Read Kernewek Yeremia 13 Bible Online

Yeremia 13 - Kernewek bible

Yeremia 13

¹Yndellma y leveris an ARLOEDH dhymm, ‘Ke dhe brena grogys a lien dhis, ha'y worra war dha dhiwglun, mes na'n trogh yn dowr.’

²Ytho my a brenas grogys herwydh ger an ARLOEDH, ha'y worra war ow diwglun.

³Ha ger an ARLOEDH a dheuth dhymm an eyl prys, ow leverel,

⁴‘Kemmer an grogys a brensys, usi war dha dhiwglun, ha sav, ke dhe'n Ewfrates, ha'y gudha ena yn fols y'n garrek.’

⁵Ytho my eth, ha'y gudha ryb an Ewfrates, par dell worhemmynnis an ARLOEDH dhymm.

⁶Hag y hwarva wosa lies dydh, an ARLOEDH dhe leverel dhymm, ‘Sav, ke dhe'n Ewfrates, ha kemmer an grogys alena, a worhemmynnis dhis y gudha ena.’

⁷Ena my eth dhe'n Ewfrates, ha palas, ha kemmeres an grogys a'n tyller le ma'n kudhis: hag otta, an grogys o podrek, nyns o da rag travyth.

⁸Ena ger an ARLOEDH a dheuth dhymm, ow leverel:

⁹Yndellma y lever an ARLOEDH: War-lergh an vaner ma my a wra diswul goeth Yuda, ha goeth meur Yerusalem.

¹⁰An debel bobel ma, a nagh klewes ow geryow, hag a gerdh yn gorthter aga holonn, ha mos war-lergh duwow erell, ha'ga servya, ha'ga gordhya, a vydh avel an grogys ma, nag yw da rag travyth.

¹¹Rag dell glen an grogys orth diwglun gour, yndella my re wrug oll chi Ysrael hag oll chi Yuda glena dhymm, yn-medh an ARLOEDH, may fons dhymm pobel, ha hanow, ha gormel, ha glori: mes ny glewsons.

¹²Ytho ty a gews dhedha an ger ma: Yndellma y lever an ARLOEDH, Duw Ysrael: Pub kostrel a vydh lenwys gans gwin; hag i a lever dhis, ‘A dybydh na wodhon yn sertan y tegoedh pub kostrel bos lenwys gans gwin?’

¹³Ena ty a lever dhedha: Yndellma y lever an ARLOEDH: Otta, my a wra lenwel oll annedhysi an tir ma, hwath an vyghternedh esedhys war dron Davydh, ha'n oferysi, ha'n brofoesi, hag oll annedhysi Yerusalem, gans medhwynsi.

¹⁴Ha my a's tewl an eyl erbynn y gila, hwath an tasow ha'n vebyon war-barth, yn-medh an ARLOEDH: ny sparyav, na kemmeres piteth, na truedh, mes aga distrui.

¹⁵Klewewgh, ha goslowewgh; na vedhewgh goethus: rag an ARLOEDH re gewsis.

¹⁶Rewgh gordhyans dhe'n ARLOEDH agas Duw, kyns ev dhe dhri tewolgow, ha kyns agas treys dhe drebuchya aga desedha war an menydhyow tewl; ha pan esowgh ow hwilas golow, ev a'n treyl dhe skeus ankow, ha'y wul tewolgow down.

¹⁷Mes mar ny vynnowgh y glewes, ow enev a wra oela yn tylleryow kevrinek drefenn agas balghder; ha'm lagas a wra oela yn hwerow, ha resek gans dagrow, drefenn flokk an ARLOEDH dhe vos kemmerys avel kethyon.

¹⁸Lavar dhe'n myghtern ha dhe vamm an myghtern, ‘Omuvelhewgh, esedhewgh: rag kurun agas golewder re dhiyskynnas a-dhiwar agas penn.’

¹⁹Sitys an Negeb a vydh degeys, heb denvyth dh'aga igeri: Yuda a vydh degys dhe-ves yn divroedh, degys vydh yn tien yn divroedh.

²⁰Drehevewgh agas dewlagas, ha gweles an re a dheu a'n gogledh: ple'ma an flokk a veu res dhis, dha flokk teg?

²¹Pandr'a leverydh pan y'th kessydh? rag ty re's dyskas dhe vos dha geffrysysi, avel penn warnas: a ny wra gloesow dha dhalghenna, avel gwreg yn gwelivos?

²²Ha mar leverydh y'th kolonn, ‘Prag y teu an traow ma warnav?’ Rag meurder dha gammhynseth yw diskudhys dha lostennow, ha dha seudhelyow noeth.

²³A yll an Ethiopyas chanjya y groghen, po an lewpard y vryghi? Ytho a yllowgh hwi ynwedh gul da, yw usys dhe wul drog?

²⁴Ytho my a's skatter avel an kulyn yw hwythys gans gwyns an gwylvos.

²⁵Homm yw dha gevrenn, dha rann a vusuris dhis, yn-medh an ARLOEDH; drefenn ty dhe'm ankevi, ha fydhya yn gowegneth.

²⁶Ytho my ow honan a wra drehevel dha lostennow dres dha fas, may fydh gwelys dha veth.

²⁷My re welas dha avoutri, ha'th kryghias, avlander dha horyans, dha daklow kasadow war an breow y'n gwel. Go-jy, A Yerusalem! Pes termyn kyns dha vos glan?