Read Kernewek Levitikus 27 Bible Online

Levitikus 27 - Kernewek bible

Levitikus 27

¹Ha'n ARLOEDH a gewsis orth Moyses, ow leverel:

²Kows orth mebyon Ysrael, ha leverel dhedha: Gour mar kollenow ambos arbennik dhe ri tus dhe'n ARLOEDH, an dalvosogeth a vydh reknys yndella genes:

³dha reknans rag gorreydh a ugens bloedh bys yn tri-ugens bloedh y oes a vydh hanter-kans shekel arghans, war-lergh shekel an sentri.[13]

⁴Ha mars yw benynreydh, dha reknans a vydh deg shekel warn ugens.

⁵Ha mars yw a bymp bloedh bys yn ugens bloedh y oes, dha reknans a vydh ugens shekel rag gorreydh ha deg shekel rag benynreydh.

⁶Ha mars yw a unn mis bys yn pymp bloedh, dha reknans a vydh pymp shekel arghans rag gorreydh, ha'th reknans a vydh tri shekel arghans rag benynreydh.

⁷Ha mars yw tri-ugens bloedh po moy, mars yw gorreydh, dha reknans a vydh pymthek shekel, ha rag benynreydh, deg shekel.

⁸Ha mars yw re voghosek dhe ri dha reknans, gwra y settya a-rag an oferyas, ha'n oferyas a'n reken war-lergh pygans neb a wrug an ambos.

⁹Ha mars yw best a'n par a dhrons avel offrynn dhe'n ARLOEDH, pub best a'n par na a vo res dhe'n ARLOEDH a vydh sans.

¹⁰Ny worr neppyth yn y le na'y geschanjya, onan da rag onan drog, nag onan drog rag onan da; ha mar keschanj best rag best, ha'n kynsa best ha'n best keschanjys a vydh sans.

¹¹Ha mars yw best avlan, a'n sort nag yw dres avel offrynn dhe'n ARLOEDH, ev a sett an best dherag an oferyas,

¹²ha'n oferyas a reken y dalvosogeth, mars yw da po drog. Kepar dell y'n reknydh, ty, an oferyas, yndella y fydh.

¹³Mes mar mynn ev y dhasprena, ev a geworr pympes rann moy dhe'n reknans.

¹⁴Ha pan wra gour sakra y ji dhe vos sans dhe'n ARLOEDH, an oferyas a reken mars yw da po drog. Ev a sev kepar dell y'n reken an oferyas.

¹⁵Ha mar mynn neb a'n sakras dasprena y ji, ev a geworr dhodho pympes rann moy a'n mona war-lergh dha reknans, hag ev a'n pew arta.

¹⁶Ha mar kwra gour sakra dhe'n ARLOEDH rann a dir y berghennogeth, dha reknans a vydh war-lergh an has anodho: homer has heydh a vydh reknys orth hanter-kans shekel arghans.

¹⁷Mar saker y bark a-dhia vlydhen an yubile, ev a bes war-lergh dha reknans;

¹⁸mes mar saker y bark wosa an yubile, an oferyas a reken an mona ragdho war-lergh an blydhynyow yw gesys bys yn blydhen an yubile, ha lehes vydh dhiworth dha reknans.

¹⁹Ha mar mynn neb a sakras y bark y dhasprena, ev a geworr pympes rann moy a vona dha reknans, hag ev a'n pew arta.

²⁰Mes mar ny vynn dasprena an park, po mar kwerthas an park dhe wour arall, ny vydh dasprenys namoy;

²¹mes an park, pan yw delivrys y'n yubile, a vydh sans dhe'n ARLOEDH, avel park sakrys. Perghennys vydh gans an oferyas.

²²Ha mar saker den dhe'n ARLOEDH park re brenas nag yw rann a'y dir eritys,

²³an oferyas a reken pris an reknans bys yn vlydhen an yubile; hag ev a re pris an reknans an jydh na, avel tra sans dhe'n ARLOEDH.

²⁴Yn blydhen an yubile an park a dhehwel dhe neb may feu prenys dhiworto, dhe neb o perghennek an tir.

²⁵Oll dha reknansow a vydh war-lergh shekel an sentri, ugens gera dhe'n shekel.

²⁶Mes ny saker denvyth kynsa-genys neb best, rag an ARLOEDH a bew pub kynsa-genys, ojyon po davas kyn fo. An ARLOEDH a'n pew.

²⁷Ha mars yw best avlan, ev a'n daspren war-lergh dha reknans, hag ev a geworr pympes rann moy dhodho; po, mar nyns yw dasprenys, y fydh gwerthys war-lergh dha reknans.

²⁸Byttegyns, neppyth sakrys, a wra gour y sakra dhe'n ARLOEDH, yn-mes a bup-tra eus dhodho, a dhen, po best, po gwel a'y berghennogeth, ny vydh gwerthys na dasprenys. Pup-tra sakrys yw an moyha sans dhe'n ARLOEDH.

²⁹Den vytholl a vo sakrys dhe dhistruyans, ny vydh dasprenys. Ev a vydh gorrys dhe'n mernans.

³⁰Oll dega an tir, has an tir po frut an gwydh kyn fo, a vydh dhe'n ARLOEDH. Sans yw dhe'n ARLOEDH.

³¹Gour mar mynn dasprena rann y dega, ev a geworr dhodho unn pympes rann moy.

³²Hag oll dega an chatel po an flokk, pup-tra a dremenno yn-dann welenn an bugel[14], an degves a vydh sans dhe'n ARLOEDH.

³³Ha ny wovynn mars yw da po drog, ha ny wra y geschanjya. Ha mara'n keschanj, hag ev ha'n onan keschanjys a vydh sans. Ny vydh dasprenys.

³⁴An re ma yw an gorhemmynnow a worhemmynnis an ARLOEDH dhe Moyses rag mebyon Ysrael yn menydh Sinay.