Read Kernewek Levitikus 12 Bible Online

Levitikus 12 - Kernewek bible

Levitikus 12

¹An ARLOEDH a gewsis orth Moyses, ow leverel:

²Kows orth mebyon Ysrael, ow leverel: Mar kwra benyn konsevya has ha dineythi flogh gorow, hi a vydh avlan seyth dydh; kepar hag yn dydhyow hy amseryow misyek y fydh hi avlan.

³Hag y'n ethves dydh y fydh trodreghys kig y gudhgenn.

⁴Ha hi a wra pesya trydhek dydh warn ugens yn goes hy glanheans. Ny doch hi travyth sans na dos a-berth y'n sentri erna vo kowlwrys dydhyow hy glanheans.

⁵Mes mar kwra hi dineythi flogh benow, avlan vydh diw seythun kepar hag yn hy amseryow misyek, ha hi a bes hwegh dydh ha tri-ugens yn goes hy glanheans.

⁶Ha pan vo kowlwrys dydhyow hy glanheans rag mab po rag myrgh, hi a dhre oen unn bloedh rag offrynn leskys, ha kolomm yowynk po turenn rag offrynn pegh bys yn daras tylda an kuntelles, dhe'n oferyas.

⁷Ev a's offrynn dherag an ARLOEDH ha gul dehwelyans rygdhi, ha hi a vydh glanhes a fenten hy goes. Hemm yw an lagha rygdhi hi neb re dhineythis gorreydh po benynreydh.

⁸Ha mar nyns eus yn hy leuv pygans lowr rag oen, hi a dhre diw durenn po diw golomm yowynk, an eyl rag offrynn leskys ha'y ben rag offrynn pegh, ha'n oferyas a wra dehwelyans rygdhi, ha hi a vydh glan.