Read Kernewek Ysay 52 Bible Online

Ysay 52 - Kernewek bible

Ysay 52

¹Difun, difun, gwisk dha nerth, A Sion! Gwisk dha dhillas teg, A Yerusalem, an sita sans; rag ny enter ynnos na fella den antrodreghys nag avlan.

²Shak dha honan dhiworth an doust, sav yn-bann, esedh war dha dron, A Yerusalem; digolm an kadonyow a'th konna, A gethes, myrgh Sion.

³Rag yndellma y lever an ARLOEDH: Hwi a veu gwerthys heb pemont, ha dasprenys vydhowgh heb arghans.

⁴Rag yndellma y lever an Arloedh DUW: Nans yw pell ow fobel eth yn-nans dhe Ejyp, dhe driga ena avel estrenyon, hag Assyria ynwedh a's gwaskas heb ken.

⁵Lemmyn ytho pandr'eus dhymm omma? yn-medh an ARLOEDH, ha'm pobel degys dhe-ves heb kost. Aga rewloryon a oul, yn-medh an ARLOEDH, ha pup-prys oll an jydh, dispresys yw ow hanow.

⁶Rakhenna ow fobel a wra aswonn ow hanow; rakhenna y'n jydh na i a woer my dhe vos neb a gews; awottavy.

⁷Ass yw teg war an menydhyow treys an gannas hag a dhre nowodhow da, neb a dhyllo kres ha derivas dader, neb a dhyllo selwyans; neb a lever dhe Sion, ‘Dha Dhuw a reyn.’

⁸Lev dha withysi: i a dhrehav aga lev; war-barth i a gan gans joy, rag i a wel lagas dhe lagas dehwelyans an ARLOEDH dhe Sion.

⁹Germewgh gans joy, hwi vagoryow a Yerusalem; rag an ARLOEDH re gonfortyas y bobel, ev re dhasprenas Yerusalem.

¹⁰An ARLOEDH re dhislennis y vregh sans a-rag dewlagas an kenedhlow oll, hag oll pennow an norvys a wel selwyans agan Duw.

¹¹Treylyewgh, treylyewgh, dewgh yn-mes alena, na dochyewgh tra avlan. Dewgh yn-mes anodho ha bedhewgh glan, hwi neb a dheg lestri an ARLOEDH.

¹²Rag ny wrewgh dos yn-mes yn fysk ha ny wrewgh mos yn fo, rag an ARLOEDH a a-ragowgh, ha Duw Ysrael a vydh agas gwithyas-delergh.

¹³Otta, ow gwas a wra siweni, ughelhes vydh ha drehevys yn-bann, hag ev a vydh fest ughel.

¹⁴Par dell o lies hag a gemmeras skruth a'y wovis — mar dhifasys dell o y semlans, dres semlans gour, ha'y furv dres furv mebyon den —

¹⁵yndella marth a's tevydh lies kenedhel;[57] myghternedh a dhege aga ganow a'y wovis, rag an pyth na via leverys dhedha, henna i a wel, ha'n pyth na glewsons, henna i a breder.