Read Kernewek Levitikus 20 Bible Online

Levitikus 20 - Kernewek bible

Levitikus 20

¹An ARLOEDH a gewsis orth Moyses, ow leverel:

²Ty a lever ynwedh dhe vebyon Ysrael, Piwpynag a vebyon Ysrael po a'n alyons usi trigys yn Ysrael a rollo re a'y fleghes dhe Molek, a vydh gorrys yn sur dhe'n mernans. Pobel an tir a wra y labydha gans meyn.

³Ha my a vynn settya ow fas erbynn an gour na ha'y dreghi dhe-ves a'y bobel, rag ev re ros a'y has dhe Molek dhe dhefola ow sentri ha disakra ow hanow sans.

⁴Ha mar mynn pobel an tir kudha aga lagasow rag an gour na yn neb fordh, hag ev ow ri y has dhe Molek, ha ny'n ladhons,

⁵my a vynn settya ow fas erbynn an gour na hag erbynn y deylu, ha'ga threghi dhe-ves dhiworth aga fobel, ev, hag oll an re usi ow mos ganso dhe horya gans Molek.

⁶Ha'n den a dreyl dhe nygromons ha dhe goelyogyon, ow mos dhe horya gansa, my a vynn settya ow fas erbynn an den na ha'y dreghi dhe-ves dhiworth y bobel.

⁷Ytho omsanshewgh, ha bedhewgh sans, rag an ARLOEDH agas Duw ov vy

⁸Ha hwi a syns ow ordenansow ha'ga gul. An ARLOEDH ov vy, neb a'gas sansha.

⁹Rag piwpynag a vollettho y das po y vamm a vydh gorrys dhe'n mernans yn sur. Ev re vollethis y das ha'y vamm. Y woes a vydh warnodho.

¹⁰Ha'n gour a wra avoutri gans gwreg gour arall, neb a wra avoutri gans gwreg y gentrevek, a vydh gorrys dhe'n mernans yn sur, ha'n avoutrer ha'n avoutres.

¹¹Ha'n gour a wrowedh gans gwreg y das re dhiskudhas noethedh y das, aga dew a vydh gorrys dhe'n mernans yn sur; aga goes a vydh warnedha i.

¹²Ha mar krowedh gour gans y wohydh, aga dew a vydh gorrys dhe'n mernans yn sur. Podrogeth re wrussons. Aga goes a vydh warnedha.

¹³Mar krowedh gour gans gorreydh dell wrowedh gans benynreydh, aga dew re wrug tra gasadow. I a vydh gorrys dhe'n mernans yn sur. Aga goes a vydh warnedha.

¹⁴Gour mar kemmer gwreg ha'y mamm ynwedh, tra vethus yw. I a vydh leskys gans tan, hag ev hag i, ma na vo avlander yn agas mysk.

¹⁵Ha mar krowedh gour gans best yn reydhel, yn sur ev a vydh gorrys dhe'n mernans; ha hwi a ladh an best.

¹⁶Mar teu benyn ogas dhe vest dhe wrowedha ganso, ty a ladh an venyn ha'n best ynwedh. I a vydh gorrys dhe'n mernans. Aga goes a vydh warnedha i.

¹⁷Mar kemmer gour y hwoer, myrgh y das, po myrgh y vamm, ha gweles hy noethedh, ha mar kwel hi y noethedh ev, meth yw, hag i a vydh treghys dhe-ves a wel mebyon aga fobel. Ev re dhiskudhas noethedh y hwoer. Ev a dheg y gammweyth.

¹⁸Mar krowedh gour gans benyn yn termyn hy amseryow, ha diskudha hy noethedh, ev re dhiskudhas hy fenten, ha hi re dhiskudhas fenten hy goes, ha'ga dhew a vydh treghys dhe-ves dhiworth aga fobel.

¹⁹Ha ny wre'ta diskudha noethedh hwoer dha vamm, na hwoer dha das, rag ev a dhiskudh y gares ogas. I a dheg aga hammweyth.

²⁰Ha mar krowedh gour gans gwreg y ewnter, ev re dhiskudhas noethedh y ewnter. I a dheg aga fegh. I a verow anvap.

²¹Mar kemmer gour gwreg y vroder, tra avlan yw. Ev re dhiskudhas noethedh y vroder. I a vydh anvap.

²²Ytho, hwi a syns oll ow ordenansow hag oll ow breusow, ha'ga gul, ma na wrello an tir, ma'gas drov dhe driga ynno, agas hwyja yn-mes.

²³Ha ny wrewgh hwi kerdhes war-lergh ordenansow an genedhel a dowlav yn-mes dheragowgh, rag i re wrug oll an taklow ma, ha my a's kasas.

²⁴Mes my re leveris dhywgh, Hwi a erit aga thir, ha my a'n rov dhywgh dhe berghenna, tir a dhinwa leth ha mel. An ARLOEDH agas Duw ov vy, re'gas dibarthas dhiworth an kenedhlow.

²⁵Ytho hwi a dhissern yntra bestes glan hag avlan, hag ynter ydhyn glan hag avlan; ny wrewgh omdhefola gans best, nag edhen na travyth owth hesya war an dor re wrug vy y dhiberth ragowgh avel avlan

²⁶Ha bedhewgh sans dhymmo vy; rag my, an ARLOEDH, yw sans, ha my re'gas dibarthas dhiworth an kenedhlow, dhe vos dhymmo vy.

²⁷Gour po benyn neb a wra nygromons po neb a vo koelyek a vydh gorrys dhe'n mernans yn sur. I a vydh labydhys gans meyn. Aga goes a vydh warnedha.