Read Kernewek Ysay 55 Bible Online

Ysay 55 - Kernewek bible

Ysay 55

¹Ho, keniver a's teffo syghes, dewgh dhe'n dowrow; ha hwi na'gas beus arghans, dewgh, prenewgh ha dybrewgh! Dewgh, prenewgh gwin ha leth heb arghans ha heb pris.

²Prag y spenowgh arghans rag an pyth nag yw bara? ha'gas lavur rag an pyth na yll lenwel? Goslowewgh orthiv dour, ha dybrewgh an pyth yw da, ha'th enev a lowenha gans boes rych.

³Plegyewgh agas skovarn ha dewgh dhymm; goslowewgh rag may fewo agas enev. My a wra genowgh kevambos bys vykken, ow thregeredhow lel ambosys dhe Davydh.

⁴Otta, my a'n gwrug dustunier dhe'n poblow, rewler ha mester dhe boblow.

⁵Otta, ty a elow kenedhel na aswonnydh, ha kenedhel na aswonnydh a wra poenya dhis, drefenn an ARLOEDH dha Dhuw, ha'n Sans a Ysrael, rag ev re'th glorifias.

⁶Hwilewgh an ARLOEDH hedre vo dhe gavoes, gelwewgh warnodho hedre vo yn ogas;

⁷Gases an drogoberer y fordh, ha'n gour anwiryon y brederow; Dehweles dhe'n ARLOEDH rag may kemmerro truedh anodho, ha dh'agan Duw, rag ev a re gevyans yn hel.

⁸Rag nyns yw ow frederow vy dha brederow jy, na nyns yw dha fordhow jy, ow fordhow vy, yn-medh an ARLOEDH.

⁹Rag par dell yw an nevow ughella ages an norvys, yndella yth yw ow fordhow vy ughella ages agas fordhow hwi, ha'm prederow vy ages agas prederow hwi.

¹⁰Rag par dell goedh an glaw ha'n ergh dhiworth an nev, ha ny dhehwelons di bys may towrhahons an dor, ow kul dhodho doen yn-mes hag egina, ow ri has dhe'n gonador, ha bara dhe'n dybrer,

¹¹yndella y fydh ow ger hag a dheu dhiworth ow ganow; ny dhehwel dhymm gwag, mes ev a kowlwra ow bodh, hag a siwen y'n dra may hwrugavy y dhannvon ragdho.

¹²Rag yth ewgh yn-mes yn lowender, ha bos hembrenkys yn kres; an menydhyow ha'n breow a arm a-ragowgh gans joy, hag oll gwydh an gwel a dak diwleuv.

¹³Yn le an spern y hwra tevi merywenn, yn le an linas y hwra tevi akasia; ha henna a vydh kov dhe'n ARLOEDH, avel arwoedh heb fin, na vydh treghys dhe-ves.