Read Kernewek Ysay 54 Bible Online

Ysay 54 - Kernewek bible

Ysay 54

¹Kan yn lowen, A anvap na omdhuk; kri gans joy ha garm, ty neb na veu yn lavur! Rag mebyon an venyn anvap a vydh moy ages mebyon an benyn may ma dhedhi gour, yn-medh an ARLOEDH.

²Ledanha tyller dha dylda, ha bedhes kroglennow dha annedhow ystynnys; na spar; hirha dha gerdyn, ha krevha dha ebilyer.

³Rag ty a omles a-dhyghow hag a-gledh, ha'th has a erit an kenedhlow, hag a wra dhe'n sitys ynyal bos annedhys.

⁴Na borth own, rag ny' fydh sham, na vydh digolonnek, rag ny berthydh mewl; rag ty a ankev disenor dha yowynkneth, ha ny berthydh kov a vewl dha wedhowses na fella.

⁵Rag dha Wrier yw dha wour pries, ARLOEDH an luyow yw y hanow; ha'n Sans a Ysrael yw dha Dhasprenyas, Duw an norvys oll y'n henwir.

⁶Rag an ARLOEDH re'th helwis, avel gwreg forsakys ha grevys yn spyrys, avel gwreg yowynkneth gour, pan yw hi tewlys dhe-ves, yn-medh dha Dhuw.

⁷Unn pols byghan my a'th forsakys, mes gans truedh meur my a'th kuntell.

⁸Yn liv a gonnar my a gudhas ow fas dhiworthis pols, mes gans tregeredh heb diwedh my a gemmer truedh ahanas, yn-medh an ARLOEDH, dha Dhasprenyas.

⁹Hemm yw avel dydhyow Noy dhymmo vy, pan des vy byttydh na ella dowrow Noy war an norvys arta; yndella my re dos na borthav sorr orthis, ha na'th keredhav.

¹⁰Rag kyn fo an menydhyow removyes, ha'n breow kemmerys dhe-ves, ny vydh ow thregeredh removyes dhiworthis, na ny vydh ow hevambos a gres kemmerys dhe-ves, yn-medh an ARLOEDH, neb a gemmer truedh ahanas.

¹¹A dy druan, tewedhek, ha na veus konfortys, otta, my a sett dha veyn yn antimoni, ha'th fondya war selyow a saffir.

¹²My a vynn gwruthyl dha bynaklys a rubiow, dha yetys a veryl, hag oll dha fos a veyn drudh.

¹³Oll dha vebyon a vydh dyskys gans an ARLOEDH, ha meur vydh kres dha fleghes.

¹⁴Fondys vydhydh yn ewnder; pell vydhydh dhiworth arwask, rag ny wredh perthi own; ha dhiworth euth, rag ny wra ev dos nes dhis.

¹⁵Otta, mar kwra nebonan omsettyans, nyns yw dhiworthiv vy; keniver a omsett er dha bynn, koedha a wra a'th wovis.

¹⁶Otta, my yw neb re wrug an gov neb a hwyth an glowbrennyer yn flammow, hag a furv arv wiw rag y borpos; my re greatyas ynwedh an ravner dhe dhistrui.

¹⁷Ny wra siweni arv vyth yw furvys er dha bynn, ha ty a wra dampnya pub taves a sev orthis yn breus. Hemm yw ertach gwesyon an ARLOEDH, ha'ga ewnheans a dheu dhiworthiv, yn-medh an ARLOEDH.