Read Kernewek Yeremia 35 Bible Online

Yeremia 35 - Kernewek bible

Yeremia 35

¹An ger hag a dheuth dhe Yeremia a-dhiworth an ARLOEDH yn dydhyow Yehoyakim mab Yosia myghtern Yuda, ow leverel:

²Ke dhe ji an Rekabysi ha kewsel dhedha, ha'ga dri dhe ji an ARLOEDH, a-ji dhe onan a'n chambouryow, ha ri dhedha gwin dhe eva.

³Ytho my a gemmeras Yaazania mab Yeremia mab Habassinia, ha'y vreder, hag oll y vebyon, ha chi kowal an Rekabysi.

⁴My a's dros dhe ji an ARLOEDH yn chambour mebyon Hanan mab Ygdalia, gour Duw, hag esa ogas dhe jambour an bennsevigyon, a-ugh stevell Maaseya mab Shallum, gwithyas an treudhow.

⁵Ha my a settyas a-rag an Rekabysi podigow leun a win, ha hanafow; ha my a leveris dhedha, ‘Evewgh gwin.’

⁶Mes i a worthybis, ‘Ny evyn gwin vytholl, rag agan tas Yonadab mab Rekab a worhemmynnis dhyn, “Nevra ny evowgh gwin, na hwi na'gas fleghes;

⁷na ny drehevowgh chi, na gonedha has; na ny blansowgh gwinlann, na'y fewa; mes hwi a vydh trigys yn tyldow oll agas dydhyow, may fewowgh lies dydh y'n tir may fydhowgh estrenyon.”

⁸Yndellma ni re woslowas orth lev Yonadab mab Rekab agan tas yn pup-tra a worhemmynnis dhyn, ma na evyn gwin vyth yn agan dydhyow, ni, na'gan gwragedh, na'gan mebyon, na'gan myrghes,

⁹na dhe dhrehevel chiow dhe driga ynna. Ny'gan beus gwinlann na gwel na has;

¹⁰mes ni re beu trigys yn tyldow, ha bos gostydh, ha gul pup-tra re worhemmynnis agan tas Yonadab dhyn.

¹¹Mes pan dheuth Nebukadnessar myghtern Babylon erbynn an tir, ni a leveris, “Dewgh ha deun dhe Yerusalem drefenn own lu an Kaldeanys ha lu Aram.” Drefenn henna yth eson trigys yn Yerusalem.’

¹²Ena ger an ARLOEDH a dheuth dhe Yeremia:

¹³Yndellma y lever ARLOEDH an luyow, Duw Ysrael: Ke ha leverel dhe bobel Yuda ha dhe annedhysi Yerusalem, ‘A ny vynnowgh degemmeres dyskans ha klewes ow geryow? yn-medh an ARLOEDH.

¹⁴Geryow Yonadab mab Rekab a worhemmynnis dh'y vebyon, na effens gwin, re beu kowlwrys; ha ny evons byth bys y'n jydh ma, rag i re beu gostydh dhe worhemmynn aga thas. Mes my ow honan re gewsis orthowgh heb lett, ha ny woslewsowgh orthiv.

¹⁵My re dhannvonas dhywgh oll ow servysi an brofoesi, orth aga dannvon arta hag arta, ow leverel, “Treylyewgh lemmyn pub ahanowgh a'gas fordh dhrog, ha gwellhe agas gwriansow ha nag ewgh war-lergh duwow erell dh'aga servya, ha hwi a vydh trigys y'n tir a res dhywgh ha dh'agas tasow.” Mes ny ystynnsowgh agas skovarn na goslowes orthiv.

¹⁶Mebyon Yonadab mab Rekab re gollenwis an gorhemmynn a ros aga thas dhedha, mes ny woslowas orthiv an bobel ma.

¹⁷Ytho, yndellma y lever an ARLOEDH, Duw an luyow, Duw Ysrael: My a dhre war Yuda ha war oll annedhysi Yerusalem pub terroes re leveris er aga fynn; rag my re gewsis dhedha ha ny woslowsons, my re elwis dhedha mes ny worthybsons.’

¹⁸Mes dhe ji an Rekabysi Yeremia a leveris: Yndellma y lever ARLOEDH an luyow, Duw Ysrael: Drefenn hwi dhe vos gostydh dhe worhemmynn Yonadab agas tas, ha gwitha oll y worhemmynnow, ha gul pup-tra a worhemmynnis dhywgh,

¹⁹yndellma ytho y lever ARLOEDH an luyow, Duw Ysrael: Ny vydh Yonadab mab Rekab heb gour dhe sevel a-ragov bys vykken.