Read Kernewek Levitikus 24 Bible Online

Levitikus 24 - Kernewek bible

Levitikus 24

¹Ha'n ARLOEDH a gewsis orth Moyses, ow leverel:

²Argh dhe vebyon Ysrael may trollons dhis olew pur a oliv gweskys rag an golow, dhe wul dhe'n lugern leski heb hedhi.

³A-ves dhe vayl an dustuni, yn tylda an kuntelles, y hwra Aron y ordena prest, dhiworth gorthugher bys y'n myttin dherag an ARLOEDH. Y fydh ordenans bys vykken der agas henedhow.

⁴Ev a sett an lugern war an kantoler a owr pur dherag an ARLOEDH prest.

⁵Ha ty a gemmer bleus fin ha pobas dewdhek tesenn rond ganso. Diw dhegves rann a efa a vydh yn unn desenn.

⁶Ha ty a's sett yn dew rew, hwegh anedha yn unn rew, war an voes a owr pur dherag an ARLOEDH.

⁷Ha ty a worr frankynkys pur war bub rew, dhe vos rann govadh rag an bara, offrynn dre dan dhe'n ARLOEDH.

⁸Pub sabot ev a'n aray prest dherag an ARLOEDH, a-barth mebyon Ysrael, kevambos bys vykken.

⁹Hag ev a vydh dhe Aron ha'y vebyon, hag i a'n deber yn tyller sans, rag an moyha sans yw dhodho a offrynnow dre dan dhe'n ARLOEDH, kevambos bys vykken.

¹⁰Lemmyn mab Ysraelyades, hag ev mab gour ejyptek, eth yn-mes yn mysk mebyon Ysrael ha mab an Ysraelyades a omladhas gans gour a Ysrael y'n kamp.

¹¹Ha mab an Ysraelyades a vlasfemyas an Hanow ha'y vollethi. I a'n dros dhe Moyses. Hanow y vamm o Shelomith, myrgh Dibri a loeth Dan.

¹²Hag i a'n worras yn-dann with, ow kortos bodh an ARLOEDH dhe vos diskwedhys dhedha.

¹³Ha'n ARLOEDH a gewsis orth Moyses, ow leverel:

¹⁴Doro neb re vollethis yn-mes a'n kamp, ha gwres peub a'n klewas gorra aga diwleuv war y benn, ha gwres oll an kuntelles y labydha.

¹⁵Ha ty a gews orth mebyon Ysrael, ow leverel: Piwpynag a vollottho y Dhuw a berth y begh.

¹⁶Ha neb a vlasfem hanow an ARLOEDH a vydh gorrys dhe'n mernans yn sur; oll an kuntelles a'n labydh yn sur; an alyon ha'n genesik maga ta, pan volleth an Hanow, a vydh gorrys dhe'n mernans.

¹⁷Ha neb a ladh denvyth a vydh gorrys dhe'n mernans yn sur.

¹⁸Ha neb a ladh best a'n attal, bewnans rag bewnans.

¹⁹Ha den mar kwra pystik dh'y gentrevek, y fydh gwrys dhodho kepar dell wrug ev.

²⁰Askorn terrys rag askorn terrys, lagas rag lagas, dans rag dans. Dell wrug ev pystik dhe dhen, yndella y fydh gwrys dhodho ev.

²¹Neb a ladh best, ev a'n attal; ha neb a ladh den, ev a vydh gorrys dhe'n mernans.

²²Y fydh unn lagha dhywgh, an alyon ha'n genesik maga ta, rag an ARLOEDH agas Duw ov vy.

²³Ha Moyses a gewsis orth mebyon Ysrael, bos res dhedha dri neb re wrussa mollethi yn-mes a'n kamp ha'y labydha gans meyn. Ha mebyon Ysrael a wrug dell erghis an ARLOEDH dhe Moyses.