn, hwi dhrogoberoryon.

⁹Perthewgh kov a'n taklow koth a henys; rag my yw Duw, ha nyns eus ken; my yw Duw, ha nyns eus onan haval dhymm,

¹⁰ow tarleverel an diwedh a-dhia'n dalleth, hag a-dhia dermynyow koth taklow na veu hwarvedhys hwath, ow leverel, ‘Ow forpos a sev, ha my a wra oll ow bodh’,

¹¹ow kelwel edhen-breydh dhiworth an howldrevel, an gour rag ow forpos a vro bell. My re gewsis, ha my a'n kowlwra; my re dewlis, ha my a'n gwra.

¹²Goslowewgh orthiv, hwi hardh agas kolonn, hwi neb yw pell a ewnder:

¹³My a dhre ow ewnder yn ogas, ny vydh pell, ha'm selwyans, ny wra ev strechya. My a re selwyans dhe Sion, ha dhe Ysrael y rov ow splannder.