Read Kernewek Yeremia 36 Bible Online

Yeremia 36 - Kernewek bible

Yeremia 36

¹Y'n peswora blydhen Yehoyakim mab Yosia myghtern Yuda, an ger ma a dheuth dhe Yeremia a-dhiworth an ARLOEDH, ow leverel:

²Kemmer rol-skrifa ha skrifa warnedhi oll an geryow re gewsis dhis erbynn Ysrael, hag erbynn Yuda, hag erbynn oll an kenedhlow, a-dhia'n jydh may kewsis dhis, a-dhia dhydhyow Yosia bys hedhyw.

³Y hyll bos pan glewvo chi Yuda a oll an drog a vynnav gul dhedha, i oll dhe dreylya a'ga drog fordhow, may hylliv gava aga hammweyth ha'ga fegh.

⁴Ena Yeremia a elwis Baruk mab Neria, ha Baruk a skrifas geryow an ARLOEDH a-dhiworth ganow Yeremia, re gewsis dhodho, war rol-skrifa.

⁵Ha Yeremia a worhemmynnis dhe Baruk, ow leverel, ‘Ny'm beus entra chi an ARLOEDH.

⁶Ytho ke dha honan, ha lenn geryow an ARLOEDH y'n rol re skrifsys a'm ganow, yn klewans an bobel yn chi an ARLOEDH war dhydh penys; ha g ynwedh ty a's lenn yn klewans oll pobel Yuda a dheu yn-mes a'ga sitys.

⁷Y hyll bos aga fledyans dhe dhos a-rag an ARLOEDH, hag i oll dhe dreylya a'ga drog fordhow, rag meur yw an sorr ha konnar re leveris an ARLOEDH erbynn an bobel ma.’

⁸Ha Baruk mab Neria a wrug pup-tra a worhemmynnis Yeremia an profoes dhodho a-dro dhe lenna y'n rol-skrifa geryow an ARLOEDH yn chi an ARLOEDH.

⁹Y'n pympes blydhen a Yehoyakim mab Yosia myghtern Yuda, y'n nawves mis, oll an bobel yn Yerusalem hag oll an bobel a dheuth a sitys Yuda dhe Yerusalem a elwis penys a-rag an ARLOEDH.

¹⁰Ena, Baruk a lennas geryow Yeremia y'n rol-skrifa, yn chi an ARLOEDH, yn chambour Gemaria mab Shafan an skrifennyas, esa y'n klos ughella, orth entrans Yet Nowydh chi an ARLOEDH, yn klewans oll an bobel.

¹¹Mikaya mab Gemaria mab Shafan pan glewas oll geryow an ARLOEDH mes a'n rol-skrifa,

¹²ev eth war-nans dhe ji an myghtern yn chambour an skrifennyas; hag otta, oll an bennsevigyon o esedhys ena: Elishama an skrifennyas, Delaya mab Shemaia, Elnathan mab Akbor, Gemaria mab Shafan, Sedekia mab Hanania, ha'n bennsevigyon oll.

¹³Ha Mikaya a leveris dhedha oll an geryow re glewsa, pan lennas Baruk an rol-skrifa yn klewans an bobel.

¹⁴Ena oll an bennsevigyon a dhannvonas Yehudi mab Nethania mab Shelemia mab Kushi dhe Baruk, ow leverel, ‘Doro an rol-skrifa a lennsys yn klewans an bobel, ha deus.’ Ytho Baruk mab Neria a gemmeras an rol-skrifa yn y leuv hag y teuth dhedha.

¹⁵Hag i a leveris dhodho, ‘Esedh ha'y lenna dhyn.’ Ytho Baruk a's lennas dhedha.

¹⁶Pan glewsons oll an geryow, i a dreylyas an eyl dh'y gila yn own, ha leverel dhe Baruk, ‘Yn sur ni a dheriv an geryow ma dhe'n myghtern.’

¹⁷Ena i a wovynnas orth Baruk, ‘Lavar dhyn lemmyn, fatell wruss'ta skrifa oll an geryow ma? Ens i dhiworth y anow?’

¹⁸Baruk a worthybis dhedha, ‘Ev a leveris dhymm oll an geryow ma a-dhiworth y anow, ha my a's skrifas gans ynk war an rol-skrifa.’

¹⁹Ena an bennsevigyon a leveris dhe Baruk, ‘Ke ha omgeles, ty ha Yeremia, ha na as denvyth dhe wodhvos le mayth esowgh.’

²⁰Hag i eth dhe'n myghtern y'n klos, wosa i dhe asa an rol-skrifa yn chambour Elishama an skrifennyas; hag i a dherivas oll an geryow dhe'n myghtern.

²¹Ena an myghtern a dhannvonas Yehudi dhe gyrghes an rol-skrifa, hag ev a's kemmeras a-dhiworth chambour Elishama an skrifennyas; ha Yehudi a's lennas dhe'n myghtern hag oll an bennsevigyon sevys ryb an myghtern.

²²Ha'n myghtern o esedhys y'n chi-gwav y'n nawves mis, hag yth esa tan ow leski yn oeles a-ragdho.

²³Dell lennas Yehudi teyr po peder folenn, ev a's troghas gans kellyllik ha'ga thewlel y'n tan y'n oeles, bys pan veu an rol-skrifa gowal kowlleskys y'n tan esa y'n oeles.

²⁴Mes ny's teva own na ny fregsons aga dillas, naneyl an myghtern, na'y servysi neb a glewas oll an geryow ma.

²⁵Hwath pan ynnias Elnathan ha Delaya ha Gemaria war an myghtern ma na losko an rol-skrifa, ny vynna goslowes orta.

²⁶Mes an myghtern a worhemmynnis dhe Yerahmeel mab an myghtern ha Seraya mab Azriel, ha Shelemia mab Abdeel may dhalghenna Baruk an skrifennyas ha Yeremia an profoes. Mes an ARLOEDH a's kelas.

²⁷Ena ger an ARLOEDH a dheuth dhe Yeremia, wosa an myghtern dhe leski an rol-skrifa ha'n geryow a skrifas Baruk a-dhiworth ganow Yeremia, ow leverel:

²⁸Kemmer ken rol-skrifa ha skrif warnedhi oll an geryow kyns esa y'n kynsa rol-skrifa a loskas Yehoyakim myghtern Yuda.

²⁹Hag a-dro dhe Yehoyakim myghtern Yuda ty a lever: Yndellma y lever an ARLOEDH, Ty re loskas an rol-skrifa ma, ow leverel, Prag y skrifsys ynni y teu myghtern Babylon yn sur ha distrui an tir ma ha gul dhe hedhi anodho den ha best?

³⁰Ytho yndellma y lever an ARLOEDH a-dro dhe Yehoyakim myghtern Yuda: Ny'n jevydh denvyth dhe esedha war dron Davydh, ha'y gorf marow a vydh tewlys yn-mes dhe'n toemmder dydhweyth ha dhe'n rew nosweyth.

³¹My a'n kessydh ha'y has ha'y servysi rag aga anewnder; my a dhre warnedha, ha war annedhysi Yerusalem, ha war bobel Yuda, oll an drog re leveris er aga fynn, mes ny woslowsons.

³²Ena Yeremia a gemmeras ken rol-skrifa ha'y ri dhe Baruk an skrifennyas, mab Neria, neb a skrifas warnedhi a-dhiworth ganow Yeremia oll geryow an rol-skrifa re losksa Yehoyakim myghtern Yuda y'n tan; ha lies ger kehaval a veu keworrys dhedha.