Read Kernewek Levitikus 26 Bible Online

Levitikus 26 - Kernewek bible

Levitikus 26

¹Ny wrewgh ragowgh fals dhuwow, ha ny dhrehevowgh ragowgh imaj gravys na peulven, na settya men gravys war agas tir dhe omblegya dhodho, rag an ARLOEDH agas Duw ov vy.

²Hwi a with ow sabotys ha diskwedhes revrons dhe'm sentri. An ARLOEDH ov vy.

³Mar kerdhowgh war-lergh ow ordenansow ha gwitha ow gorhemmynnow ha'ga gul,

⁴my a re dhywgh glawyow yn aga sesonyow ha'n tir a re y drevas, ha gwydh an gwel a re aga frut.

⁵Ha'gas termyn fusta a bes bys yn termyn trevas an grappys, ha trevas an grappys a bes bys yn termyn hasa; ha hwi a dheber agas bara dhe walgh, ha triga yn agas tir yn saw.

⁶Ha my a re kres y'n pow, ha hwi a wrowedh, ha denvyth ny wra dhywgh perthi own. Ha my a bellha tebel bestes a'n tir, ha ny vydh an kledha ow tremena der agas pow.

⁷Ha hwi a jas agas eskerens hag i a goedh dheragowgh der an kledha.

⁸Pymp ahanowgh a jas kans, ha kans ahanowgh a jas deg mil, ha'gas eskerens a goedh dheragowgh der an kledha.

⁹My a dreyl dhywgh, ha'gas gul feyth, ha'gas ynkressya, ha fastya ow kevambos genowgh.

¹⁰Hwi a vydh hwath ow tybri trevas koth an vlydhen kyns, ha res vydh dhywgh tewlel an koth yn-mes dhe wul spas rag an nowydh.

¹¹Ha my a sett ow thabernakel yn agas mysk, ha ny wra ow spyrys agas aborrya.

¹²Ha my a gerdh yn agas mysk ha bos agas Duw, ha hwi a vydh ow fobel.

¹³My yw an ARLOEDH agas Duw, a'gas dros yn-mes a bow Ejyp, ma na vewgh hwi aga hethyon; ha my re droghas barrys agas yew ha gul dhywgh kerdhes a'gas sav.

¹⁴Mes mar ny vynnowgh goslowes orthiv, na gul oll an gorhemmynnow ma,

¹⁵mar skonyowgh ow ordenansow, ha mar kwra agas enev kasa ow breusow, ma na wryllowgh ow gorhemmynnow oll, mes terri ow hevambos,

¹⁶hemma a wrav dhywgh: my a worr euth tromm warnowgh, kleves gwastya, fevyr a dhiswra an lagasow hag a wra dhe'n enev omwetha. Hwi a has agas has yn euver, rag agas eskerens a wra y dhybri.

¹⁷Ha my a sett ow fas er agas pynn, ha hwi a vydh gweskys dherag agas eskerens. An re a'gas kas a rewl warnowgh, ha hwi a fi pan na'gas siw denvyth.

¹⁸Ha mar ny vynnowgh koela orthiv yn spit dhe hemma, my a vynn agas kessydhya seythgweyth moy rag agas peghosow.

¹⁹Ha my a derr goeth agas nerth, ha my a wra agas nev avel horn ha'gas dor avel brons.

²⁰Agas nerth a vydh spenys yn euver rag ny re agas tir y drevas, na ny re gwydh an tir aga frut.

²¹Ha mar kerdhowgh kontrari dhymmo vy, ha mar ny vynnowgh koela orthiv, my a dhre seythgweyth moy plagys warnowgh rag agas peghosow.

²²Ha my a dhannvon bestes gwyls yn agas mysk a gemmer dhe-ves agas fleghes, ha diswul agas chatel, ha lehe agas niver, ha gwag vydh agas fordhow.

²³Ha mar ny vynnowgh bos dyskys gans an taklow ma, mes kerdhes kontrari dhymmo vy,

²⁴ena my ynwedh a gerdh kontrari dhywgh hwi, ha'gas kessydhya seythgweyth rag agas peghosow,

²⁵Ha my a dhre kledha warnowgh dhe dhiella an kevambos; ha pan owgh hwi kuntellys war-barth a-berth yn agas sitys, my a dhannvon an pla yn agas mysk, ha hwi a vydh res a-ji dhe dhorn an eskar.

