Read Kernewek Yeremia 15 Bible Online

Yeremia 15 - Kernewek bible

Yeremia 15

¹Ena an ARLOEDH a leveris dhymm: Mar saffa Moyses ha Samuel a-ragov, hwath ny allsa ow holonn treylya war-tu an bobel ma; gwra aga dannvon mes a'm golok, ha'ga gasa dhe vones.

²Hag y hwyrvydh, mar leverons dhis, ‘Ple'th en alemma?’ Ena ty a lever dhedha: Yndellma y lever an ARLOEDH: Seul yw rag mernans, dhe'n mernans; ha seul yw rag an kledha, dhe'n kledha; ha seul yw rag an divoetter, dhe'n divoetter; ha seul yw rag an gethneth, dhe'n gethneth.

³Ha my a wra ordena warnedha peswar eghenn a derroes, yn-medh an ARLOEDH: an kledha dhe ladha, ha'n keun dhe skwardya, hag ydhyn an nev, ha bestes an nor, dhe dhevorya ha dhe dhistrui.

⁴Ha my a wra dhedha bos euth rag oll gwlaskordhow an nor, drefenn Manasse mab Hezekia myghtern Yuda, rag an pyth a wrug ev yn Yerusalem.

⁵Rag piw a gemmer truedh ahanas A Yerusalem? po piw a'th kyn? po piw a geskodhev genes dhe wovynn a-dro dhe'th yeghes?

⁶Ty re'm denaghas, yn-medh an ARLOEDH, ty yw gyllys war-dhelergh: ytho my a ystynn ow leuv er dha bynn, ha'th tistrui; skwith ov ow koedha yn edrek.

⁷Ha my a's gwynsell gans forgh-dhrushya yn yetow an tir; my a's gwrug anvap, my a dhistru ow fobel, a-ban na dhehwelsons a'ga fordhow.

⁸Aga gwedhwesow yw ynkressys dhymm moy es tewes an moryow; my re dhros erbynn mammow an wer yowynk diswrier dhe hanter-dydh: my re wrug skruth hag euth dhe goedha distowgh warnedha.

⁹Hi neb re dhineythis seyth a vydh ydhil: hi re dhyenas; hy howl yw sedhys pan yw hwath dydh; hi re borthas meth ha bismer; ha'n re yw gesys anedha my a dhannvon dhe'n kledha a-rag aga eskerens, yn-medh an ARLOEDH.

¹⁰Go-vy, ow mamm, ma'm omdhuges, gour a strif ha gour a gedrynn dhe oll an nor! Ny res vy prestenn, na ny brestis tus dhymmo vy: mes hwath peub anedha a'm millik.

¹¹An ARLOEDH a leveris, Sur, my a'th tannvon dhe-ves rag dha les dha honan, devri my a wra dhe'n eskar pledya ragos yn termyn drogedh hag yn termyn galar.

¹²A yll horn terri horn an gogledh, ha brons?

¹³Dha gevoeth ha'th tresoryow a rov avel preydh heb kost, rag oll dha beghosow, dres oll dha diredh.

¹⁴Ha my a wra dhis servya[21] dha eskerens yn tir na aswonnydh: rag tan yma enowys y'm sorr, hag a wra leski warnas.

¹⁵A ARLOEDH, ty a woer: porth kov ahanav, ha'm vysytya, ha'm diella war ow helghysi; na'm deg vy dhe-ves y'th hirwodhevyans; godhvydh a'th wovis jy my dhe wodhevel keredh.

¹⁶Dha eryow a veu kevys, ha my a's dybris: ha'th heryow o lowender dhymm ha heudhder ow holonn: rag dha hanow re beu gelwys warnav, A ARLOEDH, Duw an luyow.

¹⁷Ny esedhis yn kuntelles an re a wra ges, na ny lowenhis; my a esedhas ow honan drefenn dha leuv: rag ty a'm lenwis a sorrvann.

¹⁸Prag yth yw ow dolor heb diwedh, ha'm goli yw mar dhrog ma na yll bos yaghhes? A vydhydh dhymm yn tien avel gover gowek, hag avel dowrow a fyll?

¹⁹Rakhenna yndellma y lever an ARLOEDH: Mar tehwelydh, ena my a'th taskemmer, ha ty a sev arta a-ragov: ha mar leverydh an pyth yw drudh a-der an pyth yw divri, ty a vydh avel leveryas ragov: gas i dhe dhehweles dhiso jy, mes ty na dhehwel dhedha i.

²⁰Ha my a'th wra dhe'n bobel ma fos kerys a vrons; hag i a omladh er dha bynn, mes ny yllons dha fetha, rag my a vydh genes dhe'th selwel ha'th telivra, yn-medh an ARLOEDH.

²¹Ha my a'th teliver yn-mes a leuv a'n re dhrog, ha my a'th taspren yn-mes a leuv turans.