Read Kernewek Yeremia 32 Bible Online

Yeremia 32 - Kernewek bible

Yeremia 32

¹An ger hag a dheuth dhe Yeremia a-dhiworth an ARLOEDH y'n degves blydhen Sedekia myghtern Yuda, hag o an etegves blydhen a Nebukadnessar.

²Rag ena lu myghtern Babylon a geas a-dro dhe Yerusalem, ha'n profoes Yeremia a veu degeys yn klos an prison, hag esa yn palys myghtern Yuda,

³le ma'n keas Sedekia myghtern Yuda, ow leverel, ‘Prag y profoesydh ha leverel: Yndellma y lever an ARLOEDH: My a re an sita ma yn leuv myghtern Babylon, hag ev a's kemmer;

⁴ny dhiank Sedekia myghtern Yuda a-dhiworth leuv an Kaldeanys, mes delivrys vydh yn sur yn leuv myghtern Babylon, ha kewsel ganso ganow orth ganow, ha'y weles lagas orth lagas;

⁵hag ev a hembronk Sedekia dhe Babylon, hag ena ev a vydh bys pan dhov dhodho, yn-medh an ARLOEDH; kynth omledhowgh erbynn an Kaldeanys, ny siwenowgh?’

⁶Ha Yeremia a leveris, Ger an ARLOEDH a dheuth dhymm:

⁷Otta, Hanamel mab dha ewnter Shallum a dheu ha leverel dhis, ‘Pren ow fark usi yn Anathoth, rag yth yw dhis an gwir a dhaspren, rag y brena.’

⁸Ena Hanamel mab ow ewnter a dheuth dhymm yn klos an prison war-lergh ger an ARLOEDH, ha leverel dhymm, ‘Pren ow fark, my a'th pys, usi yn Anathoth, yn pow Benyamin, rag an gwir a eretons yw dhis dh'y dhasprena; prenn e dhe'th honan.’ Ena my a wodhya bos hemma ger an ARLOEDH.

⁹Ha my a brenas gwel Hanamel mab ow ewnter esa yn Anathoth, ha poesa an arghans dhodho, seytek shekel a arghans.

¹⁰My a sinas an chartour, ha'y selya, ha kemmeres dustunioryon, ha poesa an arghans war vantolyow.

¹¹Ena my a gemmeras chartour an prenas, ha'n pyth o selys war-lergh lagha ha devos, ha'n dasskrif igor;

¹²ha my a ros chartour an prenas dhe Baruk mab Neria mab Mahseya, yn lok Hanamel mab ow ewnter, hag yn lok an dhustunioryon a sinas chartour an prenas, a-rag oll an Yedhewon esa esedhys yn klos an prison.

¹³Ha my a worhemmynnis Baruk a-dheragdha, ow leverel,

¹⁴Yndellma y lever ARLOEDH an luyow, Duw Ysrael: Kemmer an skrifennow ma, an chartour selys, ha'n chartour igor, ha'ga gorra yn lester a bri, may pessyons termyn hir.

¹⁵Rag yndellma y lever ARLOEDH an luyow, Duw Ysrael: Chiow ha parkow ha gwinlannow a vydh prenys arta y'n tir ma.

¹⁶Wosa my dhe dhelivra chartour an prenas dhe Baruk mab Neria, my a bysis war an ARLOEDH, ow leverel:

¹⁷Ogh Arloedh DUW! Otta, ty re wrug an nevow ha'n nor dre dha alloes meur ha'th vregh ystynnys! Nyns eus travyth re gales ragos.

¹⁸Ty a dhiskwedh tregeredh dhe vilyow, hag attyli anewnder an tasow yn askra aga fleghes war aga lergh, an Duw meur ha galloesek, ARLOEDH an luyow yw y hanow,

¹⁹meur yn kusul ha nerthek yn gweythres; rag dha lagasow yw igor dhe oll an fordhow a vab-den, dhe ri dhe beub war-lergh y fordhow, ha war-lergh frut y weythresow.

²⁰Ty re dhiskwedhas arwoedhyow ha marthusyon yn pow Ejyp, hwath bys y'n jydh ma, hag yn Ysrael, hag yn mysk mab-den oll, ha ty re wrug dhis hanow, kepar hag y'n jydh hedhyw.

²¹Ty re dhros dha bobel Ysrael yn-mes a bow Ejyp gans arwoedhyow, ha gans marthusyon, ha gans leuv grev, ha gans bregh ystynnys, ha gans euth meur;

²²ha ty a ros dhedha an tir ma, hag a desys dh'aga thasow dhe ri dhedha, tir a dhinwa leth ha mel;

²³hag i a dheuth a-ji ha'y erita. Mes ny woslowsons orth dha lev na kerdhes y'th lagha; ny wrussons travyth a'n pyth oll a worhemmynnsys dhedha. Ytho ty a wrug oll an anfeusi dhe dhos warnedha.

