Read Kernewek Yeremia 37 Bible Online

Yeremia 37 - Kernewek bible

Yeremia 37

¹Ha myghtern Sedekia mab Yosia a reynyas yn le Konia mab Yehoyakim a veu gwrys myghtern yn pow Yuda gans Nebukadnessar myghtern Babylon.

²Mes na ev na'y servysi na pobel an tir a woslowas orth geryow an ARLOEDH a gewsis der an profoes Yeremia.

³Ha Sedekia an myghtern a dhannvonas Yehukal mab Shelemia ha'n oferyas Sefania mab Maaseya dhe'n profoes Yeremia ow leverel, ‘Gwra pysi ragon dhe'n ARLOEDH agan Duw.’

⁴Lemmyn Yeremia re beu ow tos ha mos yn mysk an bobel, rag ny wrussens y worra yn prison.

⁵Ena lu Faro re dhothya yn-mes a Ejyp; ha pan glewas an Kaldeanys esa yn esedhva war Yerusalem nowodhow anedha, i a gildennas a-dhiworth Yerusalem.

⁶Ena ger an ARLOEDH a dheuth dhe'n profoes Yeremia, ow leverel,

⁷Yndellma y lever an ARLOEDH, Duw Ysrael: Yndellma hwi a lever dhe vyghtern Yuda, a'gas tannvonas dhymm dhe wovynn a-dro dhymm: Lu Faro esa ow tos dh'agas gweres, a dhehwel dhe Ejyp, dh'aga thir aga honan.

⁸Ha'n Kaldeanys a dhehwel hag omladh erbynn an sita ma; i a's kemmer ha'y leski gans tan.

⁹Yndellma y lever an ARLOEDH: Na omdoellewgh, ow leverel, ‘An Kaldeanys a wra mos yn sur ahanan’, rag ny vynnons mos dhe-ves.

¹⁰Hwath mar fethsowgh lu kowal an Kaldeanys a omladh er agas pynn, ha ny wortas marnas gwer wanyes, pubonan yn y dylda, i a sev ha leski an sita ma gans tan.

¹¹Ha pan gildennas lu an Kaldeanys a-dhiworth Yerusalem rag own lu Faro,

¹²ena Yeremia eth yn-mes a Yerusalem rag mos yn pow Benyamin, dhe dhegemmeres y gevrenn ena yn mysk an bobel.

¹³Ha pan esa ev orth Yet Benyamin, yth esa goelyador ena, henwys Yriya mab Shelemia mab Hanania, hag ev a dhalghennas Yeremia an profoes ow leverel, ‘Yth esos ow kilfia dhe'n Kaldeanys.’

¹⁴Ena Yeremia a leveris, ‘Gow yw; nyns esov ow kilfia dhe'n Kaldeanys.’ Mes ny woslowas orto, ytho Yriya a'n dalghennas ha'y dhri a-rag an bennsevigyon.

¹⁵An bennsevigyon o serrys orth Yeremia, ha'y weskel, ha'y worra yn prison yn chi Yonathan an skrifennyas, rag i a'n gwrug henna an prison.

¹⁶Yeremia a veu gorrys yn dorvagh hag y'n dorgellow, ha gortos ena lies dydh,

¹⁷Sedekia an myghtern a dhannvonas war y lergh, ha'y gemmeres yn-mes. Ha'n myghtern a wovynnas orto yn priva yn y ji, ha leverel, ‘Eus ger a-dhiworth an ARLOEDH?’ Ha Yeremia a leveris, ‘Eus!’ Ena yn-medh ev, ‘Ty a vydh delivrys yn leuv myghtern Babylon.’

¹⁸Yeremia a leveris ynwedh dhe vyghtern Sedekia, ‘Pana dhrog a wrug dhis po dhe'th servysi po dhe'n bobel ma ma'm gorrsowgh yn prison?

¹⁹Ple'ma agas profoesi a brofoesas dhis, ow leverel, “Ny dheu myghtern Babylon er agas pynn hag erbynn an tir ma”?

²⁰Ytho goslow lemmyn, my a'th pys, ow arloedh an myghtern: re dheffo ow fysadow a-ragos, my a'th pys, ha na'm dannvon arta dhe ji Yonathan an skrifennyas, ma na verwiv ena.’

²¹Ena Sedekia an myghtern a worhemmynnis may fe Yeremia gorrys yn klos an prison, ha torth-vara dhe vos res dhodho pub dydh a-dhiworth stret an beboryon, bys pan ve gyllys oll bara an sita. Ytho Yeremia a wortas yn klos an prison.