Read Kernewek Ysay 5 Bible Online

Ysay 5 - Kernewek bible

Ysay 5

¹My a gan lemmyn dhe'm karadow kan kerensa a-dro dh'y winlann: Ow haradow a'n jeves gwinlann war vronn pur feyth.

²Ev a's palas, ha kuntell an meyn yn-mes anedhi, ha plansa ynni an gwella gwinbrennyer. Ev a dhrehevis tour y'n kres anedhi, hag ynwedh ev a droghas gwinwask ynni. Ev a waytyas grappys dhe vos gwrys, mes y hwrug grappys trenk.

³Lemmyn, annedhysi Yerusalem ha gwer Yuda, breusiwgh yntra my ha'm gwinlann.

⁴Pandr'a allsen gul moy rag ow gwinlann na wrug vy rygdhi? Pan waytis hi dhe wul grappys, prag y hwrug grappys trenk?

⁵Lemmyn my a dheriv dhywgh an pyth a wrav rag ow gwinlann: my a gemmer dhe-ves an ke ha hi a vydh peurva; my a wra aswa yn hy fos ha hi a vydh tir trettys.

⁶My a's gwra difeyth; ny vydh skethrys, na ny vydh kravellys, mes spedhas ha spern a dyv ena. My a wra gorhemmynn dhe'n kommol ma na rollons glaw warnedhi.

⁷Rag gwinlann ARLOEDH an luyow yw chi Ysrael, ha gwer Yuda yw plansva y dhelit. Ev a worta gwirvreus hag awotta kammvreus, ewnder hag awotta kri.

⁸Go-i a jun chi dhe ji, ha keworra park dhe bark, bys pan na vo tyller gesys, ha nyns eus gesys marnas hwi dhe driga yn kres an wlas.

⁹ARLOEDH an luyow re leveris y'm diwskovarn: Sur lies chi bras a vydh magor, chiow brav a vydh heb annedhyas.

¹⁰Ytho gwinlann a dheg erow a wra unn bath,[2] ha'n homer[3] a has a wra efa.[4]

¹¹Go-i a dhifun myttin a-varr dhe helghya korev, ha tarya bys nos, ynflammys gans gwin.

¹²Yma sowtri ha telynn, tabourik ha pibow, ha gwin yn aga gwledhow, mes ny virons orth gweyth an ARLOEDH, na gweles ober y dhiwla.

¹³Rakhenna ow fobel a yn divroedh rag fowt a skians; hy gwer nobyl a verow dre dhivoetter, ha'y routh dre syghes.

¹⁴Rakhenna ifarn re igoras y vryansenn a-les, hag igeri y anow dres musur; hy splannder ha'y thervysk a dhiyskynn ynno, ha'y routh, hag ev neb a lowenha.

¹⁵Den yw plegys dhe'n dor, ha gour yw gwrys isel, ha dewlagas an re woethus a vydh isel.

¹⁶Mes ARLOEDH an luyow a vydh ughelhes yn gwirvreus, ha'n Duw sans a vydh sanshes yn ewnder.

¹⁷Ena eyn a beur kepar hag yn aga feurva, hag enyvales peskys ha mynnow a dheber yn mysk an magoryow.

¹⁸Go-i neb a denn anewnder dre lovonow euveredh, ha peghes avel dre lovonow kert,

¹⁹neb a lever ‘Fistenes, bedhes y ober uskis, ma'n gwellyn. Neses, ha des kusul Sans Ysrael, ma's aswonnyn.’

²⁰Go-i neb a lever drog dhe vos da, ha da dhe vos drog, ha gorra tewlder rag golow, ha golow rag tewlder, ha gorra hwerow rag hweg, ha hweg rag hwerow.

²¹Go-i neb yw skentel yn aga dewlagas aga honan, ha konnyk yn aga golok aga honan.

²²Go-i neb yw galloesek dhe eva gwin, ha kampyoryon dhe gemmyska korev,

²³neb a dhelirv an kablus dhe wari rag falswober, ha kemmeres ewnder dhe-ves dhiworth an dus wiryon.

²⁴Rakhenna kepar dell wra tavosow tan dybri an sowl, hag kepar dell wra gwels sygh sedhi y'n flammow, yndellma aga gwreydh a vydh avel poder, ha'ga bleujyow a yn-bann avel doust; drefenn i dhe nagha lagha ARLOEDH an luyow, ha skonya lavar Sans Ysrael.

²⁵Rakhenna sorr an ARLOEDH a dhew erbynn y bobel, hag ev a ystynn y leuv er hy fynn ha'y gweskel. An menydhyow a gren, ha'ga horfow yw avel atal yn kres an stretys. Yn despit dhe oll hemma, ny dreyl y sorr dhe-ves, ha'y leuv yw hwath ystynnys.

²⁶Ev a dhrehav baner rag kenedhlow a-bell, ha hwibana dhedha[5] dhiworth pennow an bys. Awotta ev a dheu, uskis, gans toeth bras!

²⁷Nyns yw nagonan skwith, nagonan ny drebuch ynna, nagonan ny hun, nagonan ny gosk, nyns yw grogys diwglun denvyth lows, kroen sandal ny vydh terrys.

²⁸Y sethow yw lymmys hag oll y waregow yw plegys; karnow y vergh yw reknys avel kellester, ha'y rosow avel an korwyns.

²⁹Yma dhodho us kepar ha'n lew, ev a us avel lewyon yowynk; grommya a wra ha dalghenna preydh; ev a'n dre dhe-ves, ha nyns eus denvyth dh'y sawya.

³⁰Y'n jydh na ev a romm warnodho avel grommya an mor. Mar mirir orth an tir, awotta tewlder hag ankres; golow a vydh tewlhes gans an kommol.