Read Kernewek Yeremia 38 Bible Online

Yeremia 38 - Kernewek bible

Yeremia 38

¹Ena Shefatia mab Mattan, ha Gedalia mab Pashhur, ha Yukal mab Shelemia, ha Pashhur mab Malkia a glewas an geryow a gewsis Yeremia dhe oll an bobel, ow leverel,

²Yndellma y lever an ARLOEDH, Neb a worta y'n sita ma a verow gans an kledha, gans an divoetter ha gans an pla; mes neb a yn-mes dhe'n Kaldeanys a vew; rag ev a'n jevydh y vewnans avel preydh, hag ev a vew.

³Yndellma y lever an ARLOEDH, An sita ma a vydh res yn leuv lu myghtern Babylon hag ev a's kemmer.

⁴Ytho an bennsevigyon a leveris dhe'n myghtern, ‘Ny a'th pys, gas an gour ma dhe vos gorrys dhe'n mernans, drefenn ev dhe wannhe an soudoryon yw gesys y'n sita ma ha diwleuv oll an bobel, dre gewsel geryow a'n par ma dhedha. Rag ny hwila an gour ma siwena an bobel ma, mes aga fystik.’

⁵Ena Sedekia an myghtern a leveris, ‘Otta, yma ev yn agas leuv; rag ny yll an myghtern gul travyth er agas pynn.’

⁶Ena i a gemmeras Yeremia ha'y dewlel yn dorvagh Malkia mab an myghtern esa yn klos an prison, owth iselhe Yeremia gans lovonow. Hag y'n dhorvagh nyns esa dowr, marnas leys, ha Yeremia a sedhas y'n leys.

⁷Hag Ebed-melek, an Ethiopek, onan an spadhesigyon yn chi an myghtern, a glewas i dhe worra Yeremia y'n dhorvagh. Yth esa an myghtern owth esedha yn Yet Benyamin,

⁸Ytho Ebed-melek eth yn-mes a ji an myghtern ha kewsel orth an myghtern, ow leverel,

⁹‘Ow arloedh an myghtern, an wer ma re wrug drogedh yn pup-tra a wrussons dhe Yeremia, neb a dowlsons y'n dhorvagh dhe verwel ena dre nown, rag nyns eus bara gesys y'n sita.’

¹⁰Ena an myghtern a worhemmynnis dhe Ebed-melek an Ethiopek, ow leverel, ‘Kemmer genes alemma deg gour warn ugens, ha tenna an profoes Yeremia yn-bann a-dhiworth an dhorvagh kyns ev dhe verwel.’

¹¹Ytho Ebed-melek a gemmeras an wer ganso ha mos yn chi an myghtern, dhe'n tyller yn-dann an dresorva, ha kemmeres alena kloutys ha dillasow usys, ha'ga iselhe gans lovonow y'n dhorvagh dhe Yeremia.

¹²Hag Ebed-melek an Ethiopek a leveris dhe Yeremia, ‘Gorr lemmyn an kloutys ha'n dillasow usys yn-dann dha dhiwgasel, yn-dann an lovonow.’ Ha Yeremia a wrug yndella.

¹³Ena i a dennas Yeremia yn-bann gans an lovonow, ha'y gemmeres yn-bann yn-mes a'n dhorvagh. Ha Yeremia a wortas yn klos an prison.

¹⁴Ena Sedekia an myghtern a dhannvonas war-lergh Yeremia ha'y dhegemmeres orth tressa entrans chi an ARLOEDH. Ha'n myghtern a leveris dhe Yeremia, ‘My a wovynn neppyth ahanas; na gel travyth ahanav.’

¹⁵Ena Yeremia a leveris dhe Sedekia, ‘Mara'n lavarav dhis, a ny'm gorrav dhe'n mernans? Ha mar rov dhis kusul, ny woslewydh orthiv.’

¹⁶Ytho Sedekia an myghtern a dos yn-dann gel dhe Yeremia, ‘Dell vew an ARLOEDH, a ros dhyn agan bewnans, ny'th worrav dhe'n mernans, na ny'th rov yn leuv an wer ma a hwila dha vewnans.’

¹⁷Ena Yeremia a leveris dhe Sedekia, ‘Yndellma y lever an ARLOEDH, Duw an luyow, Duw Ysrael: Mars edh yn-mes dhe bennsevigyon myghtern Babylon, ena dha enev a vew, ha ny vydh leskys an sita ma gans tan, ha ty ha'th chi a vew.

¹⁸Mes mar nyns edh yn-mes dhe bennsevigyon myghtern Babylon, ena an sita ma a vydh res yn leuv an Kaldeanys, hag i a's lesk gans tan, ha ty ny dhienkydh a'ga leuv.’

¹⁹Myghtern Sedekia a leveris dhe Yeremia, ‘Own a'm beus a'n Yedhewon re gilfisons dhe'n Kaldeanys, my dhe vos delivrys yn aga leuv hag i dhe'm tebeldhyghtya.’

²⁰Mes Yeremia a leveris, ‘Ny'th telivrons. Goslow, my a'th pys, orth lev an ARLOEDH a gowsav dhis, hag y fydh da genes, ha'th enev a vew.

²¹Mes mar skonydh mos yn-mes, hemm yw an pyth a dhiskwedhas an ARLOEDH dhymm:

²²Otta, oll an benynes yw gesys yn chi myghtern Yuda a vydh dres yn-mes dhe bennsevigyon myghtern Babylon, hag i a lever, “I re'th toellas ha'th fetha, an wer a drestsys ynna; dha dreys yw sedhys y'n leys, hag i a dreyl a-dhiworthis.”

²³I a dhre yn-mes oll dha wragedh ha'th fleghes dhe'n Kaldeanys, ha ty dha honan ny dhienkydh a'ga leuv, mes ty a vydh kemmerys gans leuv myghtern Babylon; ha'n sita ma a vydh leskys gans tan.’

²⁴Ena Sedekia a leveris dhe Yeremia, ‘Na as denvyth dhe wodhvos a-dro dhe'n geryow ma, ha ny verwydh.

²⁵Mes mar klew an bennsevigyon my dhe gewsel genes, hag i a dheu dhis, ha leverel dhis, “Lavar dhyn lemmyn an pyth a leversys dhe'n myghtern; na'n kel a-dhiworthyn, ena ny'th worryn dhe'n mernans; ynwedh an pyth a leveris an myghtern dhis”,

²⁶ena ty a lever dhedha, “My a worras ow fysadow a-rag an myghtern ma na'm dhannvonno arta dhe ji Yonathan dhe verwel ena.” ’

²⁷Ena oll an bennsevigyon a dheuth dhe Yeremia ha govynn orto; hag ev a leveris dhedha war-lergh oll an geryow ma re worhemmynnis an myghtern. Ytho i a astelas kewsel ganso, rag ny veu klewys an keskows.

²⁸Ha Yeremia a wortas yn klos an prison bys y'n jydh may feu Yerusalem kemmerys.