Read Kernewek Levitikus 4 Bible Online

Levitikus 4 - Kernewek bible

Levitikus 4

¹Ha'n ARLOEDH a gewsis orth Moyses ow leverel,

²Kows orth mebyon Ysrael ow leverel: Mar pegh neb den heb y wodhvos erbynn onan a worhemmynnow an ARLOEDH, ow kul neppyth na dal bos gwrys,

³mars yw an oferyas untys neb a begh, yndella ow kul an bobel dhe vos kablus, dres ev dhe'n ARLOEDH rag y begh re beghas tarow yowynk heb namm, rag offrynn pegh.

⁴Hag ev a dhre an lodhen dhe dharas tylda an kuntelles dherag an ARLOEDH ha gorra y leuv war benn an lodhen ha ladha an lodhen dherag an ARLOEDH.

⁵Ha'n oferyas untys a gemmer rann a woes an lodhen ha'y dhri dhe dylda an kuntelles,

⁶Ha'n oferyas a drogh y vys y'n goes ha skoellya rann a'n goes seythgweyth dherag an ARLOEDH, a-rag vayl an sentri.

⁷Ha'n oferyas a worr rann a'n goes war gern alter an ynkys hweg dherag an ARLOEDH usi yn tylda an kuntelles, ha dinewi oll goes an lodhen war woeles alter an offrynn leskys, orth daras tylda an kuntelles.

⁸Hag ev a gemmer dhiworto an blonek oll a lodhen an offrynn pegh, an blonek a worher an pottys hag oll an blonek usi war an pottys,

⁹ha'n dhiwloneth ha'n blonek usi warnedha usi ogas dhe'n dhiwglun, ha stagell an avi ev a gemmer dhe-ves gans an dhiwloneth,

¹⁰kepar dell yw kemmerys dhiworth ojyon sakrifis an offrynnow kres; ha'n oferyas a's lesk war alter an offrynn leskys.

¹¹Ha kneus an lodhen hag oll y gig gans y benn ha'y arrow ha'y bottys ha'y gawgh —

¹²an lodhen dien, ev a'n kemmer yn-mes a'n kamp dhe dyller glan mayth yw an lusu dinewys, ha'y leski war dan a brenn. Ev a vydh leskys le mayth yw an lusu dinewys.

¹³Ha mar pegh kuntelles kowal Ysrael heb y wodhvos, ha kelys yw an dra dhiworth lagasow an gemmynieth, ha mar kwrussons neppyth erbynn neb onan a worhemmynnow an ARLOEDH, taklow na dal bos gwrys, ha mars yns i kablus;

¹⁴pan vo godhvedhys an pegh re wrussons, an gemmynieth a dhre tarow yowynk avel offrynn pegh, ha'y dhri dherag tylda an kuntelles.

¹⁵Ha henavogyon an kuntelles a worr aga diwleuv war benn an lodhen dherag an ARLOEDH, ha'n tarow a vydh ledhys dherag an ARLOEDH.

¹⁶Ha'n oferyas untys a dhre rann a woes an lodhen dhe dylda an kuntelles,

¹⁷ha'n oferyas a drogh y vys y'n goes ha'y skoellya seythgweyth dherag an ARLOEDH dherag an vayl.

¹⁸Hag ev a worr rann a'n goes war gern an alter usi dherag an ARLOEDH, usi yn tylda an kuntelles, ha dinewi oll an goes war woeles alter an offrynn leskys, orth daras tylda an kuntelles.

¹⁹Hag ev a gemmer oll y vlonek dhiworto ha'y leski war an alter

²⁰Hag ev a wra gans an lodhen kepar dell wrug gans an lodhen rag an offrynn pegh; yndella y hwra ev gans hemma. Ha'n oferyas a wra dehwelyans ragdha, ha gevys vydh dhedha.

²¹Hag ev a gemmer an lodhen yn-mes a'n kamp ha'y leski dell loskas an kynsa tarow. Offrynn pegh yw rag an gemmynieth.

²²Pan begh rewler ha gul neppyth heb y wodhvos erbynn neb onan a worhemmynnow an ARLOEDH y Dhuw, taklow na dal bos gwrys, ha kablus yw,

²³po mar teu an pegh re beghas dh'y wodhvos, ev a dhre y offrynn, bogh, gorow heb namm,

²⁴hag ev a worr y leuv war benn an bogh ha'y ladha y'n tyller may ladhons an offrynn leskys dherag an ARLOEDH. Offrynn pegh yw.

²⁵Ha'n oferyas a gemmer rann a woes an offrynn pegh gans y vys ha'y worra war gern alter an offrynn leskys ha dinewi y woes war woeles alter an offrynn leskys.

²⁶Hag ev a lesk oll y vlonek war an alter kepar ha blonek sakrifis an offrynnow kres, ha'n oferyas a wra dehwelyans ragdho rag y begh, ha gevys vydh dhodho.

²⁷Ha mar pegh nebonan a bobel an pow heb y wodhvos, ow kul neppyth erbynn gorhemmynnow an ARLOEDH, taklow na dal bos gwrys, ha kablus yw,

²⁸pan dheu dh'y wodhvos an pegh re beghas, ev a dhre y offrynn, mynn a'n gever, onan benow heb namm, rag y begh re beghas.

²⁹Hag ev a worr y leuv war benn an offrynn pegh ha ladha an offrynn pegh yn tyller an offrynn leskys

³⁰Ha'n oferyas a gemmer rann a'y woes gans y vys ha'y worra war gern alter an offrynn leskys, ha dinewi oll an goes war woeles an alter.

³¹Ha ev a gemmer dhe-ves oll y vlonek, dell yw an blonek kemmerys dhe-ves dhiworth sakrifis an offrynnow kres, ha'n oferyas a'n lesk war an alter, sawer plegadow dhe'n ARLOEDH, ha'n oferyas a wra dehwelyans ragdho, ha gevys vydh dhodho.

³²Ha mar tre oen avel offrynn pegh, ev a dhre onan benow heb namm.

³³Hag ev a worr y leuv war benn an offrynn pegh, ha'y ladha rag offrynn pegh y'n tyller may ladhons an offrynn leskys.

³⁴Ha'n oferyas a gemmer rann a woes an offrynn pegh gans y vys ha'y worra war gern alter an offrynn leskys, ha dinewi oll an goes war woeles an alter.

³⁵Hag ev a gemmer dhe-ves oll an blonek dell yw kemmerys blonek an oen dhiworth sakrifis an offrynnow kres, ha'n oferyas a'n lesk war an alter, gans an offrynnow gwrys dre dan dhe'n ARLOEDH; ha'n oferyas a wra dehwelyans rag y begh re wrug ev, hag y fydh gevys dhodho.