Read Kernewek Yeremia 30 Bible Online

Yeremia 30 - Kernewek bible

Yeremia 30

¹An ger hag a dheuth dhe Yeremia a-dhiworth an ARLOEDH, ow leverel:

²Yndellma y lever an ARLOEDH, Duw Ysrael, ow leverel: Skrif oll an geryow ma re gewsis dhis yn lyver.

³Rag, ott, an dydhyow a dheu, yn-medh an ARLOEDH may treylav kethneth ow fobel Ysrael ha Yuda, yn-medh an ARLOEDH, ha my a's dre arta dhe'n tir a res dh'aga thasow, hag i a's pew.

⁴Hemm yw an geryow a gewsis an ARLOEDH a-dro dhe Ysrael ha Yuda.

⁵Rag yndellma y lever an ARLOEDH: Ni re glewas kri a skruth, own a-der kres.

⁶Govynnewgh lemmyn ha mirewgh, a yll gour dineythi flogh? Ytho prag y hwelav pub gour ha'y dhiwleuv war y dhiwglun avel benyn yn gwelivesi, ha pub fas treylys gwannliwek?

⁷Eghan! rag meur yw an jydh na, ma nag eus onan haval dhodho: termyn ahwer yw rag Yakob; mes ev a vydh sawys anodho.

⁸Rag y'n jydh na, yn-medh ARLOEDH an luyow, my a derr an yew a'th konna, ha my a dardh dha rawyow, ha ny'n gwra estrenyon dhe vos keth namoy.

⁹Mes i a serv an ARLOEDH aga Duw ha Davydh aga myghtern, hag a dhrehevav ragdha.

¹⁰Ytho na borth own, ow gwas Yakob, yn-medh an ARLOEDH, na na vydh digolonnek, A Ysrael; rag otta, my a'th selow a bellder, ha'th has a-dhiworth tir aga hethneth; ha Yakob a dhehwel ha powes ha bos kosel, ha ny wra nagonan gorra own ynno.

¹¹Rag yth esov genes, yn-medh an ARLOEDH, dhe'th selwel; my a wra leun dhiwedh dhe'n kenedhlow oll le ma'th skattris, mes ny wrav leun dhiwedh ahanas. My a'th keredh yn musur ewn, ha ny'th asav yn tien ankessydhys.

¹²Rag yndellma y lever an ARLOEDH: Ny yll dha vrew bos yaghhes, ha'th woli yw ankensi.

¹³Nyns eus nagonan dhe bledya dha gen, medhegneth vyth dhe'th woli, yaghheans vyth ragos.

¹⁴Oll dha garoryon re'th ankovas; ny'th hwilons rag my re'th holyas gans goli eskar, gans keredh a dhen fell, drefenn bos meur dha anewnder, drefenn dha beghosow dhe ynkressya.

¹⁵Prag y kriydh drefenn dha derroes? Heb remedi yw dha bayn Drefenn bos meur dha anewnder, drefenn dha beghosow dhe ynkressya, my re wrug an traow ma dhis.

¹⁶Ytho oll an re a'th tevor a vydh devorys, ha'th eskerens, peub anedha a wra mos yn divroedh; an re a'th pyll a vydh pyllys, hag oll an re a breydh warnas my a wra preydh.

¹⁷Rag my a asver yeghes dhis, ha my a yaghha oll dha woliow, yn-medh an ARLOEDH, drefenn i dhe'th henwel gal, ow leverel: ‘Sion yw; denvyth ny's hwila!’

¹⁸Yndellma y lever an ARLOEDH: Otta, my a dreyl kethneth tyldow Yakob, ha kemmeres tregeredh war y annedhow; ha'n sita a vydh drehevys war y grug, ha'n palys a sev yn y le ewn.

¹⁹Hag yn-mes anedha y teu grasyans ha lev an re a lowenha. My a's liesha, ha ny vydhons boghes; my a's enor, ha ny vydhons iselhes.

²⁰Aga mebyon a vydh avel kyns, ha'ga huntelles a vydh fastys a-ragov, ha my a gessydh kemmys a's arwask.

²¹Ha'ga fennsevigyon a vydh kemmerys a'ga honan, ha'ga governour a dheu a'ga mysk; my a'n dre yn ogas, hag ev a dheu nes dhymm, poken piw a vedha nesa dhymm?[31] yn-medh an ARLOEDH.

²²Ha hwi a vydh ow fobel, ha my a vydh agas Duw.

²³Otta, korwyns an ARLOEDH! konnar ow mos yn-mes, korwyns ow rosella: troyllya a wra war benn an debeles.

²⁴Ny dreyl konnar fers an ARLOEDH dhe-ves bys pan gollanwo ha kowlwul towlow y golonn. Y'n dydhyow diwettha hwi a gonvedh hemma.