Read Kernewek Yeremia 22 Bible Online

Yeremia 22 - Kernewek bible

Yeremia 22

¹Yndellma y lever an ARLOEDH: Ke yn-nans dhe ji myghtern Yuda ha kewsel ena an ger ma,

²ha lavar, Klew ger an ARLOEDH, A vyghtern Yuda esedhys war dron Davydh, ty ha'th servysi ha dha bobel neb a enter a-ji dhe'n yetow ma:

³Yndellma y lever an ARLOEDH: Gwrewgh gwirvreus hag ewnder, ha delivrewgh a-dhiworth dorn an arwasker an den a veu dalghennys. Ha na wrewgh kammhynseth na freudh dhe'n alyon, an omdhivas, na'n wedhwes, po skoellya goes gwiryon y'n tyller ma.

⁴Rag mar kwrewgh herwydh an ger ma, ena a-ji dhe yetow an chi ma myghternedh a enter neb a esedh war dron Davydh, ow marghogeth yn charettow ha war vergh, i ha'ga servysi, ha'ga fobel

⁵Mes mar ny woslewowgh orth an geryow ma, my a de re'm honan, yn-medh an ARLOEDH, y fydh an chi ma magor.

⁶Rag yndellma y lever an ARLOEDHa-dro dhe ji myghtern Yuda: Ty yw avel Gilead dhymm, avel penn Lebanon; byttegyns my a'th wra difeyth, sitys anannedhys.

⁷Ha my a bareus distruoryon er dha bynn, peub gans y arvow; i a derr dha geder dewisys ha'ga thewlel y'n tan.

⁸Ha lies kenedhel a dremen an sita ma, ha leverel an eyl dh'y gila, ‘Prag y hwrug an ARLOEDHyndellma dhe'n sita veur ma?’

⁹Ena i a worthyp, Drefenn i dhe asa kevambos an ARLOEDH aga Duw ha gordhya duwow erell, ha'ga servya.

¹⁰Na oelewgh rag an marow,[26] na kyni ragdho; mes oelewgh ragdho ev[27] neb a yn-mes, rag ny dhehwel namoy, na gweles tir y enesigeth.

¹¹Rag yndellma y lever an ARLOEDH a-dro dhe Shallum mab Yosia myghtern Yuda a reynyas yn le Yosia, hag eth yn-mes a'n tyller ma; ny dhehwel omma arta,

¹²mes ev a verow y'n tyller ma'n dugons yn keth, ha ny wel an tir ma namoy.

¹³Go-ev a dhrehav y ji dre anewnder, ha'y jambouryow dre gammhynseth; neb a wra dh'y gentrevek lavurya heb gober, heb ri travyth dhodho rag y lavur;

¹⁴neb a lever, ‘My a dhrehav dhe'm honan chi efan gans chambouryow gwarthav ledan’, hag a dregh fenestri ragdho, ha'y nen a gederwydh, hag urys gans vermeyl.

¹⁵A wre'ta reynya drefenn ty dhe dhrehevel gans keder moy es dell wra tus erell? A ny wrug dha das dybri hag eva, ha gul gwirvreus hag ewnder? Ena yth o da ganso.

¹⁶Ev a varnas ken an boghosek ha'n edhommek; hag ena yth o da ganso. A nyns yw hemma ow aswonn? yn-medh an ARLOEDH.

¹⁷Mes nyns yw dha dhewlagas ha'th kolonn marnas rag gwayn anewn, ha rag skoellya goes gwiryon, ha rag gul arwask ha freudh.

¹⁸Ytho, yndellma y lever an ARLOEDH a-dro dhe Yehoyakim mab Yosia myghtern Yuda: Ny alarons ragdho, ow leverel, ‘Ogh ow broder!’ po ‘Ogh ow hwoer!’ Ny alarons ragdho, ow leverel, ‘Ogh arloedh!’ po, ‘Ogh y veuredh!’

¹⁹Ev a vydh ynkleudhys gans ynkleudhyans asen, draylys yn-rag ha tewlys a-ves dhe yetow Yerusalem.

²⁰Yskynn bys yn Lebanon ha kri; ha drehav dha lev yn Bashan, kri a-dhiworth Abarim; rag oll dha garoryon yw distruys.

²¹My a gewsis er dha bynn y'th siwena, mes ty a leveris, ‘Ny woslowav.’ Hemma re beu dha fordh a'th yowynkneth, rag ny woslewsys orth ow lev.

²²An gwyns a dheber oll dha vugeledh, ha dha garoryon a yn kethneth; ena ty a' fydh meth ha disenor drefenn dha dhrogedh.

²³A annedhyades Lebanon neythys y'n kederwydh, assa wre'ta kyni pan dheu gloesow warnas, poen avel gwreg yn gwelivos!

²⁴Dell vewav, yn-medh an ARLOEDH, kyn fe Konia mab Yehoyakim myghtern Yuda bysow ow leuv dhyghow, hwath alena my a'th torrsa

²⁵ha dha ri yn dorn an re a hwila dha vewnans, hag yn dorn an re a berthydh own anedha — yn dorn Nebukadnessar myghtern Babylon, hag yn dorn an Kaldeanys.

²⁶Ha my a'th tewl yn-mes, ha'th vamm a'th dineythis, bys yn pow arall, le ma na veus dineythys, hag ena ty a verow.

²⁷Mes ny dhehwelons dhe'n tir may yeunons dehweles dhodho.

²⁸Yw an gour ma, Konia, pott pri terrys, lester ma nag eus plesour ynno? Prag yth yns tewlys yn-mes, ev ha'y has, ha tewlys yn tir na aswonnons?

²⁹A dor, dor, dor, klew ger an ARLOEDH.

³⁰Yndellma y lever an ARLOEDH, Skrifewgh an gour ma avel anvap, gour na siwen yn y dhydhyow; rag ny siwen nagonan a'y has, dhe esedha war dron Davydh, na rewlya arta yn Yuda.