Read Kernewek Yeremia 26 Bible Online

Yeremia 26 - Kernewek bible

Yeremia 26

¹Yn dalleth reyn Yehoyakim mab Yosia myghtern Yuda y teuth an ger ma a-dhiworth an ARLOEDH, ow leverel:

²Yndellma y lever an ARLOEDH: Sav yn klos chi an ARLOEDH, ha kows dhe oll sitys Yuda hag a dheu dhe wordhya yn chi an ARLOEDH; kows dhedha oll an geryow a worhemmynnav dhis; na as ger vyth mes.

³Martesen i a woslow, ha pub den oll a dreyl a-dhiworth y fordh dhrog may treylyav ow brys a-dro dhe'n anfeusi a dewlav dri warnedha drefenn aga drog wriansow.

⁴Ty a lever dhedha, Yndellma y lever an ARLOEDH: Mar ny woslewowgh orthiv, dhe gerdhes yn ow lagha hag a worris a-ragowgh,

⁵dhe glewes geryow ow servysi an brofoesi re dhannvenis dhywgh, orth aga dannvon arta hag arta, mes ny woslewsowgh;

⁶ena my a wra an chi avel Shilo ha gul an sita ma bos molleth dhe oll genedhlow an nor.

⁷Ytho an oferysi ha'n brofoesi hag oll an bobel a glewas Yeremia ow kewsel an geryow ma yn chi an ARLOEDH.

⁸Ha pan worfennas Yeremia ow kewsel pup-tra a worhemmynnis an ARLOEDH dhodho, ena an oferysi ha'n brofoesi hag oll an bobel a'n synsis, ow leverel, ‘Ty a verow yn sur!

⁹Prag y profoessys yn hanow an ARLOEDH, ow leverel, “An chi ma a vydh avel Shilo, ha'n sita ma a vydh ynyal, heb annedhyas”?’ Hag oll an bobel a omguntellas a-dro dhe Yeremia yn chi an ARLOEDH.

¹⁰Pan glewas pennsevigyon Yuda an traow ma, i a dheuth yn-bann a-dhiworth chi an myghtern dhe ji an ARLOEDH hag esedha yn entrans yet nowydh chi an ARLOEDH.

¹¹Ena an oferysi ha'n brofoesi a gewsis dhe'n bennsevigyon ha dhe oll an bobel, ow leverel, ‘An gour ma a dhervynn an mernans drefenn ev dhe brofoesa erbynn an sita ma, dell glewsowgh gans agas skovornow agas honan.’

¹²Ena Yeremia a gewsis dhe'n bennsevigyon oll ha dhe'n bobel oll, ow leverel, ‘An ARLOEDH a'm dannvonas dhe brofoesa erbynn an chi ma ha'n sita ma oll an geryow re glewsowgh.

¹³Ytho lemmyn gwellhewgh agas fordhow ha'gas gwriansow ha klewewgh lev an ARLOEDH agas Duw, ha'n ARLOEDH a dreyl y vrys a-dro dhe'n anfeusi re leveris er agas pynn.

¹⁴Ha dhe'm parth vy, otta, yth esov yn agas diwleuv. Gwra genev an pyth a hevel da hag ewn dhywgh.

¹⁵Mes godhvydhewgh yn sur, mara'm gorrowgh dhe'n mernans, hwi a dhre goes gwiryon warnowgh agas honan ha war an sita ma ha'y annedhysi, rag yn gwiryonedh an ARLOEDH re'm dannvonas dhe gewsel oll an geryow ma yn agas skovornow.’

¹⁶Ena an bennsevigyon hag oll an bobel a leveris dhe'n oferysi ha dhe'n brofoesi, ‘Ny dhervynn an gour ma an mernans, rag ev re gewsis orthyn yn hanow an ARLOEDH agan Duw.’

¹⁷Ena re a henavogyon a'n tir a sevis ha kewsel dhe oll kuntelles an bobel kuntellys, ow leverel,

¹⁸‘Mika a Moreseth a brofoesas yn dydhyow Hezekia myghtern Yuda, ha kewsel orth oll pobel Yuda, ow leverel, “Yndellma y lever ARLOEDH an luyow, Sion a vydh erys avel park, ha Yerusalem a vydh bern a vagoryow, ha menydh an chi avel tylleryow ughel a goeswik.”

¹⁹A wrug Hezekia myghtern Yuda hag oll Yuda y worra yn hwir dhe'n mernans? A ny borthas own a'n ARLOEDH ha hwilas favour an ARLOEDH, ha'n ARLOEDH a dreylyas y vrys a-dro dhe'n anfeusi re leveris er aga fynn? Avel hemma ni a dhre drog meur warnan agan honan.’

²⁰Hag yth esa ynwedh gour arall ow profoesa yn hanow an ARLOEDH, Uria mab Shemaia a Kiryath-yearim. Ev a brofoesas erbynn an sita ma hag erbynn an tir ma yn geryow poran kepar ha geryow Yeremia.

²¹Ha pan glewas Yehoyakim, gans oll y wer alloesek, hag oll an bennsevigyon, y eryow ev, an myghtern a hwilas y worra dhe'n mernans; mes pan glewas Uria hemma, ev a borthas own, ha fia ha mos dhe Ejyp.

²²Ena Yehoyakim an myghtern a dhannvonas gwer dhe Ejyp, henn yw Elnathan mab Akbor, ha gwer ganso dhe Ejyp,

²³hag i a gyrghas Uria yn-mes a Ejyp ha'y dhri dhe Yehoyakim an myghtern, neb a'n ladhas gans an kledha ha tewlel y gorf marow yn ynkleudhva an bobel gemmyn.

²⁴Byttegyns yth esa leuv Ahikam mab Shafan gans Yeremia ma na veu res yn leuv an bobel dh'y worra dhe'n mernans.