Read Kernewek Levitikus 8 Bible Online

Levitikus 8 - Kernewek bible

Levitikus 8

¹Ha'n ARLOEDH a gewsis orth Moyses ow leverel,

²Kemmer Aron ha'y vebyon ganso ha'n dillas ha'n oyl untyans, ha lodhen rag an offrynn pegh, ha dew hordh ha kanstellas a vara heb goell;

³ha kuntell oll an kuntelles war-barth orth daras tylda an kuntelles.

⁴Ha Moyses a wrug dell erghis dhodho an ARLOEDH, ha'n kuntelles a dheuth war-barth dhe dharas tylda an kuntelles.

⁵Hag yn-medh Moyses dhe'n kuntelles, ‘Hemm yw an pyth a erghis an ARLOEDH may fe gwrys.’

⁶Ha Moyses a dhros Aron ha'y vebyon ha'ga golghi gans dowr.

⁷Ha ev a'n gwiskas y'n bows ha kelmi an grogys a-dro dhodho ha'y wiska y'n vantell ha gorra an efod warnodho ha kelmi grogys an efod a-dro dhodho.

⁸Hag ev a worras an lurik warnodho ha gorra ynno an Urim ha'n Thummim.

⁹Hag ev a worras an tulyfant war y benn ha war an tulyfant war y dal ev a worras an vedalenn owrek, an gurun sans, dell erghis an ARLOEDH dhe Moyses.

¹⁰Ha Moyses a gemmeras oyl an untyans hag untya an tabernakel ha pup-tra esa ynno ha'ga sanshe.

¹¹Hag ev a skoellyas rann anodho war an alter seythgweyth hag untya an alter hag oll an lestri anodho, ha'n wolghell ha'y sel, dh'aga sanshe.

¹²Hag ev a dhinewis rann a oyl an untyans war benn Aron ha'y untya dh'y sanshe.

¹³Ha Moyses a dhros mebyon Aron ha'ga gwiska yn powsyow, ha'ga grogysa gans grogysyow pann ha kelmi kappow warnedha, dell erghis an ARLOEDH dhe Moyses.

¹⁴Hag ev a dhros an lodhen rag an offrynn pegh, hag Aron ha'y vebyon a worras aga diwleuv war benn lodhen an offrynn pegh.

¹⁵Hag ev a'n ladhas; ha Moyses a gemmeras an goes ha'y worra gans y vys war gern an alter a-dro ha purhe an alter ha dinewi an goes war woeles an alter, dhe wul dehwelyans warnodho.

¹⁶Hag ev a gemmeras an blonek esa war an pottys ha stagell an avi ha'n dhiwloneth ha'ga blonek ha Moyses a's loskas war an alter.

¹⁷Mes ev a gowlloskas an lodhen, y gneus ha'y gig ha'y gawgh, yn-mes a'n kamp, dell erghis an ARLOEDH dhe Moyses.

¹⁸Hag ev a dhros hordh an offrynn leskys, hag Aron ha'y vebyon a worras aga diwleuv war benn an hordh.

¹⁹Hag ev a'n ladhas, ha Moyses a skoellyas an goes war an alter a-dro.

²⁰Hag ev a droghas an hordh yn temmyn ha Moyses a loskas an penn ha'n temmyn ha'n soev.

²¹Hag ev a wolghas an pottys ha'n garrow yn dowr, ha Moyses a loskas an hordh dien war an alter avel offrynn leskys, sawer plegadow, offrynn dre dan dhe'n ARLOEDH, dell erghis an ARLOEDH dhe Moyses.

²²Hag ev a dhros an hordh arall, hordh an urdhyans, hag Aron ha'y vebyon a worras aga diwleuv war benn an hordh.

²³Hag ev a'n ladhas, ha Moyses a gemmeras rann a'n goes ha'y worra war vin skovarn dhyghow Aron ha war veus y leuv dhyghow ha war veus y droes dyghow.

²⁴Hag ev a dhros mebyon Aron, ha Moyses a worras rann a'n goes war vin aga skovarn dhyghow ha war veus aga leuv dhyghow ha war veus aga throes dyghow, ha Moyses a skoellyas an goes war an alter a-dro.

²⁵Hag ev a gemmeras an blonek ha'n lost blonegek, hag oll an blonek war an pottys, ha stagell an avi ha'n dhiwloneth ha'ga blonek ha'n vordhos dhyghow.

²⁶Hag yn-mes a'n ganstell a vara heb goell esa dherag an ARLOEDH, ev a gemmeras unn desenn rond a vara heb goell, hag unn desenn rond a vara gwrys gans oyl, hag unn desenn danow, ha'ga gorra war an blonek ha war an vordhos dhyghow.

²⁷Hag ev a worras pup-tra war dhiwleuv Aron ha war dhiwleuv y vebyon, ha'ga gwevya dherag an ARLOEDH rag offrynn gwevys dherag an ARLOEDH.

²⁸Ha Moyses a's kemmeras dhiworth aga diwleuv ha'ga leski war an alter war an offrynn leskys. Offrynn urdhyans veu, sawer plegadow, offrynn dre dan dhe'n ARLOEDH.

²⁹Ha Moyses a gemmeras an vronn ha'y gwevya avel offrynn gwevys dherag an ARLOEDH. Rann Moyses ova a hordh an urdhyans, dell erghis an ARLOEDH dhe Moyses.

³⁰Ha Moyses a gemmeras rann a oyl an untyans hag a'n goes esa war an alter ha'y skoellya war Aron ha war y dhillas, ha war y vebyon ha war dhillas y vebyon ganso; hag ev a sanshas Aron, ha'y dhillas, ha'y vebyon, ha dillas y vebyon ganso.

³¹Hag yn-medh Moyses dhe Aron ha'y vebyon, ‘Bryjyewgh an kig orth daras tylda an kuntelles ha'y dhybri ena gans an bara usi yn kanstell an offrynn urdhyans, dell erghis vy, ow leverel, “Aron ha'y vebyon a'n deber.”

³²Ha'n pyth yw gesys a'n kig ha'n bara, hwi a lesk gans tan.

³³Ha dres seyth dydh nyns ewgh hwi yn-mes a dharas tylda an kuntelles erna vo kowlwrys dydhyow agas urdhyans, rag dres seyth dydh ev a wra agas urdhya.

³⁴Kepar dell wrug an jydh ma, yndella re erghis an ARLOEDH, dhe wul dehwelyans ragowgh.

³⁵Ytho hwi a drig orth daras tylda an kuntelles dydh ha nos dres seyth dydh, hag gwitha charj an ARLOEDH ma na verwowgh, rag yndella yth yw erghys dhymm.’

³⁶Ytho Aron ha'y vebyon a wrug pup-tra a veu erghys dre leuv Moyses.