Read Kernewek Ysay 57 Bible Online

Ysay 57 - Kernewek bible

Ysay 57

¹An den gwiryon a dhe goll, ha ny wra denvyth y settya war y golonn; gwer dregeredhus yw kemmerys dhe-ves, ha denvyth ny gonvedh. Rag an den gwiryon yw kemmerys dhe-ves dhiworth an terroes.

²Ev a enter bys yn kres. I a bowes war aga gweliow, ow kerdhes yn kompes.

³Mes dewgh nes omma, hwi vebyon koelyoges, has avoutrer ha hora!

⁴Piw y hwredh ges anodho? Piw yth igerydh dha vin er y bynn ha gorra dha daves mes? A nyns owgh hwi fleghes a gammweythres, has a wowegneth?

⁵Hwi a lesk gans lust yn mysk an derow, yn-dann bub gwydhenn las; ow ladha an fleghes y'n nansow, yn-dann savnow an karregi.

⁶Y'n meyn leven a nans yw dha rann; i, i yw an prenn tewlys ragos. Dhedha i ty re dhinewis offrynn diwes hag offrynna offrynn greun. A vydhav diserrys gans an re ma?

⁷War venydh ughel hag eksaltys ty re worras dha weli; ynwedh ty a yskynnas ena dhe offrynna sakrifis.

⁸A-dryv an daras ha'n postow-daras ty re worras dha arwoedh. Orth ow forsakya vy, ty a dhiskudhas dha weli, hag yskynna ynno ha'y igeri a-les; ty re wrug kevambos gansa ragos, ty a garas aga gweli, ha mires orth aga leuv.

⁹Ty a vyajyas dhe Molek gans oyl hag ynkressya dha velysethow. Ty a dhannvonas dha gannasow pell ha dannvon yn-nans bys yn ifarn.

¹⁰Skwithys veus gans oll dha fordhow, hwath ny leversys, ‘Euver yw!’ Ty a gavas nerth nowydh rag dha leuv, rakhenna nyns esta skwith.

¹¹Piw re berthsys own ha dout anodho, may leversys gow, ha na berthsys kov ahanav na worra hemma y'th kolonn? A nyns yw rag my dhe dewi a hirneth, ytho ny berthydh own ahanav?

¹²My a dhiskler dha ewnder ha'th oberow, ha ny vydhons dhe les dhis.

¹³Pan griydh rag gweres, gwres dha guntellow a idolys dha sawya! An gwyns a's dheg i oll dhe-ves, hag anall a's hwyth dhe-ves. Mes neb a hwila skovva ynnov vy a bew an tir, hag erita ow menydh sans.

¹⁴Y leverir, ‘Drehevewgh, drehevewgh, pareusiwgh fordh! Kemmerewgh yn-mes an lett dhiworth fordh ow fobel.’

¹⁵Rag yndellma y lever an ughel hag eksaltys neb a drig trank heb worfenn, ha sans yw y hanow: Trigys esov yn tyller ughel ha sans, hag ynwedh gans an den yw keudhesik hag isel y spyrys, dhe wul dhe spyrys an re uvel dasvewa ha dhe wul dhe golonn a'n re brewys dasvewa.

¹⁶Rag ny wrav vy kuhudha bys vykken, na vos serrys bynitha, rag ena spyrys den a wannsa a-ragov, ha'n anall a wrug vy.

¹⁷My a sorras orth anewnder y govaytis; my a'n gweskis, my a gudhas ow fas hag a veu serrys; mes ev a gerdhi dislen yn fordh y golonn y honan.

¹⁸My re welas y fordhow, mes my a'n yaghha; my a'n hembronk hag attyli konfort dhodho,

¹⁹ow formya an frut a hebaska[59] war dhiwweus an gynoryon. Kres, kres dhodho ev neb yw ogas, ha dhodho ev neb yw pell, yn-medh an ARLOEDH; ha my a'n yaghha.

²⁰Mes an debeles yw avel mor ow hwythfia, rag ny yll bos kosel, ha'y dhowrow a dewl yn-bann leys ha stag.

²¹Nyns eus kres, yn-medh ow Duw, rag an debeles.