Read Kernewek Levitikus 10 Bible Online

Levitikus 10 - Kernewek bible

Levitikus 10

¹Ena Nadab hag Abihu, mebyon Aron, a gemmeras, pubonan, y ynkyslester ha gorra tan ynno ha settya ynkys warnodho hag offrynna tan astranj[4] dherag an ARLOEDH, na wrug ev erghi dhedha.

²Ha tan eth yn-mes dhiworth an ARLOEDH ha'ga howlleski, hag i a verwis dherag an ARLOEDH.

³Ena yn-medh Moyses dhe Aron, ‘Hemm yw an pyth a gewsis an ARLOEDH anodho, ow leverel, “My a vydh sanshes der an re a dheu nes dhymm, ha my a vydh glorifiys dherag oll an bobel.” ’ Hag Aron a dewis.

⁴Ha Moyses a elwis Mishael hag Elsafan, mebyon Uzziel, ewnter Aron, ha leverel dhedha, ‘Dewgh nes, degewgh agas breder a-dhiworth an tyller sans, yn-mes a'n kamp.’

⁵Ytho, i a dheuth nes ha'ga doen, gwiskys yn aga fowsyow, yn-mes a'n kamp, dell leveris Moyses.

⁶Hag yn-medh Moyses dhe Aron ha dhe Eleazar ha dhe Ithamar y vebyon, ‘Na esiwgh gols agas pennow dhe gregi lows, na skwardya agas dillas, ma na wryllowgh hwi merwel, ha na dheffo sorr war oll an kuntelles, mes gesiwgh agas breder, chi dien Ysrael, dhe oela drefenn an loskvann re wrug an ARLOEDH.

⁷Ha ny wrewgh hwi mos yn-mes dhiworth daras tylda an kuntelles, ma na verwowgh hwi; rag yma oyl untyans an ARLOEDH warnowgh.’ Hag i a wrug war-lergh ger Moyses.

⁸Ha'n ARLOEDH a gewsis orth Aron, ow leverel,

⁹‘Na wrewgh hwi, naneyl ty na'th vebyon, eva gwin na korev pan entrowgh yn tylda an kuntelles, ma na verwowgh. Ordenans vydh bys vykken der agas henedhow,

¹⁰dhe dhissernya ynter an pyth yw sans ha'n pyth yw ansans, hag ynter an pyth yw avlan ha'n pyth yw glan;

¹¹ha dhe dhyski dhe vebyon Ysrael oll an ordenansow a leveris an ARLOEDH dhedha dre leuv Moyses.’

¹²Ha Moyses a leveris dhe Aron hag Eleazar hag Ithamar, y vebyon a veu gesys: Kemmerewgh an offrynn greun yw gesys a'n offrynnow dhe'n ARLOEDH dre dan ha'y dhybri heb goell ryb an alter, rag an moyha sans yw.

¹³Ha hwi a'n deber yn tyller sans rag yth yw dha rann ha rann dha vebyon a'n sakrifisow dre dan dhe'n ARLOEDH, rag yndella erghys yw dhymmo.

¹⁴Ha hwi a dheber an vronn wevys ha mordhos an offrynn drehevys yn tyller glan, ty ha'th vebyon ha'th vyrghes genes, rag yth yns i dha rann jy ha rann dha vebyon, res dhiworth sakrifisow offrynnow kres mebyon Ysrael.

¹⁵I a dhre mordhos an offrynn drehevys ha'n vronn wevys gans an offrynnow a vlonek gwrys dre dan, dhe wevya rag offrynn gwevys dherag an ARLOEDH, hag y fydh dhiso jy ha dhe'th vebyon genes avel ordenans bys vykken, dell erghis an ARLOEDH.

¹⁶Ena Moyses a hwilas a-dro dhe vogh an offrynn pegh, hag otta, leskys veu, ha serrys veu gans Eleazar hag Ithamar, mebyon Aron o gesys, ow leverel,

¹⁷‘Prag na wrussowgh hwi dybri an offrynn pegh y'n tyller sans? rag yth yw an moyha sans, res dhywgh dhe berthi kammweyth an kuntelles ha gul dehwelyans ragdha dherag an ARLOEDH.

¹⁸Otta, ny veu an goes anodho dres a-ji dhe'n rann a-bervedh a'n tyller sans. Y koedhvia dhywgh y dhybri y'n tyller sans, dell erghis vy.’

¹⁹Yn-medh Aron dhe Moyses. ‘Otta, hedhyw i re offrynnas aga offrynn pegh ha'ga offrynn leskys dherag an ARLOEDH; mes taklow avel henna re hwarva dhymmo vy. Mar kwrellen dybri an offrynn pegh hedhyw, a via ev kemmeradow yn golok an ARLOEDH?’

²⁰Pan glewas Moyses hemma, ev a veu pes da.