Read Kernewek Yeremia 16 Bible Online

Yeremia 16 - Kernewek bible

Yeremia 16

¹Ger an ARLOEDH a dheuth dhymm, ow leverel,

²Ny gemmerydh dhis gwreg, na ny's tevydh mebyon na myrghes y'n tyller ma.

³Rag yndellma y lever an ARLOEDH a-dro dhe'n vebyon hag a-dro dhe'n myrghes yw genys y'n tyller ma, hag a-dro dhe'n mammow a's dug, hag a-dro dhe'n tasow a's dineythis y'n tir ma:

⁴I a verow a glevesow marwel; ny vydh kynvann ragdha, na ny vydhons ynkleudhys; mes i a vydh avel teyl war enep an dor. Hag i a vydh distruys gans an kledha, ha gans divoetter; ha'ga horfow a vydh karyn rag ydhyn an nev ha bestes an nor.

⁵Rag yndellma y lever an ARLOEDH: Na enter yn chi an kynvann, na mos dhe alari na'ga hyni: rag my re gemmeras ow kres a-dhiworth an bobel ma, yn-medh an ARLOEDH, an tregeredh ha'n truedh.

⁶Ha'n re veur ha'n re vyghan a verow y'n tir ma: ny vydhons ynkleudhys na ny vydh kynvann ragdha, na ny wrons omhakkya na omvoelhe ragdha.

⁷Ny wrons terri bara rag an kyner, dhe brofya keskalar rag an den marow; na ny wra denvyth ri dhedha an hanaf a gonfort dhe eva rag aga thas po rag aga mamm.

⁸Ynwedh nyns edh yn chi a gevewya, dhe esedha gansa dhe dhybri ha dhe eva.

⁹Rag yndellma y lever ARLOEDH an luyow, Duw Ysrael: Otta, my a bellha dhiworth an tyller ma, yn agas dydhyow hag a-rag agas lagasow, lev lowender ha lev heudhder, lev an gour pries ha lev an venyn bries.

¹⁰Ha pan dhiskwedhydh dhe'n bobel ma oll an geryow ma, hag y leverons dhis, ‘Prag y leveris an ARLOEDH oll an drogedh meur er agan pynn? po pyth yw agan kammhynseth? ha pyth yw agan pegh a wrussyn erbynn an ARLOEDH agan Duw?’

¹¹ena ty a lever dhedha: Drefenn agas tasow dhe'm forsakya, yn-medh an ARLOEDH, ha kerdhes gans duwow erell, ha'ga servya i, ha'ga gordhya i, ha'm forsakya, ha ny withsons ow lagha;

¹²ha hwi re omdhug gweth ages agas tasow; rag otta, hwi a gerdh peub herwydh gorthter y golonn dhrog, ow nagha goslowes orthiv.

¹³Ytho my a's tewl yn-mes a'n tir ma bys yn tir na aswonnowgh, naneyl hwi na'gas tasow, hag ena hwi a wra servya duwow erell dydh ha nos; rag ny gemmerav truedh ahanowgh.

¹⁴Rakhenna ott, an dydhyow a dheu, yn-medh an ARLOEDH, pan na vydh leverys namoy, ‘Dell vew an ARLOEDH, a dhros mebyon Ysrael yn-mes a bow Ejyp’;

¹⁵Mes, ‘An ARLOEDH a vew, a dhros mebyon Ysrael a dir an gogledh, hag a diryow oll ma's fesyas’; ha my a's dre arta dhe'n tir a res dh'aga thasow.

¹⁶Otta, my a dhannvon war-lergh lies pyskador, yn-medh an ARLOEDH, hag i a wra aga hachya; hag a-wosa my a dhannvon lies helghor, hag i a's helgh a-dhiworth pub menydh ha pub bre, hag yn-mes a folsyow an kerrek.

¹⁷Rag yma ow dewlagas war oll aga fordhow: nyns yns kudhys a'm golok, na nyns yw aga hammhynseth kudhys a'm dewlagas.

¹⁸Hag yn kynsa my a attal rag aga hammhynseth ha'ga fegh yn tewblek; drefenn i dhe dhefola ow thir gans korfow aga idolys, ha lenwel ow eretons gans aga thaklow kasadow.

¹⁹A ARLOEDH, ow nerth, hag ow skons, ha'm skovva yn dydh an galar, an kenedhlow a wra dos dhis a-dhiworth pennow an nor, ha leverel: Yn sur agan tasow re eritas gowyow, euveredh ha traow heb les.

²⁰A yll den gul duwow dh'y honan? Nyns yw an re ma duwow!

²¹‘Ytho, ott, an unn prys ma my a wra dhedha aswonn, my a wra dhedha aswonn ow leuv ha'm nerth; hag i a wra godhvos bos ow hanow an ARLOEDH.’