Read Kernewek Levitikus 7 Bible Online

Levitikus 7 - Kernewek bible

Levitikus 7

¹Hemm yw lagha an offrynn kammweyth. An moyha sans yw.

²Y'n tyller may ladhons an offrynn leskys y ladhons an offrynn kammweyth; hag ev a skoell an goes a-dro war an alter.

³Hag ev a offrynn oll an blonek anodho, an lost blonegek ha'n blonek a worher an pottys.

⁴Ha'n dhiwloneth ha'n blonek usi warnedha ogas dhe'n tenwennow, ha stagell an avi gans an dhiwloneth, ev a's kemmer dhe-ves.

⁵Ha'n oferyas a's lesk war an alter, offrynn dre dan dhe'n ARLOEDH. Offrynn kammweyth yw.

⁶Pub gorreydh yn mysk an oferysi a dheber anodho. Y fydh dybrys yn tyller sans. An moyha sans yw.

⁷Kepar dell yw an offrynn pegh, yndella yth yw an offrynn kammweyth. Yma an keth lagha ragdha aga dew. An oferyas a wra dehwelyans dredha a's pew.

⁸Ha'n oferyas a offrynn offrynn leskys a-barth neb gour, kneus an offrynn leskys a offrynnas a vydh ragdho ev y honan.

⁹Ha pub offrynn greun a vo pebys y'n forn, ha pup-tra a vo pareusys y'n badell-bobas po war an men-pobas a vydh rag an oferyas a wra an offrynn. Ragdho ev y fydh.

¹⁰Ha pub offrynn greun, kemmyskys gans oyl po sygh, a vydh rag mebyon Aron oll, an eyl kepar ha'y gila.

¹¹Hemm yw lagha sakrifis an offrynnow kres offrynnys dhe'n ARLOEDH.

¹²Mara'n offrynn avel grasyans, ev a offrynn gans sakrifis an grasyans tesennow rond a vara heb goell kemmyskys gans oyl, ha tesennow tanow a vara heb goell urys gans oyl, ha tesennow rond a vleus fin kemmyskys gans oyl.

¹³Gans sakrifis y offrynnow kres rag grasyans ev a offrynn tesennow rond a vara gwrys gans goell.

¹⁴Hag a'n re na, ev a dhre onan dhiworth oll y offrynnow, offrynn drehevys dhe'n ARLOEDH; ev a vydh rag an oferyas a skoell goes an offrynnow kres.

¹⁵Ha'n kig a'y sakrifis kres rag grasyans a vydh dybrys an keth jydh mayth yw offrynnys. Ny as ev travyth anodho bys y'n myttin.

¹⁶Mes mars yw sakrifis y offrynn der ambos po offrynn bolonjedhek, y fydh dybrys an keth jydh mayth offrynn y sakrifis, ha'n jydh a'y wosa y fydh dybrys an remenant anodho.

¹⁷Mes y'n tressa dydh remenant kig an sakrifis a vydh leskys dre dan.

¹⁸Ha mars eus neppyth a gig sakrifis y offrynnow kres dybrys an tressa dydh, ny vydh degemmerys na ny vydh reknys dhe neb a'n offrynn, ha ny vydh reknys dhodho; avel offrynn dhiworth neb a'n offrynn. Avlan vydh ha neb a'n deber a vydh kablus a'y gammweyth.

¹⁹Ny vydh dybrys kig re dochyas neppyth avlan. Leskys vydh dre dan. Mes an kig arall — pub den glan a yll dybri an kig na.

²⁰Mes ev neb a dheber neppyth a gig sakrifis an offrynnow kres a bew an ARLOEDH, hag ev avlan, an den ma a vydh treghys dhe-ves dhiworth y bobel.

²¹Ha mar tocchyo nebonan tra avlan pynag, kepar ha den a vo avlan po best avlan po neppyth kasadow a vo avlan, ha dybri kig sakrifis an offrynnow kres a bew an ARLOEDH, an den na a vydh treghys dhe-ves dhiworth y bobel.

²²Ha'n ARLOEDH a gewsis orth Moyses, ow leverel:

²³Kows orth mebyon Ysrael ow leverel: Na wrewgh hwi dybri blonek a sort vyth, ojyon, davas, na gaver.

²⁴Blonek best a verow y honan po yw skwardys gans bestes gwyls a yll bos usys yn neb fordh arall mes ny wrewgh hwi y dhybri.

²⁵Rag piwpynag a dheppro blonek best a veu offrynnys dre dan dhe'n ARLOEDH — neb a'n dheppro a vydh treghys dhe-ves dhiworth y bobel.

²⁶Ny wrewgh hwi dybri goes vyth yn oll agas trigvaow, naneyl a edhen nag a vest.

²⁷Piwpynag a dheber neppyth a woes, an keth henna a vydh treghys dhe-ves dhiworth y bobel.

²⁸Ha'n ARLOEDH a gewsis orth Moyses, ow leverel:

²⁹Kows orth mebyon Ysrael, ow leverel: Neb a offrynno sakrifis y offrynnow kres dhe'n ARLOEDH a dhre y ro dhe'n ARLOEDH a'n sakrifis a'y offrynnow kres.

³⁰Ev a dhre gans y dhiwdhorn y honan an offrynnow dre dan a'n ARLOEDH; ev a dhre an blonek gans an vronn, dhe wevya an vronn avel offrynn gwevys dherag an ARLOEDH.

³¹An oferyas a lesk an blonek war an alter, mes an vronn a vydh dhe Aron ha'y vebyon.

³²Hwi a re an vordhos dhyghow dhe'n oferyas avel offrynn drehevys dhiworth sakrifisow agas offrynnow kres.

³³Yn mysk mebyon Aron, neb a offrynn goes an offrynnow kres ha'n blonek a gemmer an vordhos dhyghow avel y rann.

³⁴Rag my re gemmeras bronn an offrynn gwevys ha mordhos an offrynn drehevys dhiworth mebyon Ysrael, dhiworth sakrifisow aga offrynnow kres ha'ga ri dhe Aron an oferyas ha'y vebyon der ordenans bys vykken dhiworth mebyon Ysrael.

³⁵Hemm yw rann Aron ha rann y vebyon a'n offrynnow dre dan a'n ARLOEDH, y'n jydh may fons profys dhe servya an ARLOEDH avel oferysi.

³⁶An ARLOEDH a erghis hemma dhe vos res dhedha gans mebyon Ysrael y'n jydh may hwrug aga untya, avel ordenans bys vykken dres aga henedhow.

³⁷Hemm yw lagha an offrynn leskys, an offrynn greun, an offrynn pegh, an offrynn kammweyth, ha'n offrynn urdhyans ha sakrifis an offrynnow kres.

³⁸An ARLOEDH a erghis hemma dhe Moyses war venydh Sinay y'n jydh mayth erghis dhe vebyon Ysrael may trollens aga offrynnow dhe'n ARLOEDH yn gwylvos Sinay.