Read Kernewek Yeremia 17 Bible Online

Yeremia 17 - Kernewek bible

Yeremia 17

¹Pegh Yuda yw skrifys gans toul-skrifa a horn, ha gans poynt a adamant gravys yw war legh aga holonn, ha war gern agas alteryow,

²rag bos aga mebyon ow perthi kov a'ga alteryow ha'ga Asherim ryb an gwydh glas war an breow ughel,

³ha war an menydhyow y'n mes. Dha wolusogneth ha'th tresoryow oll y rov dhe breydh, avel gober rag pegh, yn oll dha diryow.[22]

⁴Ha ty a lews dha leuv dhiworth dha eretons a res dhis; ha my a'th wra dhe servya dha eskerens y'n tir na aswonnydh: rag an tan re enowsowgh y'm sorr, a lesk bys vykken.

⁵Yndellma y lever an ARLOEDH: Milligys a vydh an gour a fydh yn den, ha gul kig y nerth, ha may treyl y golonn a-dhiworth an ARLOEDH.

⁶Ev a vydh avel merywenn y'n difeyth, ha ny wel pan dheu dader; mes trigys vydh yn tylleryow krin an difeyth, yn tir hoelanek nag yw annedhys.

⁷Bennigys yw an gour a fydh y'n ARLOEDH, may ma y fydhyans y'n ARLOEDH.

⁸Rag ev a vydh avel gwydhenn plynsys ryb dowr, ow lesa hy gwreydh ryb an dowrhyns, mes ny berth own pan dheu an toemmder, mes hy delyow a vydh glas; hag yn blydhen syghor ny'n jevydh fienasow, na ny hedh a dhoen frut.

⁹An golonn yw fel dres pup-tra, ha drog dres remedi: piw a's aswonn?

¹⁰My an ARLOEDH a hwither an golonn, ha previ an dhiwloneth, dhe ri dhe beub herwydh y fordhow, ha herwydh frut y oberow.

¹¹Dell esedh an rugyar, heb gori; yndellma yw an re a wayn golusogneth, heb ewnder; yn hanter y dhydhyow hi a'n gas, hag yn y dhiwedh ev a vydh foll.

¹²Tron gloryus, ughel a'n dallethvos yw tyller agan sentri.

¹³A ARLOEDH, govenek Ysrael, peub a'th forsak a vydh methek, ha'n re a dreyl a-dhiworthiv a vydh skrifys y'n dor, drefenn i dhe forsakya fenten an dowrow bew, an ARLOEDH.

¹⁴Yaghha vy, A ARLOEDH, ha my a vydh yaghhes; salw vy ha my a vydh selwys: rag ty yw ow gormel.

¹⁵Ottensi ow leverel dhymm, ‘Ple'ma ger an ARLOEDH? Des lemmyn!’

¹⁶Mes my, ny fistenis a vones bugel dhe'th siwya,[23] na ny hwensis dydh an anfeusi; ty a woer: an pyth a dheuth a'm diwweus a veu a-rag dha wolok.

¹⁷Na vydh browagh dhymm: ty yw ow skovva yn dydh an drogedh.

¹⁸Bedhens methek an re a'm helgh, mes na'm gas vy dhe vos methek: gas i dhe vos dyegrys, mes na as vy dhe vos dyegrys; dro warnedha dydh an drogedh ha'ga distrui gans distruyans dewblek.

¹⁹Yndellma y leveris an ARLOEDH dhymm: Ke ha sevel yn yet mebyon an bobel, dredhi mayth enter myghternedh Yuda, ha dredhi mayth ons yn-mes, hag yn yetow oll Yerusalem,

²⁰ha lever dhedha: Klewewgh ger an ARLOEDH, hwi vyghternedh Yuda, hag oll Yuda, hag oll annedhysi Yerusalem, a enter der an yetow ma.

²¹Yndellma y lever an ARLOEDH: Gwaytyewgh, rag agas enevow, na dhegewgh begh yn dydh an sabot, na'y dri dre yetow Yerusalem;

²²na na dhegewgh begh yn-mes a'gas chi y'n sabot, na na wrewgh ober, mes sanshewgh dydh an sabot, dell worhemmynnis dh'agas tasow.

²³Mes ny woslowsons, na plegya aga skovarn, mes kaleshe aga gilbenn, ma na glewsons, na degemmeres dyskybleth.

²⁴Mes mar koslewowgh orthiv, yn-medh an ARLOEDH, ha mar ny dhegewgh begh dre yetow an sita yn dydh an sabot, mes sanshe dydh an sabot, heb gul ober vytholl ynno,

²⁵ena yth enter dhe yetow an sita ma myghternedh ha pennsevigyon esedhys war dron Davydh, ow marghogeth yn charettow ha war vergh, i ha'ga fennsevigyon, gwer Yuda, hag annedhysi Yerusalem; ha'n sita ma a vydh annedhys bys vykken.

²⁶Hag i a wra dos a-dhiworth sitys Yuda, ha'n tylleryow a-dro dhe Yerusalem, hag a-dhiworth tir Benyamin, ha'n Shefela, hag a'n vro venydhyek, hag a'n dhyghowbarth, ow tri offrynnow leskys, ha sakrifisow, hag offrynnow greun, ha frankynkys, hag ow tri sakrifisow gormel, bys yn chi an ARLOEDH.

²⁷Mes mar ny woslewowgh orthiv, dhe sanshe dydh an sabot, ha ma na degowgh begh owth entra dhe yetow Yerusalem ganso yn dydh an sabot, ena my a enow tan yn hy yetow hag y hwra distrui palesyow Yerusalem, ha ny vydh difeudhys.