Read Kernewek Levitikus 11 Bible Online

Levitikus 11 - Kernewek bible

Levitikus 11

¹An ARLOEDH a gewsis orth Moyses hag Aron, ow leverel dhedha,

²Kewsiwgh orth mebyon Ysrael, ow leverel: An re ma yw an kreaturs a wrewgh hwi aga dybri yn mysk oll an bestes war an nor:

³pypynag yw folsys y garn hag a dhaskni, yn mysk an bestes, henna hwi a dheber.

⁴Byttegyns ny dhebrowgh an re ma a'n re a dhaskni, po a's teves folsys aga harn: an kowrvargh rag ev a dhaskni mes nyns yw folsys y garn; avlan dhywgh yw ev.

⁵Ha'n konin, rag ev a dhaskni mes nyns eus karn folsys dhodho. Avlan dhywgh yw ev.

⁶Ha'n skovarnek rag ev a dhaskni mes nyns eus karn folsys dhodho; avlan dhywgh yw ev.

⁷Ha'n mogh, kynth eus karn folsys dhodho, ny dhaskni; avlan dhywgh yw ev.

⁸Ny wrewgh hwi dybri aga hig, na tochya aga horf; avlan dhywgh yns i.

⁹An re ma hwi a dheber, a bup-tra eus y'n dowrow, pypynag a'n jeffo eskelli-pysk po skans, y'n dowrow, y'n moryow hag yn avonyow. Hwi a dheber an re ma.

¹⁰Hag oll an re nag eus dhedha nag eskelli-pysk na skans y'n moryow hag y'n avonyow, pypynag a hes y'n dowrow, ha pup-tra bew y'n dowrow: pyth kasadow yns dhywgh.

¹¹I a vydh pyth kasadow dhywgh; ny wrewgh hwi dybri a'ga hig, ha hwi a syns aga horfow dhe vos pyth kasadow.

¹²Pypynag na'n jeffo eskelli-pysk na skans y'n dowrow, henn yw pyth kasadow dhywgh.

¹³Ha'n re ma a vydh pyth kasadow dhywgh yn mysk an ydhyn. Ny vydhons dybrys; pyth kasadow yns i: an er, an vultur barvus hag er an mor,

¹⁴an skowl rudh, ha'n skowles du a bub eghenn,

¹⁵pub marghvran a bub eghenn,

¹⁶an strus, hok an nos, an woelann, ha falghunes a bub eghenn,

¹⁷an oula byghan, an vorvran, ha'n ibis,

¹⁸an oula kornek, oula an difeythtir, ha'n vultur,

¹⁹an hwibon, kerghydhyon a bub eghenn, an houpou, ha'n ughsommys.

²⁰Pup-tra owth hesya hag ow nija hag a bedrevan war beswar troes yw pyth kasadow dhywgh.

²¹Byttegyns, hwi a yll dybri pup-tra owth hesya hag ow nija hag a bedrevan war beswar troes, a's teves garrow a-ugh hy threys may hyll lemmel war an dor.

²²A'n re ma, hwi a yll dybri: an lokust a bub eghenn, ha'n lokust blogh a bub eghenn, ha'n gryll a bub eghenn, ha'n kulyek-reden a bub eghenn.

²³Mes pup-tra arall owth hesya hag ow nija hag a bedrevan, ha dhodho peswar troes, yw pyth kasadow dhywgh.

²⁴Ha der an re ma hwi a vydh avlan: neb a docchyo korf onan anedha a vydh avlan bys y'n gorthugher.

²⁵Ha nebonan a dhokko korf onan anedha a wra golghi y dhillas ha bos avlan bys y'n gorthugher.

²⁶Korf pub best mayth yw rynnys y garn, mes nag yw y garn folsys yn tien, ha na dhaskni, yw avlan dhywgh. Pubonan a'n toch a vydh avlan.

²⁷Ha pypynag a gertho war y bawyow, yn mysk pub best a gerdh war beswar troes, avlan yns dhywgh. Piwpynag a'n tocchyo aga horf a vydh avlan bys y'n gorthugher.

²⁸Ha neb a dhokko an korf anedha a wolgh y dhillas ha bos avlan bys y'n gorthugher. Avlan yns dhywgh.

²⁹An re ma yw avlan dhywgh hwi yn mysk kreaturs owth hesya, a hes war an dor: an wodh, ha'n logosenn ha'n bedresyf veur a bub eghenn,

³⁰ha'n gekko ha'n bedresyf vrygh, ha'n bedrevan, ha'n bedrevan dewes ha'n kameleon.

³¹Avlan dhywgh yw an re ma yn mysk oll an re a hes; piwpynag a's tocchyo hag i marow a vydh avlan bys y'n gorthugher.

³²Ha pypynag may koedh nebonan anedha warnodho hag ev marow, a vydh avlan, kyn fo lester prenn, po dillas po kneus po sagh. Py lester pynag a vo mayth yw ober gwrys ynno a dal bos gorrys yn dowr hag y fydh avlan bys y'n gorthugher. Ena y fydh glan.

³³Ha pub lester a bri may koedh ynno neppyth anedha, a vydh avlan. Pypynag a vo ynno a vydh avlan, ha hwi a'n terr.

³⁴Pub boes a yll bos dybrys, ha warnodho dowr avlan a goedh a vydh avlan, ha pub lin a vo evys dhiworth lester a'n par ma a vydh avlan.

³⁵Ha pup-tra, koedhys warnedhi aga horfow, a vydh avlan, forn po fornigell kyn fo. Hi a vydh terrys, rag avlan yw, hag avlan vydh dhywgh.

³⁶Byttegyns, fenten po puth mayth yw dowr kreunys ynno a vydh glan, mes an pyth a doch aga horfow a vydh avlan.

³⁷Ha mar koedh rann a'ga horfow war has dhe vos hesys, glan yw;

³⁸mes mar pydh dowr gorrys war an has ha mar koedh rann a'ga horf warnodho, avlan yw dhywgh.

³⁹Ha mar merow neb best a yllowgh dybri, neb a dheppro rann a'y gorf a vydh avlan bys y'n gorthugher.

⁴⁰Ha neb a dheppro an korf a wolgh y dhillas ha bos avlan bys y'n gorthugher; ha neb a dhokko y gorf a wolgh y dhillas ha bos avlan bys y'n gorthugher.

⁴¹Ha pub kreatur a hes war an dor yw pyth kasadow. Ny vydh dybrys.

⁴²Pypynag a wayo a-dro war y dorr, ha pypynag a wayo war beswar troes po mayth eus dhodho treys pals, oll an kreaturs a hes war an dor: ny wrewgh hwi dybri an re ma, rag pyth kasadow yns i.

⁴³Ny wrewgh hwi agas honan dhe vos pyth kasadow gans kreatur vyth a hes; na ny wrewgh hwi agas honan avlan gansa, ma na vowgh hwi defolys dredha.

⁴⁴Rag my yw an ARLOEDH agas Duw. Ytho omsanshewgh, ha bedhewgh sans, rag sans ov vy. Ny wrewgh hwi omdhefola gans kreatur vytholl a hes, ow kreupya war an dor.

⁴⁵Rag my yw an ARLOEDH a'gas dros yn-mes a bow Ejyp, dhe vos agas Duw; ytho bedhewgh sans, rag sans ov vy.

⁴⁶Hemm yw lagha an bestes ha'n ydhyn ha pub kreatur bew a wayo y'n dowrow ha pub kreatur a hes war an dor,

⁴⁷dhe dhissernya ynter an avlan ha'n glan, hag ynter an kreatur a yll bos dybrys ha'n kreatur na yll bos dybrys.