Read Kernewek Levitikus 25 Bible Online

Levitikus 25 - Kernewek bible

Levitikus 25

¹Ha'n ARLOEDH a gewsis orth Moyses yn menydh Sinay, ow leverel,

²Kows orth mebyon Ysrael ha leverel dhedha: Pan dhyffowgh hwi a a-ji dhe'n tir a rov dhywgh, an tir a with sabot dhe'n ARLOEDH.

³Hwegh blydhen ty a has dha wel ha hwegh blydhen ty a skether dha winlann ha kuntell an frut anedhi.

⁴Mes an seythves blydhen a vydh sabot solem dhe'n tir rag an ARLOEDH. Ny hesydh dha wel na skethra dha winlann.

⁵Ny vysydh an pyth a dyv y honan a'th trevas, na kuntell grappys dha winlann na veu skethrys; blydhen a sabot solem yw rag an tir.

⁶Ha sabot an tir a vydh boes ragowgh, ragos jy, ha rag dha gethwas ha rag dha gethes ha rag dha was arvethys ha rag an godriger usi trigys genes;

⁷rag dha jatel ha'n bestes gwyls war dha dir, oll an askorr anodho a vydh boes.

⁸Ha ty a reken ragos seyth sabot a vlydhynyow, seythgweyth seyth blydhen; ha termyn seyth sabot a vlydhynyow a vydh ragos naw blydhen ha dew-ugens.

⁹Ena ty a wra dhe'n hirgorn seni yn degves dydh an seythves mis; yn dydh an dehwelyans hwi a wra dhe'n hirgorn seni der oll agas tir.

¹⁰Ha hwi a sansha an degves blydhen ha dew-ugens ha deklarya rydhses der oll an tir dhe oll y drigoryon. Y fydh yubile dhywgh, ha hwi a dhehwel pub den oll dh'y berghennogeth ev ha pub den oll dh'y deylu.

¹¹An degves blydhen ha dew-ugens a vydh yubile dhywgh. Ny wrewgh hwi hasa, na mysi an pyth a dyv y honan ena, na kuntell an grappys dhiworth dha winbrenn na veu skethrys.

¹²Rag yubile yw; sans vydh dhywgh. Hwi a dheber y askorr dhiworth an gwel.[11]

¹³Yn blydhen ma an yubile, pub den ahanowgh a dhehwel dh'y berghennogeth.

¹⁴Mar kwerthydh neppyth dhe'th kentrevek, po prena dhiworth dha gentrevek, ny wrewgh hwi gwaska an eyl y gila.

¹⁵Ty a bren dhiworth dha gentrevek orth an myns a'n blydhynyow wosa an yubile; hag ev a'n gwerth dhis orth an myns a'n blydhynyow a frut yw gesys.

¹⁶Pan eus meur a vlydhynyow, ty a ughelha an pris, ha pan eus boghes blydhynyow ty a iselha an pris, rag ev a'n gwerth dhis orth an myns a vlydhynyow an trevasow.

¹⁷Ytho, ny wrewgh hwi gwaska an eyl y gila, mes ty a berth own a'th Duw, rag an ARLOEDH agas Duw ov vy.

¹⁸Ytho, hwi a wra ow ordenansow ha gwitha ow breusow ha'ga gul, ha hwi a drig y'n pow yn sawder.

¹⁹Ha'n tir a re y frut ha hwi a dheber dha walgh ha triga ynno yn sawder.

²⁰Ha mar leverowgh, Pandr'a wren ni dybri y'n seythves blydhen, mar ny wren ny hasa na kuntell agan trevas?

²¹ena my a ergh ow bennath dhe dhos dhywgh y'n hweghves blydhen, ha hi a re dhywgh frut rag teyr blydhen.

²²Pan hesowgh has y'n ethves blydhen, hwi a dheber frut koth; bys y'n nawves blydhen, pan dheu hy threvas, hwi a dheber an frut koth.

²³Ny vydh an tir gwerthys bys vykken, rag my a bew an tir; rag hwi yw alyons ha godrigoryon genev.

²⁴Hag yn oll an tir a'gas perghennogeth, hwi a re daspren rag an tir.

²⁵Mars yw dha vroder devedhys ha bos boghosek hag ev a werth y berghennogeth, ena res yw y neshevin dhe dhos ha dasprena an pyth re werthas y vroder.

²⁶Ha mar ny'n jeves nagonan dh'y dhasprena, mes a-wosa ev y honan a siwen hag yma yn y leuv pygans lowr dh'y dhasprena,

²⁷ena, reknes ev blydhynyow an gwerthas, hag attyli an dyffrans dhe'n gour a'n gwerthas, may hallo dehweles dh'y berghennogeth.

²⁸Mes, mar ny'n jeves an pygans dh'y dhaskavoes, an pyth yw gwerthys a wra pesya yn leuv an prener bys yn blydhen an yubile, hag y'n yubile y fydh rydhhes, hag ev a dhehwel dh'y berghennogeth.

