Read Kernewek Levitikus 15 Bible Online

Levitikus 15 - Kernewek bible

Levitikus 15

¹An ARLOEDH a gewsis orth Moyses hag Aron, ow leverel:

²Kewsiwgh orth mebyon Ysrael ha leverel dhedha, Pub gour mayth eus sygerans a'y gorf, avlan yw y sygerans.

³Ha hemm yw y avlander drefenn y sygerans: mar teu an sygerans a'y gorf, po mars yw y gorf stoppys a sygera, y avlander yw.

⁴Avlan yw pub gweli may hwrowedh warnodho neb a'n jeves an sygerans, ha pup-tra mayth esedh ev warnodho yw avlan.

⁵Ha piwpynag a docchyo y weli a wolgh y dhillas hag omvadhya yn dowr ha pesya avlan bys y'n gorthugher.

⁶Ha neb a esettho war neb tra mayth esedhas warnodho neb a'n jeves an sygerans a wolgh y dhillas hag omvadhya yn dowr, ha pesya avlan bys y'n gorthugher.

⁷Ha neb a docchyo an kig anodho ev neb a'n jeves an sygerans a wolgh y dhillas hag omvadhya yn dowr ha pesya avlan bys y'n gorthugher.

⁸Ha mar trew neb a'n jeves an sygerans war nebonan yw glan, ev a wolgh y dhillas hag omvadhya yn dowr ha pesya avlan bys y'n gorthugher.

⁹Pub diber a varghokko warnodho ev neb a'n jeves an sygerans a vydh avlan.

¹⁰Ha piwpynag a docchyo neppyth esa yn-danno a vydh avlan bys y'n gorthugher; hag ev neb a dheg an taklow na a wolgh y dhillas hag omvadhya yn dowr ha pesya avlan bys y'n gorthugher.

¹¹Ha piwpynag a wra ev neb a'n jeves an sygerans y dochya, ha ny wolghas y dhiwleuv yn dowr, a wolgh y dhillas, hag omvadhya yn dowr, ha pesya avlan bys y'n gorthugher.

¹²Ha lester a bri a veu tochys gans neb a'n jeves an sygerans a vydh terrys; ha pub lester a brenn a vydh golghys yn dowr.

¹³Ha pan vo ev neb a'n jeves sygerans glanhes a'y sygerans, ev a niver dh'y honan seyth dydh rag y lanheans, ha golghi y dhillas, ha badhya y gig yn dowr ow resek, hag ev a vydh glan.

¹⁴Ha'n ethves dydh ev a gemmer diw durenn po diw golomm yowynk ha dos dherag an ARLOEDH bys yn daras tylda an kuntelles ha'ga ri dhe'n oferyas.

¹⁵Ha'n oferyas a's offrynn, an eyl rag offrynn pegh ha'y ben rag offrynn leskys, ha'n oferyas a wra dehwelyans ragdho dherag an ARLOEDH rag y sygerans.

¹⁶Ha mars eus dyllans has dhe neb gour, ev a wolgh oll y gorf yn dowr, ha pesya avlan bys y'n gorthugher.

¹⁷Ha pub dillas ha pub kneus ha warnodho has, a vydh golghys gans dowr, ha pesya avlan bys y'n gorthugher.

¹⁸Ha mar krowedh gour gans benyn, hag y fydh dyllans has, i a omwolgh aga dew yn dowr ha pesya avlan bys y'n gorthugher.

¹⁹Benyn mars eus dhedhi dyllans goes a'y horf, hi a vydh diberthys seyth dydh, ha piwpynag a's tocchyo a vydh avlan bys y'n gorthugher.

²⁰Ha pup-tra may hwrowedh warnodho pan yw diberthys a vydh avlan; ha pup-tra mayth esedh warnodho a vydh avlan.

²¹Ha piwpynag a docchyo hy gweli a wolgh y dhillas hag omvadhya yn dowr, ha pesya avlan bys y'n gorthugher.

²²Ha piwpynag a docchyo neppyth mayth esedhas warnodho a wolgh y dhillas hag omvadhya yn dowr, ha pesya avlan bys y'n gorthugher.

²³Ha mars usi war hy gweli po neppyth mayth esedh warnodho, pan y'n toch, avlan vydh bys y'n gorthugher.

²⁴Ha mar krowedh neb gour gensi ha goes a'y amseryow a'n toch, avlan vydh seyth dydh; ha pub gweli may hwrowedh warnodho a vydh avlan.

²⁵Ha mars eus dhe venyn dyllans goes lies dydh yn-mes a dermyn hy amseryow, po mar pes an dyllans dres termyn hy amseryow, oll an dydhyow a'n dyllans avlan a vydh kepar ha dydhyow hy amseryow; hi a vydh avlan.

²⁶Pub gweli may hwrowedh warnodho dydhyow oll hy dyllans a vydh dhedhi kepar ha gweli hy amseryow; ha pypynag mayth esettho warnodho a vydh avlan, kepar hag yn avlander hy amseryow.

²⁷Ha piwpynag a docchyo an taklow na a vydh avlan, ha golghi y dhillas hag omvadhya yn dowr, ha pesya avlan bys y'n gorthugher.

²⁸Ha mars yw glanhes a'y dyllans hi a niver dhedhi seyth dydh, ha wosa henna hi a vydh glan.

²⁹Ha'n ethves dydh hi a gemmer diw durenn po diw golomm yowynk ha'ga dri dhe'n oferyas, dhe dharas tylda an kuntelles.

³⁰Ha'n oferyas a offrynn an eyl rag offrynn pegh ha'y ben rag offrynn leskys, ha'n oferyas a wra dehwelyans rygdhi dherag an ARLOEDH, rag dyllans hy avlander.

³¹Yndella hwi a dhiberth mebyon Ysrael dhiworth aga avlander, ma na varwons yn aga avlander drefenn defola ow thabernakel usi yn aga mysk.

³²Hemm yw an lagha rag neb a'n jeves sygerans, ha ragdho ev mayth eus dyllans has dhiworto, dredho mayth yw avlan;

³³ha rag an venyn yw klav drefenn hy amseryow; rag keniver a'n jeves sygerans, gorreydh po benynreydh, ha rag gour a wrowedh gans benyn avlan.