²⁶Ha pan wrylliv vy terri gwelenn agas bara, deg benyn a wra pobas agas bara yn unn forn, hag i a dhaskorr dhywgh agas bara orth poes, ha hwi a'n deber ha ny vydh lowr ragowgh.

²⁷Ha mar ny vynnowgh koela orthiv awos hemma oll, mes kerdhes kontrari dhymm,

²⁸ena my ynwedh a gerdh kontrari dhywgh hwi, ha my ynwedh a wra agas kessydhya seythgweyth rag agas peghosow.

²⁹Ha hwi a dheber kig agas mebyon, ha kig agas myrghes a dhebrowgh.

³⁰Ha my a dhiswra agas tylleryow ughel, ha terri dhe'n dor agas alteryow ynkys, ha tewlel agas korfow war gorfow agas idolys, ha'm spyrys a wra agas aborrya.

³¹Ha my a wra agas sitys magoryow ha'gas sentris dibobel, ha ny vynnav blasa agas saweryow plegadow.

³²Ha my a wra an tir dibobel, ha'gas eskerens usi trigys ynno a vydh sowdhenys.

³³Ha my a wra agas skattra yn mysk an kenedhlow, ha tenna yn-mes an kledha war agas lergh; dha dir a vydh ynyal, ha'gas sitys a vydh magoryow.

³⁴Ena y fydh an tir ow lowenhe yn y sabotys oll dydhyow y dhifeythter, ha hwi yn tir agas eskerens; ena an tir a wra powes ha lowenhe yn y sabotys.

³⁵Oll dydhyow y dhifeythter ev a bowes, rag ny bowesas yn agas sabotys, pan esowgh hwi trigys ynno.

³⁶Ha my a dhannvon desper yn kolonn an re ahanowgh yw gesys yn tiryow aga eskerens; ha son delenn ow krena a's chas, hag i a fi kepar ha pan vens ow fia a'n kledha, hag i a goedh pan na's siw denvyth.

³⁷Hag i a goedh an eyl war y gila, kepar ha pan ve dherag kledha pan na's siw denvyth; ha ny'gas bydh galloes dhe sevel dherag agas eskerens.

³⁸Hag yth ewgh dhe goll yn mysk an kenedhlow, ha tir agas eskerens a wra agas kollenki.

³⁹Ha'n re ahanowgh yw gesys a wra yn aga hammweyth yn tiryow agas eskerens; hag i a beder yn kammweyth aga thasow keffrys.

⁴⁰Ha mar konfessyons aga hammweyth ha kammweyth aga thasow, gans aga dislelder a wrussons er ow fynn, hag ynwedh ow kerdhes kontrari dhymm,

⁴¹may hwrug vy ynwedh kerdhes kontrari dhedha i, ha'ga dri bys yn tir aga eskerens; mars yw uvelhes aga holonnow antrodreghys, ha mar mynnons gul amendys rag aga hammweyth,

⁴²ena my a berth kov a'm kevambos gans Yakob, hag ynwedh ow hevambos gans Ysak, ha my a berth kov ynwedh a'm kevambos gans Abraham, ha my a berth kov a'n tir.

⁴³An tir ynwedh a vydh gesys gansa, ha lowenhe yn y sabotys hag ev hwath difeythtir hebdha; hag i a wra amendys rag aga hammweyth, rag i dhe dhespisya ow breusow ha'ga spyrys dhe aborrya ow ordenansow.

⁴⁴Mes yn despit dhe henna oll, pan vons yn tir aga eskerens, ny wrav aga skonya, na'ga aborrya, dh'aga diswul yn tien ha terri ow hevambos gansa; rag an ARLOEDH aga Duw ov vy.

⁴⁵Mes a-barth dhedha i, my a berth kov a'n kevambos gans aga hendasow, a dhres yn-mes a bow Ejyp yn golok an kenedhlow, may fen aga Duw. An ARLOEDH ov vy.

⁴⁶An re ma yw an ordenansow ha'n breusow ha'n laghys a wrug an ARLOEDH yntredho ev ha mebyon Ysrael yn menydh Sinay dre leuv Moyses.