Read Kernewek Ysay 65 Bible Online

Ysay 65 - Kernewek bible

Ysay 65

¹My o hwilys gans an re na wovynnsons, kevys gans an re na'm hwilsons. My a leveris, ‘Awottavy, awottavy’, dhe genedhel nag esa ow gelwel war ow hanow.

²My re lesas ow diwla oll an jydh dhe bobel benn-kales usi ow kerdhes y'n fordh nag yw da, ow siwya aga thybyansow aga honan;

³pobel usi orth ow frovokya dhe sorr dhe'm fas heb hedhi, usi prest ow sakrifia y'n lowarthyow hag ow leski offrynnow war alteryow brykkys;

⁴usi owth esedha yn mysk an bedhow, hag ow koelya dres nos yn tylleryow kevrin; usi ow tybri kig mogh, hag yma kowl avlan yn aga lestri.

⁵Yn-medhons, ‘Avod, na dheus nes dhymm, rag yth ov vy re sans ragos.’ An re ma yw mog y'm dewfrik, tan ow leski oll an jydh.

⁶Ottava skrifys a-ragov: Ny dawav, mes devri my a attal; my a attal yn aga askra

⁷aga[70] hammweythresow ha kammweythresow aga[71] thasow war-barth, yn-medh an ARLOEDH. Rag i dhe leski offrynnow war an menydhyow, ha'm skornya war an bronnow, my a wra musura yn aga barrlenn an attal a'ga gweythresow kyns.

⁸Yndellma y lever an ARLOEDH: Dell yw an sugen hwath kevys yn bagas a rappys, ha den a lever, ‘Na wra y dhistrui, rag yma bennath ynno’, yn kettella my a wra a-barth ow servysi, heb distrui peub oll.

⁹My a dhre has yn-mes a Yakob, hag yn-mes a Yuda nebonan dhe erita ow menydhyow, hag ow re dhewisys a's erit, ha'm servysi a drig ena.

¹⁰Sharon a vydh peurva rag deves, ha nans Aghor powesva rag flokkys, rag ow fobel neb a'm hwila.

¹¹Mes hwi neb a forsak an ARLOEDH, hag ankevi ow menydh sans, ha pareusi moes rag Fortun ha lenwel bollow a win kemmyskys rag Tenkys;

¹²My a wra agas destna rag an kledha, ha hwi oll a omblek dhe'n ladhva; rag my a'gas gelwis, mes ny worthybsowgh, my a gewsis mes ny glewsowgh. Hwi a wrug drog a-wel dhymm ha dewis an dra na veu plegadow dhymm.

¹³Rakhenna yndellma y lever an Arloedh DUW, Otta, ow servysi a dheber mes hwi a'gas bydh nown; otta, ow servysi a yv mes hwi a'gas bydh syghes; otta, ow servysi a lowenha mes hwi a gemmer meth.

¹⁴Otta, ow servysi a gan gans lowender kolonn, mes hwi a gri yn angoes a'gas kolonn, hag oulya, trogh an spyrys.

¹⁵Hwi a as agas hanow avel molleth dhe'm re dhewisys; ha'n Arloedh DUW a'th ladh; mes ev a elow y servysi gans ken hanow.

¹⁶Piwpynag a vo bennigys y'n norvys a vydh bennigys y'n Duw a wirder; ha piwpynag a wrello ti y'n norvys a de re'n Duw a wirder; rag ankevys yw an kynsa troblow, ha kudhys dhiworth ow dewlagas.

¹⁷Rag awottavy ow kreatya nevow nowydh ha nor nowydh; ny vydh kovhes an kynsa, nag entra y'n brys.

¹⁸Mes lowenhewgh ha bedhewgh heudhik bys vykken y'n pyth a wrav y greatya; rag awottavy ow kreatya Yerusalem dhe vos joy, ha'y fobel heudhder.

¹⁹My a lowenha yn Yerusalem ha bos heudhik y'm pobel; ny vydh klewys son oelva ynni, na son kri rag gweres na fella.

²⁰Ny vydh ena na fella baban a vew nebes dydhyow, na ny vydh den koth na vew oll y dydhyow; rag neb a verow kans penn-bloedh a vydh synsys avel maw, ha neb na dhrehedh dhe gans a vydh synsys avel mollethys.

²¹I a dhrehav chiow, ha triga ynna; i a blans gwinlannow, ha dybri aga frut.

²²Ny dhrehevons, hag arall a drig ena, ny blansons, hag arall a dheber. Rag dydhyow ow fobel a vydh avel dydhyow gwydhenn, ha'm re dhewisys a wel ober aga diwla ow toen frut termyn hir.

²³Ny lavuryons yn euver, na dhineythi fleghes dhe euth; rag i a vydh has bennigys gans an ARLOEDH, ha'ga henedh gansa.

²⁴Kyns i dhe elwel, my a worthyp; aga klewes, hag i hwath ow kewsel.

²⁵Bleydh hag oen a beur war-barth, ha lew avel ojyon a dheber kala', mes doust a vydh boes rag sarf. Ny wrons dregynn na distrui yn oll ow menydh sans, yn-medh an ARLOEDH.