Read Kernewek Levitikus 22 Bible Online

Levitikus 22 - Kernewek bible

Levitikus 22

¹Ha'n ARLOEDH a gewsis orth Moyses, ow leverel:

²Lever dhe Aron ha'y vebyon may tyghtyons gans revrons offrynnow sans mebyon Ysrael, ha na dhefollons ow hanow sans y'n taklow a sakrons dhymmo vy. An ARLOEDH ov vy.

³Lavar dhedha, Piwpynag oll a'gas has, der agas henedhow, a dheffo nes dhe'n taklow sans a wra mebyon Ysrael aga sakra dhe'n ARLOEDH, ha warnodho y avlander, an den na a vydh treghys dhe-ves a'm golok. An ARLOEDH ov vy.

⁴Piwpynag a has Aron a vo klavorek, po mayth eus dhodho sygerans ny wra dybri a'n taklow sans erna vo glan. Ha piwpynag a docchyo neppyth re dheuth ha bos avlan dre gorf marow, po gour re gavas dyllans has,

⁵po piwpynag a docchyo tra owth hesya a wrello dhodho bos avlan, po den a wrello dhodho bos avlan, pypynag a vo an avlander usi dhodho:

⁶neb a docchyo tra a'n par ma a vydh avlan bys y'n gorthugher, ha ny wra dybri a'n taklow sans marnas ev a wolgh y gig gans dowr.

⁷Pan vo an howl sedhys, ev a vydh glan, ha wosa henna ev a dheber a'n taklow sans rag i yw y voes.

⁸Ny wra dybri an pyth a verow y honan, po yw skwardys gans bestes gwyls. Ny dheber hemma, owth omdhefola dredho. An ARLOEDH ov vy.

⁹Ytho, i a syns ow charj, na borthons pegh warnodho ha merwel dredho drefenn i dh'y dhefola. An ARLOEDH ov vy, neb a wra aga sanshe.

¹⁰Ny dheber estren[10] vyth tra sans. Ny dheber tra sans naneyl godriger a'n oferyas, na gwas arvethys.

¹¹Mes mar pren an oferyas neb den gans y vona ev, hemma a'n deber, hag ev neb yw dineythys yn y ji, i a dheber a'y voes.

¹²Myrgh oferyas, mars yw hi demmedhys dhe estren, ny yll hi dybri a offrynn an taklow sans.

¹³Mes myrgh oferyas, mars yw gwedhwes po didhemmedhys, ha heb flogh, ha dehwelys dhe ji hy thas kepar hag yn hy yowynkneth, hi a yll dybri boes hy thas, mes ny'n deber estren vyth.

¹⁴Ha den mar teber tra sans heb y wodhvos, ev a geworr an pympes rann a'y dalvosogeth dhodho, ha ri an dra sans dhe'n oferyas.

¹⁵Ny wrons defola taklow sans mebyon Ysrael a offrynnons dhe'n ARLOEDH,

¹⁶na'ga gasa dhe berthi kammweyth kammwrians pan dhebrons aga thaklow sans, rag an ARLOEDH ov vy, neb a wra aga sanshe.

¹⁷An ARLOEDH a gewsis orth Moyses, ow leverel:

¹⁸Kows orth Aron ha'y vebyon hag orth oll mebyon Ysrael, ha leverel dhedha, Piwpynag a ji Ysrael po a'n alyons yn Ysrael a vynno offrynna aga offrynn rag oll aga ambosow ha rag oll aga offrynnow bolonjedhek, a vynnons dhe offrynna dhe'n ARLOEDH avel offrynn leskys,

¹⁹gorreydh heb namm vydh an offrynn bolonjedhek, a'n chatel, a'n deves, po a'n gever.

²⁰Pypynag a'n jeffo namm, ny wrewgh hwi y offrynna, rag ny vydh kemmeradow ragowgh.

²¹Ha piwpynag a offrynno sakrifis offrynnow kres dhe'n ARLOEDH dhe gollenwel ambos po offrynn bolonjedhek, a'n chatel po a'n flokk, bedhes perfydh may fo kemmeradow. Ny vydh namm ynno.

²²Ny wrewgh offrynna dhe'n ARLOEDH travyth a vo dall po gans askorn terrys po mans po gans gwennogenn po gans bryghi podredhek po gans troskennow, na gul offrynn anedha dre dan war an alter.

²³Ty a yll offrynna ojyon po oen gans esel re hir po re vyghan rag offrynn bolonjedhek, mes ny vydh kemmeradow rag ambos.

²⁴Ny wrewgh hwi offrynna travyth may fo y dhiwgell brewys, na skwattys, na tennys yn-mes, na treghys; ny wrewgh hwi hemma yn agas tir hwi.

²⁵Dhiworth dorn alyon ny wrewgh hwi offrynna boes dha Dhuw a'n keth bestes ma, rag bos fowtow ha nammow ynna. Ny vydhons kemmeradow ragowgh.

²⁶An ARLOEDH a gewsis orth Moyses ow leverel:

²⁷Pan yw ojyon po oen po gaver dineythys, y fydh seyth dydh yn-dann y vamm, hag a-dhia'n ethves dydh ev a vydh kemmeradow rag offrynn dre dan dhe'n ARLOEDH.

²⁸Na wrewgh ladha bugh po davas ha'y mab, aga dew y'n keth jydh.

²⁹Ha pan offrynnowgh sakrifis grasyans dhe'n ARLOEDH, offrynnowgh ev yn fordh may fo kemmeradow.

³⁰Ev a vydh dybrys an keth jydh; ny wrewgh gasa rann vyth anodho bys y'n myttin. An ARLOEDH ov vy.

³¹Ytho, hwi a syns ow gorhemmynnow ha'ga gul. An ARLOEDH ov vy.

³²Ny wrewgh hwi defola ow hanow sans, mes my a vydh sanshes yn mysk mebyon Ysrael. An ARLOEDH ov vy, neb a wra agas sanshe,

³³neb a'gas dros yn-mes a bow Ejyp, dhe vos agas Duw. An ARLOEDH ov vy.