Read Kernewek Yeremia 14 Bible Online

Yeremia 14 - Kernewek bible

Yeremia 14

¹Ger an ARLOEDH a dheuth dhe Yeremia a-dro dhe'n syghor:

²Yuda a alar, divew yw hy yetow; esedhys yns war an dor yn galarwisk; ha kri Yerusalem res eth yn-bann.

³Aga ugheloryon re dhannvonas aga gwesyon rag dowr: i a dheuth dhe'n dowrarghow, ny gavons dowr; i a dhehwelis gwag aga lestri; methek ens ha konfondys, hag a gudhas aga fenn.

⁴Drefenn bos krin an gweres rag nyns esa glaw war an dor, methek o an diogyon, i a gudhas aga fenn.

⁵Ye, an ewik ynwedh a dhineythis y'n gwel, ha gasa hy askorr, drefenn nag esa gwels.

⁶Ha'n asenes gwyls a sevis y'n ugheldiryow moel, ow frikhwytha an gwyns avel owrgeun; aga lagasow a fyllis, drefenn nag esa losow.

⁷Kyn hwra agan drogoberow doen dustuni er agan pynn, A ARLOEDH, gwra neppyth a-barth dha hanow; rag agan dislelder yw meur; ni re beghas er dha bynn.

⁸A wovenek Ysrael, y selwador yn termyn ahwer, prag y tal dhis bos avel alyon y'n tir, hag avel tremenyas a dreyl a-denewen dhe spena an nos?

⁹Prag y fydhydh avel gour penndegys, avel gour galloesek na yll sawya? Mes yth esos yn agan mysk, A ARLOEDH, ha dha hanow re beu gelwys warnan; na wra agan gasa.

¹⁰Yndellma y lever an ARLOEDH dh'y bobel: Yn hwir i re garas gwandra, ny fronnsons aga threys, yndella ny's degemmer an ARLOEDH; lemmyn ev a wra perthi kov a'ga drogoberow, ha kessydhya aga feghosow.

¹¹Ena an ARLOEDH a leveris dhymm: Na wra pysi rag dader an bobel ma.

¹²Pan wrons penys, ny glewav aga kri; ha pan offrons offrynn leskys hag offrynn greun, ny's degemmerav: mes my a's distru der an kledha, ha gans an divoetter, ha gans an pla.

¹³Ena my a leveris, ‘A Arloedh DUW! Otta, an brofoesi a lever dhedha, “Ny welowgh an kledha, na hwath ny'gas beus divoetter; mes my a re dhywgh kres sur y'n tyller ma.” ’

¹⁴Ena an ARLOEDH a leveris dhymm: An brofoesi a brofoes gowyow y'm hanow vy: ny's dannvenis, na ny gorhemmynnis dhedha, na kewsel dhedha: i a brofoes dhywgh fals welesigeth ha koeg dhewinieth, ha toell aga holonn.

¹⁵Ytho yndellma y lever an ARLOEDH a-dro dhe'n brofoesi a brofoes y'm hanow vy, kyn na's dannvenis, mes hwath i a lever, ‘Ny vydh kledha na divoetter y'n tir ma’: Dre gledha ha divoetter y fydh distruys an brofoesi na.

¹⁶Ha'n bobel dhe neb y profoesons a vydh tewlys yn-mes yn stretow Yerusalem drefenn an divoetter ha'n kledha; ha ny vydh nagonan dh'aga ynkleudhyas, i, na'ga gwragedh, na'ga mebyon, na'ga myrghes: rag my a dhiver aga drogedh warnedha.

¹⁷Ytho ty a lever an ger ma dhedha: Diveres ow lagas dagrow yn-nans nos ha dydh, na hedhens: rag an wyrghes, myrgh ow fobel, yw gweskys gans goli meur, gans strekys pur ankensi.

¹⁸Mars av yn-rag dhe'n mes, ott an re ledhys gans an kledha! Ha mars entrav a-ji dhe'n sita, ott an re yw klav gans divoetter. Rag an profoes ha'n oferyas re wandras dhe dir na wodhons.

¹⁹A wruss'ta denagha Yuda yn tien? A wrug dha enev kasa Sion? Prag y hwruss'ta agan gweskel ma na vydh yaghheans dhyn? Ni a hwilas kres mes nyns eus dader: rag termyn yeghes, hag otta browagh.

²⁰Ni a aswonn, A ARLOEDH, agan drogedh, kammhynseth agan tasow, rag ni re beghas er dha bynn.

²¹Na wra agan kasa, a-barth dha hanow; na dhisenor tron dha wolewder; porth kov, na dorr dha gevambos genen.

²²Eus yn mysk idolyow an kenedhlow nebonan a yll gwruthyl glaw? Po a yll an nevow aga honan ri kowasow? A nyns yw ty, A ARLOEDH agan Duw? Ytho yma agan govenek ynnos, rag ty re wrug oll an traow ma.