Read Kernewek Yeremia 34 Bible Online

Yeremia 34 - Kernewek bible

Yeremia 34

¹An ger hag a dheuth dhe Yeremia a-dhiworth an ARLOEDH, pan esa Nebukadnessar myghtern Babylon hag oll y lu hag oll gwlaskordhow an bys a'y vestrynses, hag oll an poblow, owth omladh erbynn Yerusalem, hag erbynn oll hy sitys, ow leverel:

²‘Yndellma y lever an ARLOEDH, Duw Ysrael: Ke dhe Sedekia myghtern Yuda ha leverel dhodho: Yndellma y lever an ARLOEDH: my a re an sita ma yn leuv myghtern Babylon, hag ev a's lesk gans tan.

³Ha ty dha honan, ny dhienkydh a'y leuv, mes dalghennys vydhydh yn sur ha delivrys yn y leuv; dha dhewlagas a welvydh myghtern Babylon, hag ev a gews genes ganow dhe anow; ha ty a dhe Babylon.

⁴Mes klew ger an ARLOEDH, A Sedekia myghtern Yuda! Yndellma y lever an ARLOEDH a-dro dhis: Ny verwydh gans an kledha;

⁵ty a verow yn kres. Ha dell vedha leskys spisyow rag dha dasow, an vyghternedh a-varra a dheuth a-ragos, yn kettellma i a lesk spisyow ragos ha kyni ragos, ow leverel “Ellas arloedh!” Rag my re gewsis an ger, yn-medh an ARLOEDH.’

⁶Ena Yeremia an profoes a gewsis oll an geryow ma dhe Sedekia myghtern Yuda, yn Yerusalem,

⁷pan esa lu myghtern Babylon owth omladh erbynn Yerusalem hag erbynn oll sitys Yuda o gesys, Lakish hag Azeka: rag ny veu gesys saw unnsel an sitys kerys ma yn Yuda.

⁸An ger hag a dheuth dhe Yeremia a-dhiworth an ARLOEDH wosa myghtern Sedekia dhe wul kevambos gans oll an bobel yn Yerusalem dhe wrontya rydhses dhedha,

⁹may liffrons peub aga hethyon ha'ga hethesow ma na synso nagonan Yedhow, y vroder, yn kethneth.

¹⁰Lemmyn pan glewas an bennsevigyon hag oll an bobel res eth y'n kevambos, i oll dhe livra aga hethyon ha'ga hethesow, ma nag ens arta yn kethneth, i a veu gostydh ha'ga livra.

¹¹Mes a-wosa i a dreylyas ha daskemmeres an gethyon ha'n kethesow re liv'sons ha'ga dri arta yn kethneth.

¹²Ena ger an ARLOEDH a dheuth dhe Yeremia a-dhiworth an ARLOEDH, ow leverel:

¹³Yndellma y lever an ARLOEDH, Duw Ysrael: My a wrug kevambos gans agas tasow y'n jydh ma's dres yn-mes a bow Ejyp, yn-mes a'n ji a gethneth, ow leverel,

¹⁴‘Dhe benn seyth blydhen livrewgh peub y vroder ebrow re beu gwerthys dhis ha'th servya hwegh blydhen; ty a'n liver ahanas.’ Mes ny woslowas agas tasow orthiv, na treylya aga skovarn dhymm.

¹⁵Ha hwi a'gas beu edrek hedhyw hag a wrug an pyth o ewn y'm golok dre dheklarya rydhses peub dh'y gentrevek, ha hwi a wrug kevambos a-ragov y'n chi may feu ow hanow gelwys warnodho;

¹⁶mes hwi a dreylyas ha defola ow hanow pan dhaskemmersowgh agas kethyon ha'gas kethesow, neb a liversowgh war-lergh aga hwans, ha hwi a's dros arta dhe vos kethyon ha kethesow.

¹⁷Rakhenna yndellma y lever an ARLOEDH: Ny woslewsowgh orthiv ow krontya rydhses, pubonan dh'y vroder ha pubonan dh'y gentrevek; otta, my a wront rydhses dhywgh yn-medh an ARLOEDH, dhe'n kledha, dhe'n pla, ha dhe'n divoetter. My a'gas gwra euth dhe oll gwlaskordhow an nor.

¹⁸Ha my a re dhe'n wer re gammdremenas erbynn ow hevambos ha ny withsons geryow an kevambos a wrussons a-ragov, pan droghsons an leugh yn diw rann ha tremena ynter y rannow,

¹⁹pennsevigyon Yuda, ha pennsevigyon Yerusalem, an spadhesigyon, ha'n oferysi hag oll pobel an tir hag a dremenas yntra rannow an leugh —

²⁰my a's re yn leuv aga eskerens hag yn leuv a re a hwila aga bewnans. Aga horfow marow a vydh boes dhe ydhyn an nev hag enyvales gwyls an nor.

²¹Ha Sedekia myghtern Yuda ha'y bennsevigyon a rov yn leuv aga eskerens, hag yn leuv an re a hwila aga bewnans, hag yn leuv lu myghtern Babylon re gildennas ahanowgh.

²²Otta, my a worhemmynn, yn-medh an ARLOEDH, ha gul dhedha dehweles dhe'n sita ma; hag i a omladh er hy fynn, ha'y leski gans tan. Trevow Yuda my a wra ynyal heb annedhyas.