Read Kernewek Levitikus 6 Bible Online

Levitikus 6 - Kernewek bible

Levitikus 6

¹Ha'n ARLOEDH a gewsis orth Moyses, ow leverel:[2]

²Mar pegh den ha gul neppyth dislel erbynn an ARLOEDH, ow leverel gow dh'y hynsa a-dro dhe neppyth gesys dhodho dhe witha, po gorrys yn y jarj avel mewgh, po neppyth ledrys dre nerth, po mar arwaskas y hynsa,

³po mar kavas neppyth o kellys ha leverel gow yn y gever ha ti yn fals a-dro dhe onan a'n taklow gwrys gans den, ha pegha yndellma:

⁴ena, drefenn ev dhe begha ha bos kablus, res vydh dhodho restorya an pyth a ladras dre nerth po an pyth a gavas der arwask po an pyth a veu res dhodho dhe witha po an pyth kellys a gavas,

⁵po pup-tra oll a dos yn fals a-dro dhodho; ev a'n restor yn tien ha keworra dhodho pympes rann moy, ha ri dhe neb a'n pew yn dydh y offrynn kammweyth.

⁶Hag ev a dhre y offrynn kammweyth dhe'n ARLOEDH, hordh heb namm a'n flokk, talvesys genes, rag offrynn kammweyth, dhe'n oferyas.

⁷Ha'n oferyas a wra dehwelyans ragdho dherag an ARLOEDH hag y fydh gevys dhodho pypynag a wrug ow kammwul.

⁸Ha'n ARLOEDH a gewsis orth Moyses, ow leverel:

⁹Gwra erghi dhe Aron ha'y vebyon ow leverel: Hemm yw lagha an offrynn leskys. An offrynn leskys a vydh war an oeles, war an alter, dres an nos bys y'n myttin, ha tan an alter a bes ow leski ynni.[3]

¹⁰Ha'n oferyas a wisk y dhillas a lien ha'y lavrek a lien war y gig ha kemmeres yn-bann lusu an offrynn leskys a veu konsumys gans tan war an alter, hag ev a's gorr ryb an alter.

¹¹Ena ev a dhiwisk y dhillas ha gwiska dillas arall ha doen an lusu yn-mes a'n kamp bys yn tyller glan.

¹²Ha'n tan war an alter a bes ow leski warnodho; ny vydh difeudhys. An oferyas a lesk prenn warnodho pub myttin hag araya an offrynn leskys warnodho, hag ev a lesk warnodho blonek an offrynnow kres.

¹³Ha'n tan a bes ow leski pub eur oll war an alter; ny vydh difeudhys.

¹⁴Hemm yw lagha an offrynn greun. Mebyon Aron a'n offrynn dherag an ARLOEDH dherag an alter.

¹⁵Hag ev a gemmer dornas anodho, a vleus fin an offrynn greun ha'y oyl hag oll y frankynkys usi war an offrynn greun, ha'y leski war an alter, y rann govadh, sawer plegadow dhe'n ARLOEDH.

¹⁶Hag Aron ha'y vebyon a dheber an remenant avel bara heb goell yn tyller sans. Yn klos tylda an kuntelles y hwrons y dhybri.

¹⁷Ny vydh pebys gans goell. My re'n ros dhedha avel aga rann a'm offrynnow dre dan. An moyha sans yw, kepar ha'n offrynn pegh ha'n offrynn kammweyth.

¹⁸Pub gorreydh yn mysk fleghes Aron a dheber anodho. Ordenans vydh bys vykken der agas henedhow dhiworth offrynnow dre dan dhe'n ARLOEDH. Piwpynag a's toch a vydh sans.

¹⁹Ha'n ARLOEDH a gewsis orth Moyses, ow leverel:

²⁰Hemm yw an offrynn a offrynn Aron ha'y vebyon dhe'n ARLOEDH y'n jydh mayth yw untys: unn degves rann a efa a vleus fin avel offrynn greun pub-dydhyek, hanter anodho y'n myttin ha hanter anodho y'n nos.

²¹Y fydh gwrys gans oyl war ven-pobas; ty a'n dre kemmyskys yn ta; ty a'n offrynn yn temmyn brewys kepar hag offrynn greun, sawer plegadow dhe'n ARLOEDH.

²²Ha'n oferyas a'y vebyon a vo untys yn le y das a wra y offrynna. Ordenans bys vykken yw dhe'n ARLOEDH; y fydh kowlleskys.

²³Pub offrynn greun a'n oferyas a vydh kowlleskys. Ny vydh dybrys.

²⁴Ha'n ARLOEDH a gewsis orth Moyses ow leverel:

²⁵Kows orth Aron ha'y vebyon ow leverel: Hemm yw lagha an offrynn pegh. Y'n tyller mayth yw ledhys an offrynn leskys, y fydh an offrynn pegh ledhys dherag an ARLOEDH. An moyha sans yw.

²⁶An oferyas neb a'n offrynn rag pegh, a'n deber. Y fydh dybrys yn tyller sans, yn klos tylda an kuntelles.

²⁷Piwpynag a docchyo y gig a vydh sans, ha mars eus goes skoellys war neb dillasenn, ty a's golgh yn tyller sans.

²⁸Mes an lester a bri mayth yw bryjys ynno a vydh terrys; ha mars yw bryjys yn lester a vrons, y fydh skourys ha godroghys yn dowr.

²⁹Pub gorreydh yn mysk an oferysi a'n deber. An moyha sans yw.

³⁰Ha ny vydh dybrys offrynn pegh vyth mayth yw dres an goes anodho a-ji dhe dylda an kuntelles dhe wul dehwelyans y'n tyller sans. Leskys vydh y'n tan.