Read Kernewek Ysay 59 Bible Online

Ysay 59 - Kernewek bible

Ysay 59

¹Awotta, nyns yw leuv an ARLOEDH re verr dhe sawya, ha nyns yw y skovarn re boes dhe glewes.

²Mes agas kammweythresow re wrug diberth yntra hwi ha'gas Duw, ha'gas peghosow re gudhas y fas ragowgh, ma na wra ev klewes.

³Rag agas diwleuv yw defolys gans goes, ha'gas bysies gans anewnder. Agas diwweus re gewsis gow, ha'gas taves re dhiskleryas sherewynsi.

⁴Denvyth ny elow rag ewnder; denvyth ny bled y gen gans onester. I a drest yn gwakter ha kewsel euveredh; i a gonsev anken ha dineythi droktra.

⁵Gori oyow nader a wrons, ha gwias gwiasow kevnis; neb a dheber aga oyow a verow, hag oy, mars yw brewys, a dhre nader yn-mes.

⁶Ny yll aga gwiasow bos dillas, ha ny omgwethons gans aga oberow; aga oberow yw oberow a anewnder, hag yma gwriansow a freudh yn aga diwleuv.

⁷Aga threys a boen dhe dhrog, hag i a fysk dhe dhinewi goes ankablus. Aga frederow yw frederow a anewnder; yma freudh ha kollva yn aga fordhow.

⁸Ny aswonnons an fordh a gres, ha nyns eus ewnder yn aga olow. I re wrug aga hynsyow kamm; neb a gerdh ynna ny aswonn kres.

⁹Rakhenna ewnder yw pell dhiworthyn, hag ny wra ewnder drehedhes dhyn. Ni a worta golow, hag otta tewolgow! Ni a worta golewder, mes ni a gerdh y'n tewlder.

¹⁰Palvala a wren war fos avel an dhellyon, ha ni a balval avel an re heb dewlagas. Ni a drebuch yn hanter-dydh kepar hag yn tewlwolow; yn mysk an re grev, yth on ni avel an re varow.

¹¹Ni oll a romm avel orses, ha kyni avel kelemmi. Ni a worta gwirvreus mes nyns eus; ni a worta selwyans mes pell yw ahanan.

¹²Ytho agan treuspassow yw lies a-ragos, ha'gan peghosow a dheg dustuni er agan pynn. Rag yma agan treuspassow genen, ha ni a aswonn agan drogoberow:

¹³rebellyans ha toell erbynn an ARLOEDH, treylya war-dhelergh dhiworth siwya agan Duw, kewsel arwask ha rebellyans, konsevya ha kewsel y'n golonn geryow gow.

¹⁴Gwirvreus yw treylys war-dhelergh, hag ewnder a sev a-bell; rag gwirder re drebuchyas y'n stret, ha ny yll ewnhynseth entra.

¹⁵Gwirder a fyll, ha neb a dreyl dhiworth drog yw kemmerys avel preydh. An ARLOEDH a welas hag a veu displesys drefenn na veu gwirvreus.

¹⁶Ev a welas na veu denvyth, hag ev a'n jevo marth na veu denvyth dhe vos mayn; rakhenna y vregh a wrug selwyans ragdho, ha'y ewnder a'n sostenas.

¹⁷Ev a wiskas ewnder avel hoberjon, ha basnett a selwyans war y benn; ev a wiskas dillas dial rag gwisk, hag omvaylya yn diwysykter avel mantell.

¹⁸Herwydh aga gwriansow, yndella ev a attal; sorr dh'y erbynnoryon, attal dh'y eskerens; ev a re attal dhe'n ynysow.

¹⁹Ytho i a berth own a hanow an ARLOEDH a'n howlsedhes, hag a'n howldrevel i a berth own a'y glori. Pan dheu envi avel liv, ena spyrys an ARLOEDH a'n fes.

²⁰Ev a dheu dhe Sion avel Dasprenyas, ha dhe'n re a dreyl dhiworth rebellyans yn Yakob, yn-medh an ARLOEDH.

²¹Ha hemm yw ow hevambos a wrav gansa, yn-medh an ARLOEDH: ow Spyrys usi warnas ha'm geryow re worris yn dha anow ny dhiberth a'th anow nag a anow dha has, nag a anow has dha has, yn-medh an ARLOEDH, alemma rag ha bys vykken.