²⁴Otta, krugow an gweythyow-esedhva re dheuth dhe'n sita dh'y hemmeres; ha'n sita yw gorrys yn leuv an Kaldeanys a omladh er hy fynn, drefenn an kledha, ha drefenn an divoetter, ha drefenn an pla. Ha'n pyth re gewssys re hwarva; hag otta, ty a'n gwel.

²⁵Ha ty, A Arloedh DUW, re leveris dhymm, ‘Pren an park rag arghans, ha kemmeres dustunioryon’; kynth yw an sita res yn leuv an Kaldeanys.

²⁶Ena ger an ARLOEDH a dheuth dhe Yeremia, ow leverel:

²⁷Otta, my yw an ARLOEDH, Duw pub kig; eus neppyth re gales ragov?

²⁸Ytho yndellma y lever an ARLOEDH: My a vynn ri an sita ma yn leuv an Kaldeanys hag yn leuv Nebukadnessar myghtern Babylon, hag ev a's kemmer.

²⁹An Kaldeanys neb a omladh erbynn an sita ma a dheu ha gorra tan ynni ha'y leski, war-barth gans an chiow may feu offrynnys ynkys dhe Baal war aga thohow hag offrynnow diwes dinewys dhe dhuwow erell dhe'm provokya dhe sorr.

³⁰Rag ny wrug mebyon Ysrael ha mebyon Yuda marnas drogedh a-ragov a'ga yowynkneth; rag ny wrug mebyon Ysrael travyth marnas ow frovokya dhe sorr der ober aga diwleuv, yn-medh an ARLOEDH.

³¹Rag an sita ma re beu acheson a'm sorr hag ow honnar a-dhia'n jydh may feu drehevys bys y'n jydh ma, ma's dileav a-dhiworth ow golok;

³²drefenn oll drogedh fleghes Ysrael ha fleghes Yuda, a wrussons dhe'm provokya dhe sorr, i, aga fennsevigyon, aga oferysi, ha'ga frofoesi, ha gwer Yuda, hag annedhysi Yerusalem.

³³I re dreylyas dhymm aga heyn, a-der aga fasow; kyn y's dyskis heb lett, hwath ny woslowsons dhe gemmeres dyskybleth.

³⁴Mes i a sett aga thaklow kasadow y'n chi yw henwys gans ow hanow vy dh'y dhefola.

³⁵Hag i a dhrehevis an tylleryow ughel a Baal yn nans mab Hinnom, dhe wul dh'aga mebyon ha'ga myrghes tremena der an tan dhe Molek, kyn na worhemmynnis dhedha, na ny dheuth y'm brys may hwrellens an dra gasadow ma, ow kul dhe Yuda pegha.

³⁶Lemmyn ytho yndellma y lever an ARLOEDH, Duw Ysrael, a-dro dhe'n sita ma may leverowgh anedhi, ‘Y fydh res yn leuv myghtern Babylon gans an kledha, gans divoetter ha gans an pla’:

³⁷Otta, my a's kuntell yn-mes a'n tiryow oll ma's fesyas yn ow sorr hag yn ow honnar hag yn sorrvann meur; ha my a's dre arta dhe'n tyller ma ha my a wra dhedha triga yn sawder.

³⁸I a vydh ow fobel, ha my a vydh aga Duw.

³⁹My a re dhedha unn golonn hag unn fordh, ma's tevydh own ahanav bys vykken, dh'aga les, ha dhe les aga mebyon war aga lergh.

⁴⁰My a wra kevambos bys vykken gansa, nevra dhe gildenna a wul da dhedha; ha my a worr own yn aga holonn ma na dreylyons a-dhiworthiv.

⁴¹My a lowenha ow kul da dhedha, ha my a's plans y'n tir ma yn sur, gans oll ow holonn ha gans oll ow enev.

⁴²Rag yndellma y lever an ARLOEDH: Par dell dhres oll an drogedh meur ma war an bobel ma, yn kettellma my a dhre warnedha oll an da a ambosis dhedha.

⁴³Parkow a vydh prenys y'n tir ma may leverowgh, ‘Ynyal yw heb den na best; res yw yn leuv an Kaldeanys.’

⁴⁴Parkow a vydh prenys gans arghans, ha titlow a vydh sinys ha selys ha destys, yn pow Benyamin, y'n tylleryow a-dro dhe Yerusalem, hag yn sitys Yuda, hag yn sitys an vro venydhyek, hag yn sitys an Shefela hag yn sitys an Negeb; rag my a dreyl aga hethneth, yn-medh an ARLOEDH.