²⁹Ha gour mar kwerth chi-annedh yn sita gans fosow, ev a yll y dhasprena a-ji dhe vlydhen leun wosa y vos gwerthys. Ev a yll y dhasprena a-ji dhe vlydhen leun.

³⁰Ha mar nyns yw dasprenys a-ji dhe unn vlydhen leun, an chi a-ji dhe'n sita gans fosow a vydh surhes dhe neb a'n prenas bys vykken, dhodho ev ha dh'y henedh. Ny vydh livrys y'n yubile.

³¹Mes chiow yn godrevow heb fosow a-dro dhedha a vydh reknys avel gwelyow an pow. I a yll bos dasprenys hag i a vydh livrys y'n yubile.

³²Byttegyns, sitys an Levysi, an chiow yn sitys aga ferghennogeth, an Levysi a yll aga dasprena pup-prys.

³³Ha pypynag a vo dasprenys gans onan a'n Levysi — gwerthas chi perghennys ganso yn sita — ev a vydh livrys y'n yubile, rag chiow yn sitys an Levysi yw aga ferghennogeth yn mysk mebyon Ysrael.

³⁴Mes an peurva a-dro dh'aga sitys ny yll bos gwerthys, rag yth yw aga ferghennogeth bys vykken.

³⁵Ha mars yw dha vroder devedhys ha bos boghosek ha heb pygans yn dha herwydh, ty a wra y ventena; kepar hag alyon po godriger y fydh ev trigys genes.

³⁶Na gemmer oker na gwayn dhiworto, mes perth own a'th Duw, may pessyo dha vroder bos trigys genes.

³⁷Ny wre'ta ri dhodho dha vona rag oker na gwertha dhodho dha voes rag gwayn.

³⁸An ARLOEDH agas Duw ov vy a'gas dros yn-mes a bow Ejyp dhe ri dhywgh pow Kanan ha dhe vos a'gas Duw.

³⁹Ha'th vroder trigys genes, mar teu ha bos boghosek hag yw gwerthys dhis, ny wre'ta y gonstryna dhe servya kepar ha kethwas,

⁴⁰mes kepar ha gwas arvethys ha godriger y fydh ev genes, hag ev a'th serv bys yn blydhen an yubile.

⁴¹Ena ev a omdenn dhiworthis, ev ha'y fleghes ganso, hag ev a dhehwel dh'y deylu ev; dhe berghennogeth y dasow y hwra ev dehweles.

⁴²Rag an re ma yw ow gwesyon a dhres vy yn-mes a bow Ejyp. Ny vydhons gwerthys avel kethwesyon.

⁴³Ny wre'ta y rewlya gans garowder, mes ty a berth own a'th Duw.

⁴⁴Dha gethyon ha'th kethesow usi genes a vydh a'n kenedhlow trigys a-dro dhywgh. Anedha i ty a bren kethyon ha kethesow.

⁴⁵Hwi a bren ynwedh fleghes an wodrigoryon trigys genowgh. Hwi a bren a'n re ma hag a'ga theyluyow usi genowgh, neb a veu genys yn agas tir. I a vydh agas perghennogeth.

⁴⁶Ha hwi a's kemmer avel eretons rag agas fleghes war agas lergh, dhe erita avel perghennogeth bys vykken. Hwi a's gwith avel kethyon.[12] Mes ny wrewgh hwi rewlya gans garowder war agas breder, mebyon Ysrael, an eyl war y gila.

⁴⁷Alyon po godriger genes mars eus yn y leuv pygans lowr, ha'th vroder trigys ganso mar teu ha bos boghosek hag omwertha dhe'n alyon po dhe'n godriger genes, po dhe esel teylu an alyon,

⁴⁸wosa bos gwerthys ev a yll bos dasprenys. Onan a'y vreder a yll y dhasprena,

⁴⁹po y ewnter po mab y ewnter a yll y dhasprena, po nebonan a'y neshevin a'y deylu a yll y dhasprena, po mars eus yn y leuv pygans lowr, ev a yll omdhasprena y honan.

⁵⁰Hag ev a reken gans neb a'n prenas, a'n vlydhen may feu gwerthys dhodho bys yn blydhen an yubile, ha'y werthbris a vydh kesson gans niver an blydhynyow; y fydh orth kevradh gwas arvethys y'n termyn na.

⁵¹Ha mars eus lies blydhen gesys, war-lergh aga niver ev a dhaskorr avel pris y dhaspren neppyth a'n mona may feu prenys ganso.

⁵²Ha mar nyns eus gesys marnas nebes blydhynyow kyns blydhen an yubile, ev a reken ganso; war-lergh niver y vlydhynyow ev a dhaskorr dhodho pris y dhaspren.

⁵³Ev a vydh ganso kepar ha gwas arvethys blydhenyek. Ny wra y rewlya gans garowder yn dha wolok.

⁵⁴Ha mar nyns yw dasprenys yndella, ev a vydh rydhhes yn blydhen an yubile, ev ha'y fleghes ganso.

⁵⁵Rag gwesyon dhymmo vy yw mebyon Ysrael. Ow gwesyon yns i, a dhres vy yn-mes a bow Ejyp. An ARLOEDH agas Duw ov vy.