Read Kernewek Levitikus 2 Bible Online

Levitikus 2 - Kernewek bible

Levitikus 2

¹Ha pan vynn nebonan offrynna offrynn greun dhe'n ARLOEDH, y offrynn a vydh bleus fin hag ev a wra dinewi oyl warnodho ha gorra frankynkys warnodho.

²Hag ev a'n dre dhe vebyon Aron, an oferysi, hag ev a gemmer dornas a'y vleus fin ha'y oyl gans oll y frankynkys, ha'n oferyas a lesk rann govadh anodho war an alter, offrynn dre dan, sawer plegadow dhe'n ARLOEDH.

³Ha remenant an offrynn a vydh dhe Aron ha'y vebyon, tra an moyha sans a'n offrynnow dre dan dhe'n ARLOEDH.

⁴Ha mar tredh offrynn greun pebys y'n forn, y fydh ev tesennow rond a vara heb goell a vleus fin kemmyskys gans oyl, po tesennow tanow a vara heb goell urys gans oyl.

⁵Ha mars yw dha offrynn pebys war ven-pobas, ev a vydh a vleus fin heb goell, kemmyskys gans oyl.

⁶Ty a'n rann yn darnow ha dinewi oyl warnodho. Offrynn greun yw.

⁷Ha mars yw dha offrynn pebys yn padell-bobas, y fydh gwrys a vleus fin gans oyl.

⁸Ha ty a dhre an offrynn gwrys a'n taklow ma dhe'n ARLOEDH, ha pan vo dres dhe'n oferyas ev a'n dre dhe'n alter.

⁹Ha'n oferyas a gemmer rann govadh an offrynn greun ha'y leski war an alter, offrynn dre dan, sawer plegadow dhe'n ARLOEDH.

¹⁰Ha remenant an offrynn a vydh dhe Aron ha'y vebyon: tra an moyha sans a'n offrynnow gwrys dre dan dhe'n ARLOEDH.

¹¹Ny vydh offrynn vyth a wre'ta dri dhe'n ARLOEDH gwrys gans goell; rag ny wrewgh leski goell na mel vyth yn offrynn dre dan dhe'n ARLOEDH.

¹²Hwi a dhre offrynn a gynsa frut dhe'n ARLOEDH, mes ny vydhons i leskys war an alter avel sawer plegadow.

¹³Ha ty a wra salla oll dha offrynnow boes gans hoelan. Ny wre'ta gasa hoelan kevambos dha Dhuw dhe fyllel dhe'th offrynn greun; ty a brof hoelan gans oll dha offrynnow.

¹⁴Ha mar tredh offrynn greun a gynsa frut dhe'n ARLOEDH, ty a wra offrynna rag dha offrynn greun, rann a'th kynsa frut, pennow-ys glas, rostys ryb an tan, brunyon a ys nowydh.

¹⁵Ha ty a worr oyl warnodho, ha settya frankynkys warnodho; offrynn greun yw.

¹⁶Ha'n oferyas a lesk rann govadh a'y vrunyon hag a'y oyl gans oll y frankynkys; offrynn dre dan dhe'n ARLOEDH.