Read Kernewek Yeremia 31 Bible Online

Yeremia 31 - Kernewek bible

Yeremia 31

¹Dhe'n keth termyn, yn-medh an ARLOEDH, my a vydh Duw oll teyluyow Ysrael, hag i a vydh ow fobel.

²Yndellma y lever an ARLOEDH: An bobel a veu gesys a'n kledha a gavas favour y'n gwylvos; hwath Ysrael pan hwilas powes,

³an ARLOEDH a omdhiskwedhas dhodho[32] a-bell: My re'th karas gans kerensa heb diwedh; ytho gans tregeredh my re'th tennas.

⁴Arta my a'th trehav, ha ty a vydh drehevys, A wyrghes Ysrael! ty a vydh tekhes arta gans dha dabourigow, ha mos yn-rag yn dons an re lowen.

⁵Arta ty a blans gwinlannow war venydhyow Samaria; an blansoryon a blans ha dybri an frut.

⁶Rag y fydh dydh pan elow an woelyadoryon war vro venydhyek Efraym: ‘Sevewgh, ha deun yn-bann dhe Sion, dhe'n ARLOEDH agan Duw.’

⁷Rag yndellma y lever an ARLOEDH: Kenewgh gans lowena rag Yakob, ha drehevewgh garmow rag chyf an kenedhlow; gwarnyewgh, gormelewgh, ha leverel, ‘A ARLOEDH, saw dha bobel, remenant Ysrael.’

⁸Otta, my a's dre a dir an gogledh, ha'ga huntell a-dhiworth pella rannow an nor, ha gansa an dall ha'n evredhek, an venyn veghyek ha'n venyn usi yn gwelivesi; kowethas meur a dhehwel omma.

⁹I a dheu yn-dann dhagrewi, ha gans konfort my a's hembronk, my a wra dhedha kerdhes ryb frosow dowr, yn fordh leven le ma na drebuchyons; rag my yw tas dhe Ysrael, hag Efraym yw ow hynsa-genys.

¹⁰Klewewgh ger an ARLOEDH, hwi genedhlow, ha'y dhisklerya dhe'n ynysow pell; leverewgh, ‘Ev neb a skattras Ysrael a wra y guntell, ha'y witha par dell wra an bugel y flokk.’

¹¹Rag an ARLOEDH re dhasprenas Yakob, ha'y dhelivra a leuv re grev ragdho.

¹²Ytho i a dheu ha kana yn ughel war ughelder Sion, ha splanna drefenn dader an ARLOEDH, drefenn an greun, ha'n gwin ha'n oyl, ha re yowynk an flokk, ha'n gre; aga bewnans a vydh avel lowarth dowrhes, ha ny vydhons digolonnek namoy.

¹³Ena an wyrghes a lowenha y'n dons, ha'n wer yowynk ha'n henavogyon a vydh lowen, my a's hebaskha, ha ri dhedha lowena yn le aga hynvann.

¹⁴Ha my a lenow enev an oferysi gans blonek ha'm pobel a vydh gwalghys gans ow dader, yn-medh an ARLOEDH.

¹⁵Yndellma y lever an ARLOEDH: Lev yw klewys yn Rama, kynvann hag oelva hwerow. Yma Raghel owth oela rag hy fleghes; hi a nagh bos konfortys rag hy fleghes drefenn nag esons na fella.

¹⁶Yndellma y lever an ARLOEDH: Gwith dha lev rag oela, ha'th tewlagas rag dagrow; rag dha ober a vydh gobrys, yn-medh an ARLOEDH: i a dhehwel a-dhiworth tir an eskar;

¹⁷yma govenek y'th tiwedh, yn-medh an ARLOEDH: dha fleghes a dhehwel dh'aga bro aga honan.

¹⁸Yn hwir my re glewas Efraym ow pledya: ‘Ty a'm kessydhyas, ha my a gemmeras an geredh, avel lodhen na veu dyskys dhe'n yew. Treyl dhymm, ha my a vydh treylys, rag ty yw an ARLOEDH ow Duw.

¹⁹Rag wosa my dhe dreylya, my a goedhas yn edrek, ha wosa my dhe vos dyskys, my a weskis ow mordhos; meth a'm bo ha my a veu iselhes, drefenn my dhe dhoen keredh ow yowynkneth.’

