Read Kernewek Yeremia 10 Bible Online

Yeremia 10 - Kernewek bible

Yeremia 10

¹Klewewgh an ger a gews an ARLOEDHdhywgh, A ji Ysrael.

²Yndellma y lever an ARLOEDH: Na dhyskewgh fordh an kenedhlow, ha na vedhewgh digolonnek orth arwoedhyow nev; rag an kenedhlow yw digolonnek orta.

³Rag ordenansow an bobel yw euver: gwydhenn a'n goeswik yw treghys, gweyth leuv an ser, gans an voel.

⁴I a's takel gans arghans ha gans owr; i a's takk gans kentrow ha gans mortholow ma na yll gwaya.

⁵Yth yns avel boekka yn gwel kukumbrow, ha ny yllons kewsel: res yw dhedha bos degys rag ny yllons kerdhes. Na vedhewgh ownek dhedha; rag ny yllons gul drog, na nyns eus ynna dhe wul da.

⁶Rag nyns eus nagonan avelos A ARLOEDH, ty yw meur, ha'th hanow yw meur y alloes.

⁷Piw ny berth own ahanas, A Vyghtern an kenedhlow? Rag henn yw an pyth a dhegoedh dhis: yn mysk tus fur an kenedhlow, hag yn oll aga gwlaskordhow, nyns eus nagonan haval dhis.

⁸Mes i yw ha gokki ha foll; dyskans idolys a brenn yw euveredh.

⁹Arghans mortholys yw dres a-dhiworth Tarshish, hag owr a-dhiworth Ufaz, gweyth an ser, hag a dhiwleuv an teudher; glas ha purpur yw aga gwisk: gweyth an seri sleygh yns.

¹⁰Mes an ARLOEDH yw gwir Dhuw, ev yw an Duw bew, ha myghtern heb diwedh: orth y sorr an norvys a gren, ha ny yll an kenedhlow perthi y sorrvann.

¹¹Yndella hwi a lever dhedha: An duwow na wrug an nevow ha'n nor, i a dhe goll a-dhiworth an nor hag a-dhann an nevow ma.[19]

¹²Ev yw neb a wrug an nor der y nerth, ev re fondyas an nor der y furneth hag ystynn an nevow der y dhoethter.

¹³Orth son y lev, yma tervans dowrow y'n nevow, hag ev a wra niwlow dhe yskynna a bennow an norvys; ev a wra lughes gans glaw, ha dri yn-rag gwynsow a'y dresorvaow.

¹⁴Pubonan yw gokki ha heb skians: pub teudher a gemmer meth a'y imaj gravys; rag y imaj teudhys yw fals, ha nyns eus anall ynna.

¹⁵Euver yns, pythow skornys: yn termyn aga hessydhyans i a dhe goll.

¹⁶Nyns yw rann Yakob avella: rag ev yw formyer pup-tra hag Ysrael yw gwelenn y eretons: ARLOEDH an luyow yw y hanow.

¹⁷Kuntell dha wara a'n dor, ty neb usi trigys yn-dann omsettyans.

¹⁸Rag yndellma y lever an ARLOEDH: Otta, my a wra tewlel yn-mes annedhysi an tir y'n termyn ma, ha'ga arvedh, ma'n kevons yn hwir.

¹⁹Go-vy a'm pystik! Ow goli yw ankensi: mes my a leveris, Yn hwir hemm yw ow duwon, ha res yw dhymm y berthi.

²⁰Ow thylda yw diswrys, hag oll ow herdyn yw terrys: ow fleghes yw gyllys ahanav, ha nyns esons namoy: nyns eus nagonan dhe lesa ow thylda namoy, na dhe sevel ow kroglennow.

²¹Rag an vugeledh yw gokki, ha ny hwilsons an ARLOEDH; rakhenna ny siwenons hag oll aga flokkys a vydh skattrys.

²²Otta, son nowodhow ow tos: ha freudh meur yn-mes a dir an gogledh, dhe wul sitys Yuda ynyal, ha fow owrgeun.

²³A ARLOEDH, my a woer nag yw fordh den yn-dann y rewl y honan: ny yll gour marwel, dell gerdh, gidya y gammow.

²⁴A ARLOEDH, gwra ow heredhi, mes gans breus; Na'n gwra yn dha sorr, ma na'm drylli dhe dravyth.

²⁵Dinew dha gonnar war an kenedhlow na'th aswonnons, ha war an teyluyow na elow war dha hanow: rag i re dhevoryas Yakob; i re'n devoryas ha'y gowldhybri, ha gul dh'y annedh bos ynyal.