Read Kernewek Yeremia 33 Bible Online

Yeremia 33 - Kernewek bible

Yeremia 33

¹Ger an ARLOEDH a dheuth dhe Yeremia an nessa treveth, pan esa hwath degeys yn klos an prison, ow leverel:

²Yndellma y lever an ARLOEDH a wrug an nor, an ARLOEDH a'n formyas dh'y fastya — an ARLOEDH yw y hanow:

³Galow dhymm ha my a worthyp dhis, ha derivas dhis traow meur hag andrehedhadow na aswonnsys.

⁴Rag yndellma y lever an ARLOEDH, Duw Ysrael, a-dro dhe jiow an sita ma hag a-dro dhe jiow myghternedh Yuda a veu terrys dhe omwitha saw drefenn an gweythyow-esedhva, hag drefenn an kledha:

⁵Yma an Kaldeanys ow tos dhe omladh ha dh'aga lenwel gans korfow marow an re a ledhis vy yn ow sorr hag yn ow honnar, rag my re gudhas ow fas a'n sita ma drefenn aga drogedh.

⁶Otta, my a dhre dhedha sawment ha yaghheans; my a's saw ha diskwedhes dhedha palster a gres ha gwiryonedh.

⁷Ha my a dreyl kethneth Yuda ha kethneth Ysrael ha my a's dastrehav par dell ens wor'talleth.

⁸My a's glanha a'ga hammhynseth oll may peghsons er ow fynn ha gul treuspass er ow fynn.

⁹Ha homma a vydh hanow a lowena dhymm, gormel hag enor a-dherag oll kenedhlow an nor, pan glewons oll an da a wrav ragdha; i a's tevydh own ha krena drefenn oll an da ha rag oll an siwena a broviav dhedhi.

¹⁰Yndellma y lever an ARLOEDH: Y'n tyller ma may leverowgh, ‘Ynyal yw heb den na best’, yn sitys Yuda hag yn stretow Yerusalem hag yw ynyal, heb den, ha heb annedhyas, ha heb best, y fydh klewys unnweyth arta

¹¹lev lowender ha heudhder, lev an gour pries ha lev an venyn bries, lev an re a lever, hag i ow tri offrynnow grasyans yn chi an ARLOEDH: ‘Gormelewgh ARLOEDH an luyow, rag an ARLOEDH yw da, rag y dregeredh a dhur bys vykken.’ Rag my a dreyl kethneth an tir kepar hag y'n dalleth, yn-medh an ARLOEDH.

¹²Yndellma y lever ARLOEDH an luyow: Arta y'n tyller ma hag yw ynyal, heb den na best, hag yn oll y sitys, y fydh peurva rag bugeledh dhe ri powes dh'aga flokkys.

¹³Yn sitys an vro venydhyek, hag yn sitys an Shefela, hag yn sitys an Negeb, yn pow Benyamin, hag y'n tylleryow a-dro dhe Yerusalem, hag yn sitys Yuda, an flokkys a dremen arta yn-dann leuv an den a's niver, yn-medh an ARLOEDH.

¹⁴Otta, an dydhyow a dheu, yn-medh an ARLOEDH, may kollanwav an ambos a wrug dhe ji Ysrael ha dhe ji Yuda.

¹⁵Y'n dydhyow na hag y'n termyn na my a wra Skorrenn a wiryonedh dhe sevel rag Davydh; ev a wra gwirvreus hag ewnder y'n tir.

¹⁶Y'n dydhyow na Yuda a vydh selwys ha Yerusalem a drig yn sawder. Ha hemm yw an hanow may fydh henwys: ‘An ARLOEDH agan gwiryonedh.’

¹⁷Rag yndellma y lever an ARLOEDH: Ny vydh Davydh nevra heb gour dhe esedha war dron chi Ysrael,

¹⁸na ny vydh oferysi an Levysi heb gour y'm lok dhe offrynna offrynnow leskys ha dhe leski offrynnow ys, ha dhe wul sakrifisow bys vykken.

¹⁹Ha ger an ARLOEDH a dheuth dhe Yeremia, ow leverel:

²⁰Yndellma y lever an ARLOEDH: Mar kyllowgh terri ow hevambos gans an jydh, hag ow hevambos gans an nos, ma na vo dydh na nos yn aga ewn brys,

²¹ena ow hevambos gans ow gwas Davydh a vydh terrys, ma na'n jevydh mab dhe reynya war y dron, hag ow hevambos gans an Levysi, an oferysi ow menystoryon.

²²Dell na yllir nivera lu nev, na musura tewes an mor, yndellma my a ynkress has Davydh ow gwas, ha'n Levysi a venyster dhymm.

²³Arta ger an ARLOEDH a dheuth dhe Yeremia, ow leverel:

²⁴A ny welsys fatell lever an bobel ma, ‘An dhew deylu dewisys gans an ARLOEDH re beu deneghys ganso’, ha fatell synsons ow fobel yn kemmys bismer ma na vons namoy kenedhel a-ragdha.

²⁵Yndellma y lever an ARLOEDH: Mar ny ve ow hevambos gans dydh ha nos hag ordenansow nev ha nor,

²⁶ena my a dhenaghsa has Yakob, ha Davydh ow gwas, ma na dhewisav nagonan a'y has avel rewloryon war has Abraham, Ysak ha Yakob. Rag my a dreyl aga hethneth, ha kemmeres truedh anedha.