²⁰Yw Efraym ow mab ker? Yw ev flogh hweg? Rag a-ban gewsis er y bynn my a berth kov anodho hwath. Ythoow holodhyon a veu movys ragdho; yn sur y kemmerav truedh anodho, yn-medh an ARLOEDH.

²¹Drehav arwoedhyow-fordh, gwra dhis postow arwoedh; gorr dha golonn troha'n fordh-veur, an fordh mayth ythys. Treyl arta, A wyrghes Ysrael, treyl arta dhe'n sitys ma usi dhis.

²²Pes termyn a hokydh, A vyrgh dhislel? Rag an ARLOEDH re greatyas tra nowydh y'n nor: Benyn a dhifres gour.

²³Yndellma y lever ARLOEDH an luyow, Duw Ysrael: I a wra devnydh a'n geryow ma arta yn pow Yuda ha'y threvow, pan y's trov arta dhiworth kethneth: ‘Re'th vennikko an ARLOEDH, A drigva ewnder, menydh gwiryonedh!’

²⁴Hag y fydh trigys yn Yuda y honan hag oll y sitys, gonedhogyon ha'n re a wander gans flokkys.

²⁵Rag my re walghas an enev skwith, ha pub enev ahwerek my a dhaslenow.

²⁶War hemma my a dhifunas ha mires, hag ow hosk o hweg dhymm.

²⁷Otta, yma an dydhyow ow tos, yn-medh an ARLOEDH pan hasav chi Ysrael ha chi Yuda gans has den ha has enyval.

²⁸Ha kepar dell withis warnedha dhe dhiwreydhya, ha dhe dewlel dhe'n dor, yndella y hwithav warnedha, dhe dhrehevel, ha dhe blansa, yn-medh an ARLOEDH.

²⁹Y'n dydhyow na ny leverons namoy: ‘Tasow re dhybris gwinreun trenk, ha dyns fleghes a dheuth ha bos sogh.’

³⁰Mes pubonan a verow a'y anewnder y honan; dyns pub den a dheber an gwinreun trenk a dheu ha bos sogh.

³¹Otta, an dydhyow a dheu, yn-medh an ARLOEDH, pan wrav kevambos nowydh gans chi Ysrael ha chi Yuda.

³²Ny vydh avel an kevambos a wrug gans aga thasow, y'n jydh ma's kemmeris der aga leuv dh'aga dri yn-mes a bow Ejyp — kevambos a dorrsons, kynth en gour[33] dhedha, yn-medh an ARLOEDH.

³³Mes hemma a vydh an kevambos a wrav gans chi Ysrael wosa an dydhyow na, yn-medh an ARLOEDH: My a worr ow lagha a-ji dhedha ha'y skrifa war aga holonn; ha my a vydh aga Duw, hag i a vydh ow fobel.

³⁴Ha ny dhyskons namoy pub gour y gentrevek, ha pub gour y vroder, ow leverel, ‘Godhvydhewgh an ARLOEDH’, rag i oll a'm aswonn a'n lyha dhe'n moyha, yn-medh an ARLOEDH; rag my a av aga anewnder, ha ny borthav kov a'ga fegh namoy.

³⁵Yndellma y lever an ARLOEDH, a re an howl rag golow dydh hag ordena an loer ha'n ster rag golow nos, a rann an mor may hwromm an tonnow — ARLOEDH an luyow yw y hanow.

³⁶Mar kwra an ordenansow ma hedhi a-ragov, yn-medh an ARLOEDH, ena has Ysrael a hedh bos kenedhel a-ragov bys vykken.

³⁷Yndellma y lever an ARLOEDH: Mar kyll bos musurys an nevow a-ugh, ha hwithrys selveyn an nor dhe-woeles, ena my a dewl dhe-ves oll has Ysrael drefenn an pyth re wrussons, yn-medh an ARLOEDH.

³⁸Otta, an dydhyow a dheu, yn-medh an ARLOEDH, pan vydh drehevys an sita rag an ARLOEDH a-dhiworth tour Hananel dhe Yet an Gornell.

³⁹Ha'n gordenn-vusura a wra mos pella, poran dhe vre Gareb, hag ena treylya dhe Goa,

⁴⁰An nans oll a gorfow marow ha'n lusu, hag oll an gwelyow bys yn gover Kidron, dhe gornell Yet an Margh war-tu ha'n duryen, a vydh sans dhe'n ARLOEDH. Ny vydh diwreydhys na domhwelys nevra.