Read Kernewek Levitikus 13 Bible Online

Levitikus 13 - Kernewek bible

Levitikus 13

¹An ARLOEDH a gewsis orth Moyses hag Aron, ow leverel,

²Pan eus dhe dhen bothenn po krammenn po namm gwynn war gneus y gig, kepar ha'n pla a lovryjyon, ev a vydh dres dhe Aron an oferyas po dhe onan a'y vebyon, an oferysi,

³ha'n oferyas a hwither an dises war gneus an kig; ha mars yw gyllys gwynn an blew y'n pla, ha mar kyllir gweles bos an pla downa es kneus an kig, pla lovryjyon yw, ha'n oferyas a'n hwither ha desta y vos avlan.

⁴Mars yw an namm yn kneus y gig gwynn ha mar kyllir gweles nag yw downa es an kneus, ha nyns yw an blew gyllys gwynn, keas a wra an oferyas an den plagys seyth dydh,

⁵ha'n seythves dydh an oferyas a'n hwither, ha mar kwel an pla dhe vos heb chanj, ha nag yw an pla omlesys y'n kneus, an oferyas a'n ke seyth dydh moy;

⁶Ha'n oferyas a'n hwither arta an seythves dydh, ha mars yw gyllys tewal an pla, ha ny wrug an pla lesa y'n kig, an oferyas a dhest y vos glan. Nyns yw marnas krammenn, hag ev a wolgh y dhillas ha bos glan.

⁷Mes mars omles an grammenn y'n kneus wosa y vos gwelys gans an oferyas rag y lanheans, ev a vydh gwelys arta gans an oferyas.

⁸An oferyas a'n hwither, ha mars yw an grammenn lesys y'n kneus, an oferyas a dhest y vos avlan. Lovryjyon yw.

⁹Pan eus pla lovryjyon yn den, ev a vydh dres dhe'n oferyas,

¹⁰Ha'n oferyas a'n hwither, ha mars yw bothenn wynn y'n kneus, a janjyas an blew dhe wynn, ha mars eus kig bew y'n vothenn,

¹¹lovryjyon koth yw yn kneus y gig, ha'n oferyas a dhest y vos avlan, ha ny wra ev y geas, rag avlan yw.

¹²Ha mars omles an lovryjyon y'n kneus ha gorheri yn tien kneus an den plagys, a'y benn bys yn y droes, plepynag may firro an oferyas,

¹³an oferyas a hwither, ha mar kwrug an lovryjyon kudha oll y gig, ev a dhest an den gans an pla dhe vos glan; oll yw chanjys dhe wynn. Glan yw.

¹⁴Mes pan omdhiskwa kig bew, ev a vydh avlan.

¹⁵Ha'n oferyas a hwither an kig bew ha desta ev dhe vos avlan. Avlan yw an kig heb kneus. Lovryjyon yw.

¹⁶Mar treyl an kig bew arta ha chanjya dhe wynn, ev a dheu arta dhe'n oferyas,

¹⁷ha'n oferyas a'n hwither, ha mars yw an pla chanjys dhe wynn, an oferyas a dhest y vos glan neb a'n jeves an pla. Glan yw.

¹⁸Pan eus gwennenn y'n kneus re beu yaghhes,

¹⁹ha bothenn wynn po namm gwynnrudh yn tyller an wennenn, y fydh diskwedhys dhe'n oferyas.

²⁰An oferyas a hwither, ha mar hevel y vos downa y'n kig es an kneus ha bos an blew ynno gyllys gwynn, an oferyas a dhest y vos avlan. Pla lovryjyon yw terrys yn-mes a'n wennenn.

²¹Mes mar hwither an oferyas ha nyns eus blew gwynn ynno ha nyns yw downa es an kneus, mes nebes tewal, an oferyas a wra y geas seyth dydh;

²²Ha mars omles meur y'n kneus, an oferyas a dhest y vos avlan. Pla yw.

²³Mes mar korta an namm gwynn yn y le heb omlesa, kreythenn an wennenn yw, ha'n oferyas a dhest y vos glan.

²⁴Po pan vo kneus an kig leskys gans tan, ha kig bew an losk a dheu ha bos namm gwynnrudh po gwynn,

²⁵an oferyas a'n hwither, ha mars yw gyllys gwynn an blew y'n namm, hag yth hevel bos downa es an kneus, lovryjyon yw, terrys yn-mes a'n kig leskys. Ytho an oferyas a dhest y vos avlan. Pla lovryjyon yw.

²⁶Mes mara'n hwither an oferyas ha nyns eus blew gwynn y'n namm, ha nyns yw downa es an kneus arall, mes nebes diliw, an oferyas a wra y geas seyth dydh,

²⁷ha'n oferyas a'n hwither an seythves dydh; mars yw omlesys meur y'n kneus, an oferyas a dhest y vos avlan. Pla lovryjyon yw.

²⁸Mes mar korta an namm yn y le heb omlesa y'n kneus, mes bos nebes diliw, bothenn an losk yw, ha'n oferyas a dhest y vos glan, rag kreythenn a'n losk yw.

²⁹Gour po benyn, mars eus dhedha pla y'n penn po an varv,

³⁰an oferyas a hwither an pla, ha mar hevel bos downa es an kneus ha mars eus ynno blewenn velyn-rudh tanow, an oferyas a dhest y vos avlan. Troskenn yw, lovryjyon war an penn po an varv.

