Read Kernewek Yeremia 29 Bible Online

Yeremia 29 - Kernewek bible

Yeremia 29

¹Lemmyn an re ma yw geryow an lyther a dhannvonas Yeremia an profoes a-dhiworth Yerusalem dhe remenant an henavogyon yn mysk an dhivresow, ha dhe'n oferysi, ha dhe'n brofoesi, ha dhe oll an bobel a dhug Nebukadnessar dhe-ves yn divroedh a-dhiworth Yerusalem dhe Babylon.

²Henn o wosa Yekonia an myghtern, ha mamm an vyghternes, an lyswesyon, pennsevigyon Yuda ha Yerusalem, ha'n seri prenn ha'n wovyon dhe dhiberth a Yerusalem.

³An lyther a veu dannvenys yn leuv Elasa mab Shafan ha Gemaria mab Hilkia neb a wrug Sedekia myghtern Yuda y dhannvon dhe Babylon dhe Nebukadnessar myghtern Babylon, ow leverel:

⁴Yndellma y lever ARLOEDH an luyow, Duw Ysrael, dhe oll an re a wrug vy aga doen dhe-ves yn divroedh a-dhiworth Yerusalem dhe Babylon:

⁵Drehevewgh chiow ha triga ynna; plensiwgh lowarthyow ha dybri an froeth anedha.

⁶Kemmerewgh gwragedh ha dineythi mebyon ha myrghes; ha kemmerewgh gwragedh dh'agas mebyon, ha rewgh agas myrghes dhe wer may tineythons mebyon ha myrghes; ynkressyewgh ha na lehewgh.

⁷Ha hwilewgh kres an sita le may hwrug dhywgh bos degys dhe-ves yn divroedh, ha pysi war Dhuw ragdho, rag yn y gres hwi a'gas bydh kres.

⁸Rag yndellma y lever ARLOEDH an luyow, Duw Ysrael: Na esiwgh an brofoesi ha'n goelyogyon yn agas mysk dh'agas toella, ha na woslowewgh orth an hunrosow a hunrosons.[30]

⁹Rag i a brofoes yn fals dhywgh y'm hanow; ny's dannvenis, yn-medh an ARLOEDH.

¹⁰Rag yndellma y lever an ARLOEDH: Pan vydh kowlwrys deg blydhen ha tri-ugens yn Babylon, my a'gas vysyt, ha kewera ow ger da dhywgh ha'gas dri arta dhe'n tyller ma.

¹¹Rag my a woer an tybyansow a dybav ragowgh, yn-medh an ARLOEDH, tybyansow kres, a-derdrogedh, dhe ri dhywgh diwedh gans govenek.

¹²Ena hwi a elow warnav, hag yth ewgh ha pysi warnav, ha my a'gas klew.

¹³Ha hwi a'm hwila, ha'm kavoes pan y'm hwilowgh a leun golonn.

¹⁴Ha my a'gas gas dhe'm kavoes, yn-medh an ARLOEDH, ha treylya agas kethneth, ha my a'gas kuntell a-dhiworth oll an kenedhlow hag oll an tylleryow ma'gas fesis, yn-medh an ARLOEDH, ha my a'gas dre arta dhe'n tyller ma'gas dannvenis dhiworto yn divroedh.

¹⁵Drefenn hwi dhe leverel, ‘An ARLOEDH re dhrehevis profoesi ragon yn Babylon’,

¹⁶godhvydhewgh y lever an ARLOEDH yndella a-dro dhe'n myghtern a esedh war dron Davydh, hag a-dro dhe oll an bobel usi trigys y'n sita ma, hag a-dro dh'agas breder nag ethons genowgh yn divroedh:

¹⁷Yndellma y lever ARLOEDH an luyow: Otta, my a dhannvon warnedha an kledha, an divoetter, ha'n pla, ha'ga gul avel fygys pedrys na yll bos dybrys drefenn aga bos mar dhrog.

¹⁸Ha my a's helgh gans an kledha, gans an divoetter, ha gans an pla, ha'ga gorra dhe vos euth dhe oll gwlaskordhow an nor, dhe vos molleth ha skruth ha hwibana, ha keredh yn mysk oll an kenedhlow le ma's fesis,

¹⁹drefenn na glewsons ow geryow, yn-medh an ARLOEDH, a dhannvenis dhedha gans ow servysi an brofoesi, orth aga dannvon arta hag arta, mes ny woslowsons, yn-medh an ARLOEDH.

²⁰Klewewgh ytho ger an ARLOEDH, oll hwi an dhivresow, a dhannvenis a Yerusalem dhe Babylon:

²¹Yndellma y lever ARLOEDH an luyow, Duw Ysrael, a-dro dhe Ahab mab Kolaya ha Sedekia mab Maaseya, usi ow profoesa gow dhywgh y'm hanow: Otta, my a's re yn leuv Nebukadnessar myghtern Babylon, hag ev a's ladh a-rag agas lagasow.

²²Hag i a vydh ensampel rag oll an dhivresow a Yuda yn Babylon pan wrons mollethi, ow leverel: ‘Re'th wrello an ARLOEDH avel Sedekia hag Ahab, a veu rostys y'n tan gans myghtern Babylon’,

²³drefenn i dhe wul bileni yn Ysrael ha gul avoutri gans gwragedh aga hentrevogyon, ha kewsel y'm hanow vy geryow gowek na worhemmynnis dhedha; my yw ev neb a woer hag a dheg dustuni, yn-medh an ARLOEDH.

²⁴Yndella ty a gews ynwedh dhe Shemaia an Nehelamyas:

²⁵Yndellma y lever ARLOEDH an luyow, Duw Ysrael: Y'th hanow dha honan ty a dhannvonas lytherow dhe'n bobel oll usi yn Yerusalem, ha dhe'n oferyas Sefania mab Maaseya, ha dhe'n oferysi oll, ow leverel,

²⁶An ARLOEDH a'th wrug oferyas yn le Yehoyada an oferyas, dhe vos soedhogyon yn chi an ARLOEDH, rag pub muskok a omwra profoes, ma'n gorrydh yn stokkys hag yn kolor.

²⁷Lemmyn ytho prag na geredhsys Yeremia a Anathoth a omwra profoes ragowgh?

²⁸Rakhenna ev a dhannvonas dhyn yn Babylon, ow leverel, ‘An divroedh ma a vydh hir; drehevewgh chiow ha triga ynna, ha plansa lowarthyow ha dybri an frut anedha.’

²⁹Ha Sefania an oferyas a lennas an lyther ma yn klewans Yeremia an profoes.

³⁰Ena ger an ARLOEDH a dheuth dhe Yeremia, ow leverel:

³¹Dannvon dhe oll an dhivresow, ow leverel, Yndellma y lever an ARLOEDH a-dro dhe Shemaia an Nehelamyas: Drefenn Shemaia dhe brofoesa dhywgh, kyn na'n dannvenis, ha gul dhywgh fydhya yn gow,

³²ytho yndellma y lever an ARLOEDH: My a gessydh Shemaia an Nehelamyas ha'y dhiyskynnysi; ny'n jevydh denvyth trigys yn mysk an bobel ma; na ny welvydh an da a wrav dhe'm pobel, yn-medh an ARLOEDH, drefenn ev dhe gewsel rebellyans erbynn an ARLOEDH.