Read Kernewek Ysay 48 Bible Online

Ysay 48 - Kernewek bible

Ysay 48

¹Klew hemma, A ji Yakob, hwi neb yw henwys orth hanow Ysrael, hag a dheuth dhiworth dowrow Yuda, hag a wra ti re hanow an ARLOEDH, ha gelwel war Dhuw Ysrael, mes ny'n gwrons yn gwiryonedh nag yn ewnder.

²Rag i a omhenow war-lergh an sita sans, ha fydhya yn Duw Ysrael; ARLOEDH an luyow yw y hanow.

³My a dharleveris an kynsa taklow nans yw pell, i eth yn-mes a'm ganow, my a's dellos; ena a-dhistowgh my a's gwrug, hag i a hwarva.

⁴Drefenn my dhe wodhvos dha vos gorth, ha'th konna dhe vos giowenn a horn, ha'th tal dhe vos brest,

⁵my a's darleveris dhis a hirneth, kyns i dhe hwarvos y's delles dhis, ma na lavarres, ‘Ow idol a's gwrug, ow imaj gravys ha'm imaj teudhys a's erghis.’

⁶Ty re glewas; lemmyn gwel oll hemma; hag a ny vynnowgh y dhyllo? Alemma rag my a wra dhis klewes taklow nowydh, taklow kudhys na wodhyes.

⁷Lemmyn yth yns i gwrys, a-der yn termyn passys, kyns an jydh hedhyw ny glewsys anedha, bys ma na ylli leverel, ‘My a's godhva seulabrys.’

⁸Naneyl ny glewsys, na ny wodhves, a'n termyn koth ny veu dha skovarn igerys; rag y hwodhyen ty dhe vos pur draytus, hag a'th enesigeth ty a veu henwys dislel.

⁹A-barth ow hanow my a dhelat ow sorr, a-barth ow gormola y'n lestav ragos, ma na'th tregghiv dhe-ves.

¹⁰Mir, my re'th purhas, a-der avel arghans; my re'th provas y'n forn a alar.

¹¹A'm govis vy, a'm govis evy y'n gwrav, rag fatell vydhav defolys?[55] Ha'm glori ny'n rov dhe arall.

¹²Goslow orthiv, A Yakob, ha ty Ysrael, neb a elwis: my yw ev; my yw an kynsa, ha my yw an diwettha.

¹³Ow dorn a fondyas an norvys, ha'm dorn dhyghow a lesas an nevow; pan y's galwav, i a sev a-ragov war-barth.

¹⁴Omguntellewgh, hwi oll, ha klewewgh: piw anedha re dhiskwedhas an taklow ma? An ARLOEDH a'n kar, ev a gowlwra y borpos war Babylon, ha'y vregh a vydh erbynn Kaldea.

¹⁵My, my ow honan re gewsis ha'y elwel, my re'n dros, hag ev a wra siweni yn y fordh.

¹⁶Dewgh nes dhymm, ha klewewgh hemma: A-dhia'n dhallethva ny gewsis yn-dann gel, a-dhia'n termyn may teu an taklow ma ha bos, awottavy! Ha lemmyn an Arloedh DUW re'm dannvonas, gans y spyrys.

¹⁷Yndellma y lever an ARLOEDH, dha Dhasprenyas, an Sans a Ysrael: My yw an ARLOEDH dha Dhuw, a'th tysk rag dha les dha honan, ha'th hembronk y'n fordh may tegoedh dhis mones ynni.

¹⁸Unnweyth a koslowes orth ow gorhemmynnow! Ena y fia dha siwena avel avon, ha'th ewnder avel tonnow an mor;

¹⁹dha has a via avel an tewes, hag agh dha dorr avel y dewesennow, nevra ny via aga hanow treghys glan, na distruys a-ragov vy.

²⁰Kewgh yn-mes a Babylon, fiewgh dhiworth Kaldea, dyllewgh hemma gans garm a lowender, ha'y dherivas, dannvenewgh e bys yn penn an norvys; leverewgh, ‘An ARLOEDH re dhasprenas Yakob y was.’

²¹Ny's tevo syghes pan y's hembronkas der an difeythyow, ev a wrug may resekka an dowr ragdha a'n garrek, ev a folsas an garrek, ha'n dowr a frosas yn-mes.

²²‘Nyns eus kres’, yn-medh an ARLOEDH, ‘rag an debeles.’