³¹Ha mar hwither an oferyas pla an droskenn ha ny hevel bos downa es an kneus ha nyns eus ynno blew du, an oferyas a ge an den plagys gans an droskenn seyth dydh.

³²Ha'n seythves dydh an oferyas a hwither an pla ha mar nyns yw an droskenn omlesys ha nyns eus ynno blew melyn, ha ny hevel bos an droskenn downa es an kneus,

³³ev a omdhivarv, mes ny dhivarv an droskenn, ha'n oferyas a ge neb a'n jeves an droskenn seyth dydh moy;

³⁴ha'n seythves dydh an oferyas a hwither an droskenn ha mar ny omlesas an droskenn y'n kneus, ha ny hevel bos downa es an kneus, an oferyas a dhest y vos glan, hag ev a wolgh y dhillas ha bos glan.

³⁵Mes mar omles an droskenn yn feur y'n kneus wosa y vos glanhes,

³⁶an oferyas a'n hwither, ha mars yw an droskenn omlesys y'n kneus, ny hwila an oferyas blew melyn. Avlan yw.

³⁷Mes mar hevel dhodho na wrug an droskenn chanjya ha mars eus blew du tevys ynno, yaghhes yw an droskenn. Glan yw; ha'n oferyas a dhest y vos glan.

³⁸Mars eus dhe wour po benyn nammow war gneus aga hig, nammow gwynn

³⁹an oferyas a hwither, ha mars yw an nammow diliw, namm brygh dhidhregynnus usi ow tevi y'n kneus. Glan yw.

⁴⁰Gour, koedhys y wols dhiworth y benn, yw blogh, mes glan yw.

⁴¹Ha mars yw y wols koedhys dhiworth an tu a-rag a'y benn, blogh yw y dal, mes glan yw.

⁴²Mes mars eus gwennenn wynn-rudh war y benn blogh po y dal vlogh, lovryjyon yw terrys yn-mes a'y benn blogh po y dal vlogh.

⁴³An oferyas a'n hwither, ha mars yw gwynnrudh bothenn an wennenn war y benn blogh po y dal vlogh, gans an semlans a lovryjyon war gneus an kig,

⁴⁴gour lovrek yw. Avlan yw. An oferyas a dhest y vos avlan dres eghenn. Yma y bla war y benn.

⁴⁵Ha'n klavorek hag ynno an pla, y dhillas a vydh skwardys, ha gols y benn a vydh ow kregi lows, hag ev a gudh y vinvlew ha kria ‘Avlan! Avlan!’

⁴⁶Oll an dydhyow may ma an pla warnodho, y fydh avlan. Avlan yw; ev a drig y honan. Mes a'n kamp y fydh y drigva.

⁴⁷Dillasenn may ma ynni pla lovryjyon, dillasenn a wlan po dillasenn a lien kyn fo,

⁴⁸y'n steuv po y'n anwi, a lien po a wlan, yn ledher po neppyth gwrys a ledher,

⁴⁹ha mars yw gwyrdh po rudhik an pla y'n dillas po y'n ledher, y'n steuv po y'n anwi, po yn neppyth gwrys a gneus, pla lovryjyon yw, hag y fydh diskwedhys dhe'n oferyas.

⁵⁰Ha'n oferyas a hwither an pla, ha keas an dra may ma an pla warnodho seyth dydh;

⁵¹ena ev a hwither an pla an seythves dydh. Mars yw an pla omlesys y'n dillas, y'n steuv po y'n anwi, po y'n kneus po yn neppyth gwrys a ledher, lovryjyon plagus yw. Avlan yw.

⁵²Ytho ev a lesk an dillas, steuv po anwi, gwlan po lien, po neppyth a ledher, le may ma an pla, rag lovryjyon plagus yw. Y fydh leskys y'n tan.

⁵³Ha mar hwither an oferyas, ha ny wrug an pla omlesa y'n dillas, nag y'n steuv nag y'n anwi nag yn travyth gwrys a ledher,

⁵⁴an oferyas a ergh may fo golghys an dra may ma an pla warnodho, hag ev a'n ke seyth dydh moy.

⁵⁵Ha'n oferyas a hwither an pla wosa y vos golghys, ha mar ny wrug an pla chanjya y semlans ha ny wrug an pla omlesa, avlan yw. Ty a'n lesk y'n tan. Poder yw, war an keyn po war an tu a-rag kyn fo.

⁵⁶Ha mar hwither an oferyas ha mars yw an pla diliw wosa bos golghys, ev a'n skward yn-mes a'n dillas po yn-mes a'n kneus po yn-mes a'n steuv po a'n anwi,

⁵⁷ena mar omdhiskwa hwath y'n dillas, po y'n steuv po y'n anwi, po yn neppyth a ledher, pla owth omlesa yw; ty a lesk gans tan an dra may ma an pla ynno.

⁵⁸Ha'n dillas, po steuv po anwi, po pyth a ledher, a wredh y wolghi, mars yw an pla diberthys dhiworto, a vydh golghys an eyl torn, ha glan vydh.

⁵⁹Hemm yw an lagha rag an pla a lovryjyon yn dillas a wlan po lien, po y'n steuv po y'n anwi, po neppyth a ledher, dhe dhesta mars yw glan po avlan.